Read Hindi, Fiji Luuk 24 Bible Online

Luuk 24 - Hindi, Fiji bible

Luuk 24

¹Hapta ke pahile roj suuraj jeise nikra, weise u sab aurat mahke waala masaala, jon ulog taiyaar kare rahin, leke kabar pe gain.

²Ulog jab dekhin ki kabar se patthar haṭa hei.

³Tab bhittar gain. Lekin Prabhu Yeeshu ke laash nai paain.

⁴Ulog ekdam hairaan hoy ke wahiñ khaṛe ke khaṛe rahe gain, tab dui admi ujjar chamke waala kapṛa pahin ke ulog ke lage khaṛa hoy gain.

⁵U aurat log ekdam ḍar ke maare aapan muuṛ jameen tak jhukaay leen, tab usman se ek admi bolis, “Tum jinda ke murda meñ kaahe ke khojta hei?

⁶Yeeshu hiañ nai hei, kaahe ke u jinda hoy gais hei. Yaad karo jab u Galeel meñ raha tab u tum se bolis raha, ‘Manush ke laṛka ke jaruuri hei ki uske admi ke haath meñ saupa jaai aur u tisra roj jinda hoy jaai.’ ”

⁷

⁸Tab ulog ke yaad aais ki Yeeshu kaa bolis raha.

⁹Meri Magdalini, Joanna aur Jeims ke amma, Meri aur ulog ke sañghe aur jon aurat rahin, jon kabar pe gain raha, aay ke huañ jon sab baat bhais raha, u gyaara chela log ke bataain.

¹⁰

¹¹Chela log sochin ki i sab baat bekaar hei, aur ulog biswaas nai karin.

¹²Lekin Peeṭa uṭhis aur dauṛ ke kabar pe gais, aur jab u jhuk ke bhittar dekhis to khali malmal ke kafan ke kapṛa dekhaai dees, aur sab baat pe hairaan hoy ke ghar lauṭ aais.

¹³Wahi roj usman se dui admi Immaaus naam ke gaaoñ jaat rahin, jon Yarushalam se lagbhag saat meel ke duuri pe raha.

¹⁴Jeise ulog baat karat rahin ki i sab keise bhais raha,

¹⁵Yeeshu apne aap aay ke ulog ke bagal meñ chale laga.

¹⁶Ulog uske dekhis lekin nai pahichaanin.

¹⁷Yeeshu ulog se bolis, “Tum sab log chalte chalte kon baat karat raha?” Aur u duuno udaas hoy ke khaṛa hoy gain.

¹⁸Usman se ek ke naam Kliyopaas raha, aur u jawaab dees, “Kaa tumahi ekke admi Yarushalam se aaya hei jon nai janta ki pichhle kuchh din huañ kon baat bhais hei?”

¹⁹Tab Yeeshu puuchhis, “I kon baat hoy hei?” Ulog jawaab dees, “Wahi sab baat jon Naasrat ke Yeeshu ke sañghe bhais raha.” Aur aage bhi kahin, “I admi Parmeshwar aur sab log ke najar meñ, aapan kaam aur boli meñ ek taagat waala nabi raha.

²⁰Hamaar sab se baṛa paadri log aur kaam kare waala log uske pakṛaay ke maut ke saja dewaay deen aur uske kros pe bhi chaṛhwaay deen.

²¹Lekin ham log to yahi aas lagaay raha ki wahi Israayel ke chhoṛaay waala admi hoi. Lekin i baat ke hoy aaj teen roj hoy gais hei.

²²Hamaar sañghe ke kuchh aurat ham log ke hairaan kar deen hei.

²³Jab ulog sabere sabere kabar pe gain raha, tab huañ pe ulog ke laash nai mila, aur ham log ke aay ke bataain ki ulog ke huañ ainjal dekhaan raha, jon ulog ke bataais ki Yeeshu jinda hei.

²⁴Hamaar sañghe aur jon log rahin, usman se bhi kuchh kabar pe gain raha aur jeise u aurat log bataais raha, weisaiyeñ ulog bhi paain aur Yeeshu ke nai dekhe paain.”

²⁵Tab Yeeshu ulog se bolis, “Tum murakh hei, jon baat nabi log bolin, uske biswaas kare meñ kaahe etna deri lagaata hei!

²⁶Kaa Maseeh ke khaatir i jaruuri nai raha ki u dukh uṭhaay aur mahima paay?”

