Read Hindi, Fiji Luuk 3 Bible Online

Luuk 3 - Hindi, Fiji bible

Luuk 3

¹Pandra (15) saal tak Raaja Tibiriyaas u jagha pe raaj karis, aur Pontias Paaylaṭ, Juḍia ke gavna raha, aur Galeel meñ Heraḍ raaja raha, aur uske bhaiya bhi, Filip, Ituria aur Trakhonitis meñ Lusiyaas, Abilene meñ raaj karat rahin,

²Enas aur Keifa baṛa paadri rahin, aur u ṭaaim Parmeshwar ke vachan, ḍezaṭ meñ Zekraaya ke laṛka Yuhanna tak pahuñchis.

³Joḍan ke agal bagal ke sab jagha pe aay ke, Yuhanna parchaar karis. U bolis, “Aapan paap se ghuum jaao, aur baptisma le leo, aur Prabhu tumhaar sab paap ke maaf kari.”

⁴Jeise Aayzaaya nabi ke buk meñ likhaan hei, “Ḍezaṭ meñ koi bolaay hei, ‘Prabhu ke rasta taiyaar karo, Uske khaatir sab rasta seedha banaao.

⁵Sab gaḍḍha bhar deo, Sab pahaaṛ baraabar kar deo, Tirchha rasta ke bhi seedha kar deo, Ṭehṛa mehṛa rasta bhi chikkan kar deo.

⁶Aur tab sab koi, Parmeshwar ke uddhaar dekhi.” ’

⁷Aur fir bheeṛ pe bheeṛ uske lage baptisma le aay lagin, lekin Yuhanna u sab se bolis, “He saañp ke bachcha log. Kon tumme saaodhaan karis ki Prabhu ke krodh aay waala hei, usse duur bhaago?

⁸Tum sab, kuchh eise karo ki dekhaai ki tum aapan paap se pachhtaata hei. Aur aapan log se i nai bolo ki Abraham tumhaar bappa hei. Kaahe ki ham tumme bataata hei, ki Parmeshwar i patthar meñ se Abraham ke waaste laṛkan peida kare sake hei.

⁹Peṛ ke kaaṭe ke waaste ṭañgaari taiyaar hei. Koi peṛ jon achchha fal nai de hei, uske kaaṭ dewa jaai aur aagi meñ jhok dewa jaai.

¹⁰Sab log usse puuchhin, “Tab ab ham kon cheej kari?”

¹¹Yuhanna jawaab dees, “Tum meñ se jiske paas dui sheṭ hei, usman se ek uske de deo jiske paas nai hei. Agar tumhaar lage khaana hei tab uske bhi usse baaṭ lo jiske paas khaay ke waaste kuchh bhi nai hei.”

¹²Kuchh ṭeks baṭore waala log bhi baptisma lewe aais, aur puuchhin, “He guru, hamme kon cheej kare ke hei?”

¹³U bolis, “Jetna tumhaar hei, khali otne leo, usse jaada nai.”

¹⁴Kuchh saulja log bhi usse puuchhis, “Bataao, hamme kon cheej kare ke hei?” Tab u ulog se bolis, “Koi se jabarjasti, peisa nai lena, ya koi pe jhuuṭṭe ke dos nai lagaana. Jetna kamaata hei wahi se khusi rahna.”

¹⁵Sab log ke man meñ aasra hoy lagis ki kahiñ Yuhanna to Maseeha nai hei.

¹⁶Yuhanna u sab se tab bolis, “Ham to tum log ke khali paani se baptisma deta hei, lekin u jon aay waala hei, u ham se bahut taagatwaala hei. Ham to i laayk bhi nai hei ki uske juuta ke bañdhan ke kholi. U to tum sab ke Pawitr Aatma aur aagi se baptisma dei.

¹⁷Uske suup uske haath meñ hei, jon se u fasal ke achchha se safa kari aur geñhu ke godaam meñ baṭori, lekin bhuusi ke u aagi meñ jaraay dei jon kabhi bhi bute nai saki.”

¹⁸Bahut rakam se u sab koi ke paaṭh paṛhaay ke achchha khabar yaane ki susamaachaar sunaat raha aur kosis karat raha ki sab koi aapan aapan rasta badal lei.

¹⁹Lekin Rula Heraḍ jon aapan bhaiya ke aurat Herodiaas se saadi kar lees raha, u bahut kharaab kharaab kaam bhi karis raha, uske Yuhanna ḍaaṭis.

²⁰Tab Heraḍ, ek aur usse bhi kharaab kaam karis. U Yuhanna ke jel meñ bhejwaay dees.

²¹Jab sab koi baptisma le leen aur Yeeshu bhi baptisma leke preya karat raha, tab asmaan khul gais.

²²Aur kabuttar ke ruup meñ Pawitr Aatma Yeeshu pe utris. Asmaan se ek awaaj sunaay dees, “Tum hamaar pyaara laṛka hei, aur ham tum se khusi hei.”

²³Jab Yeeshu parchaar suru karis, tab u kareeban tees (30) saal ke raha. Sab ke samajh meñ raha ki u Josaf ke laṛka hei. Lekin uske palwaar to Eli se raha,

²⁴jon Mattaat ke, aur u jon Levi ke, aur u jon Malki ke, aur u Jannai ke, aur u Josaf ke,

²⁵aur u jon Matityaah ke, aur u Amos ke, aur u Nahum ke, aur u Esli ke, aur u Naggai ke,

²⁶aur u Maat ke, aur u Matityaah ke, aur u Semein ke, aur u Josekh ke, aur u Joda ke,

²⁷aur u Joanan ke, aur u Rhesa ke, aur u Zarubbabel ke, aur u Shaaltiyal ke, aur u Neri ke,

²⁸aur u Melki ke, aur u Addi ke, aur u Kosaam ke, aur u Elmadam ke, aur u Yer ke,

²⁹aur u Joshua ke, aur u Elieza ke, aur u Joreem ke, aur u Mattaat ke, aur u Levi ke,

³⁰aur u Simion ke, aur u Juḍa ke, aur u Josaf ke, aur u Jonam ke, aur u Ilyaakim ke,

³¹aur u Melea ke, aur u Menna ke, aur u Mattaat ke, aur Nathan ke, aur u Ḍeiviḍ ke,

³²aur u Jesse ke, aur u Obed ke, aur u Boaz ke, aur u Salmon ke, aur u Nahshon ke,

³³aur u Ameenaadaab ke, Admin ke, aur Arni ke, aur u Hesron ke, aur u Perez ke, aur u Juḍa ke,

³⁴aur u Jaykab ke, aur u Aayzak ke, aur u Abraham ke, aur u Terah ke, aur u Nahor ke,

³⁵aur u Serug ke, aur u Reu ke, aur u Peleg ke, aur u Eber ke, aur u Shelah ke,

³⁶aur u Kenaan ke, aur u Arafyaad ke, aur u Shem ke, aur u Noa ke, aur u Limik ke,

³⁷aur u Mathushilah ke, aur u Enok ke, aur u Jared ke, aur u Mahallel ke, aur u Kenan ke,

³⁸aur u Enosh ke, aur u Shet ke. Yeeshu ke palwaar Eiḍam se leke, Parmeshwar tak ke raha.