²⁷Tab Yeeshu Maozas se suru kar ke aur sab nabi ke aur jetna Baaibal meñ likhaan raha, usman se aapan baare meñ baat ke matlab ulog ke samjhaais.

²⁸Jab ulog gaaoñ ke nagichche pahuñch gain jahañ ulog ke jaay ke raha, tab Yeeshu bahaana karis ki uske aage jaay ke hei.

²⁹Tab u admi log usse binti karin, “Aaj hamaar sañghe rahe jaao, sanjha hoy gais hei aur bahut deri bhi hoy gais hei.” Aur tab Yeeshu ulog ke sañghe raat ruke ke waaste bhittar chala gais.

³⁰Jab Yeeshu khaana khaay beiṭhis, tab u roṭi lees aur dhanbaad deke, aur usman se tuuṛ ke sab ke dees.

³¹Tab ulog ke aañkhi khul gais aur jaan gain ki u kon hei, lekin tab tak u ulog ke saamne se chala gais.

³²Aur ulog ek dusra se bole lagin, “Jab u rasta meñ ham se baat karat raha aur hamme Baaibal ke matlab samjhaat raha, to kaa hamaar man meñ jaran nai hot raha?”

³³Wahi lage ulog uṭhin aur Yarushalam lauṭ gain, aur jaay ke u gyaara chela log aur uske aur saathi jon ek sañghe rahin u sab se bataain, “Prabhu sachche ke jinda hoy gais hei aur Saayman ke dekhaay bhi dees hei!”

³⁴

³⁵Aur fir ulog rasta waala baat aur roṭi tuuṛe waala baat aur keise ulog uske cheenh gain raha, sab baat bataay lagin.

³⁶Jab u duuno baat bataat rahin, tab Yeeshu aay ke ulog ke beech meñ khaṛa hoy gais, aur fir u bolis, “Tum sab ke saanti mile.”

³⁷Ulog to ḍar gain, yahi sochin ki u bhuut hei.

³⁸Lekin Yeeshu bolis, “Tum log kaahe ke ghabraata hei? Tumhaar man meñ kaahe ke dubidha hei?

³⁹Hamaar haath aur goṛ dekho, ham wahi hei. Hamme chhui ke dekho aur apne aap pata lagaao. Bhuut ke paas haḍḍi aur maas nai rahe hei jeise tum hamme dekhta hei.”

⁴⁰I bole ke baad Yeeshu aapan haath aur goṛ ulog ke dekhaais.

⁴¹Lekin khusi ke maare ulog ab bhi biswaas nai kare sakin aur hairaan hoy gain. Tab Yeeshu u sab se bolis, “Kaa tumhaar lage hiañ kuchh khaay ke hei?”

⁴²Ulog uske bhujaan machhri ke ek ṭukṛa deen, aur u uske leke ulog ke saamne khaay lees.

⁴³

⁴⁴Tab Yeeshu u sab se bolis, “Jab ham tumhaar sañghe raha, ham tumme u sab bataay raha jon kuchh Maozas ke kaanuun meñ likhaan hei, aur sab nabi ke buk aur Bhajan Sañhita meñ hamaar baare meñ jon kuchh bhi likhaan hei, u sab ke puura hoy ke hei.”

⁴⁵Tab Yeeshu ulog ke madat karis ki ulog samajh le ki Baaibal meñ kaa likhaan hei.

⁴⁶Yeeshu ulog se bolis, “Yahi likhaan hei ki Maseeh dukh uṭhaai aur tisra roj murda meñ se jinda hoy jaai.

⁴⁷Ulog i bhi bolin ki Yarushalam se leke sab jaati ke log meñ uske naam se paap ke maafi aur pastaawa ke parchaar kara jaai.

⁴⁸Tum log i baat ke gawaah hei.

⁴⁹Jis ke promis hamaar bappa tum se karis raha, ham uske bhejega, lekin tumme yahi jagha rahe ke paṛi, jab tak tumme swarag se sakti nai mil jaay.”

⁵⁰Tab Yeeshu aapan chela log ke ṭaaun se bahire le gais aur aapan haath uppar uṭhaay ke ulog ke aashirbaad dees.

⁵¹Jeise u ulog ke aashirbaad det raha, weisaiyeñ Yeeshu ulog se alag hoy gay aur swarag meñ uṭhaay lia gais.

⁵²Tab uske chela log uske bhajan gaain, aur bahut khusi se Yarushalam lauṭ gain.

⁵³Ulog jaada ṭaaim Mandir meñ uske baṛaai karte bitaain.