Read Hindi, Fiji Luuk 4 Bible Online

Luuk 4 - Hindi, Fiji bible

Luuk 4

¹Jab Yeeshu Pawitr Aatma se bhar ke, Joḍan nadi se lauṭis, tab Aatma uske ḍezaṭ meñ le gais.

²Aur chaalis (40) roj tak saitaan uske ṭesṭ karte raha. Otna roj tak u kuchh bhi nai khaais aur chaalis roj ke baad uske bahut jor se bhuuk lagis.

³Saitaan Yeeshu se bolis, “Agar tum Parmeshwar ke laṛka hei to i patthar se bolo ki roṭi ban jaay.”

⁴Yeeshu jawaab dees, “Baaibal meñ likhaan hei, ‘Admi khali khaana se jinda nai rahe sake.” ’

⁵Tab saitaan uske uucha jagha le gais aur ek minaṭ meñ dunia dekhaay dees.

⁶Aur tab u bolis, “Ham tumme raaj ke chamak dhamak aur raaj kare ke hak dega. I sab hamme dewa gais hei, aur ham jiske maañgega uske de dega.

⁷Khali tum hamaar weship karo, i sab tumhaar hoy jaai.”

⁸Yeeshu bolis, “Baaibal meñ likhaan hei, ‘Prabhu, aapan Parmeshwar ke weship karo, aur khali wahi ke sewa karo!”

⁹Tab saitaan Yeeshu ke Yarushalam le gais aur Mandir ke sab se uucha jagha pe khaṛa kar dees, aur bolis, “Agar tum Parmeshwar ke laṛka hei to apne aap ke hiañ se nichche giraao.

¹⁰Baaibal meñ likhaan hei, ‘Parmeshwar aapan ainjals ke bataai, ki u tumhaar dekh bhaal kare. Ulog tumme haato haath uṭhaay lei, ki jisse tumhaar goṛ ke bhi patthar se choṭ nai lage.’ ”

¹²Yeeshu jawaab dees, “Baaibal meñ i bhi likhaan hei ki ‘Tum aapan Prabhu Parmeshwar ke ṭesṭ nai karo.’ ”

¹³Jab saitaan Yeeshu ke sab ṭesṭ kar lees, tab thoṛa deri ke waaste uske chhoṛ dees.

¹⁴Tab Yeeshu, Pawitr Aatma se bharke Galeel lauṭ gais. Sab jagha uske baare meñ niuz feil gais.

¹⁵Aur u ulog ke chech meñ parchaar kare laga, aur sab log uske baṛaai kare lagin.

¹⁶Ab Yeeshu, Naasrat lauṭis jahañ u baṛa bhais raha, aur aapan reeti ke mutaabik, sabat ke roj chech meñ gais. U Baaibal paṛhe ke waaste khaṛa bhais, aur uske Aayzaaya ke buk paṛhe ke bataawa gais. U buk ke khol ke, u paaṭh nikaaris jahañ likhaan raha,

¹⁸“Prabhu ke Aatma ham pe hei, kaahe ke u hamme chunis hei, ki ham, sab gareeb tak achchha khabar sunaai. Aur hamme i kaaran bheja gais hei ki jon bañdi hei, ham u sab ke chhuṛaai, añdha log ke aañkhi dei, aur jon sab ke nichche dabaawa gais hei u sab ke chhoṛaay lei

¹⁹aur sab ke i bataai ke ṭaaim aay gais hei jab Prabhu aapan log ke bachaai.”

²⁰Tab Yeeshu buk bañd kar ke ek kaam kare waala ke haath meñ de ke beiṭh gais. Mandir meñ sab log ke aañkhi wahi pe laga rahis.

²¹Tab Yeeshu ulog se bolis, “Jeise tum sab hamme paṛhte suna hei, weisaiyeñ aaj Baaibal ke i paaṭh puura bhais hei.”

²²Sab log hairaan hoy gain, aur achambha kare lagin ki u keise etna achchha achchha baat kare hei. Ulog bolis, “Kaa i Josaf ke laṛka nai hei?”

²³Yeeshu tab ulog se bolis, “Ham janta hei ki tum i kahaawat ham se jaruur bolega, ‘E ḍokṭa pahile apne aap ke achchha karo.’ Aur i bhi bolega ki jon kaam tum Kafarnahuum meñ kara hei, aapan des meñ bhi karo.”

²⁴Yeeshu ulog se bolis, Ham tumme sachche bataata hei, “Koi nabi aapan des meñ aadar nai paay hei.

²⁵Hamaar suno, i baat sachche hei ki Ilaayja ke ṭaaim meñ, jab teen aur aadha saal tak des meñ paani nai barsa raha, aur bahut suukha paṛa raha tab Israayel meñ bahut bidhwa rahin.

²⁶Lekin Ilaayja ke usman se sab ke paas nai, khali Seida ke Saarfat meñ ekke bidhwa ke paas bheja gais raha.

²⁷Aur Israayel meñ bhi bhawish bataay waala Elisha ke ṭaaim bahut log ke koṛhi ke bimaari raha lekin Siria ke Naaman ke chhoṛ ke aur koi achchha nai bhais.”

²⁸I sab sune ke baad chech meñ jetna log rahin, ulog gussaay gain.

²⁹Ulog sab khaṛa hoy gais, aur Yeeshu ke ghaseeṭ ke ṭaaun se bahire jon pahaaṛ pe u ṭaaun raha, wahi ke choṭi pe uske le gain. Ulog wahiñ se uske nichche giraay maañgat rahin,

³⁰lekin Yeeshu ulog ke beech meñ se nikar gais.

³¹Huañ se Yeeshu, Galeel ke Kafarnahuum ṭaaun meñ gais, aur sabat ke roj log ke sikhaay laga.

³²Uske sikhaay se sab log chakit hoy gain, kaahe ki u adhikaar se sikhaat raha.

³³Wahi Mandir meñ ek aur admi raha jisman dushṭ aatma raha, u jor se chillaay ke bolis,

³⁴“E Naasrat ke Yeeshu, tum ham se kaa mañgta hei? Kaa tum hamme naas kare ke waaste aaya hei? Ham janta hei ki tum kon hei! Tum Parmeshwar ke pawitr jan hei.”

³⁵Tab Yeeshu u aatma ke ḍaaṭis, “Chup hoy jaao, aur u admi se bahire nikar jaao!” Tab dushṭ aatma, bina kuchh bigaaṛe, u admi ke beech meñ paṭak ke chala gais.

³⁶I baat pe sab koi chakit rahe gain aur ek dusra se bole lagin, “I keisan vachan hei? Adhikaar se i admi dushṭ aatma ke hukum de hei aur u bhi nikar ke bhaag jaay hei!”

³⁷Aur puura des meñ Yeeshu ke i kaam ke niuz feil lagis.

³⁸U Mandir se uṭh ke Saayman ke ghare chala gais, jahañ pe uske saas bahut tej bukhaar se kaapat rahi, aur Saayman uske baare meñ Yeeshu se binti karis.

³⁹Yeeshu jaay ke uske lage khaṛa hoy gais aur bukhaar ke ḍaaṭis tab bukhaar utar gais aur u uṭh ke sab ke sewa kare lagis.

⁴⁰Suuraj ke ḍuube pe, bahut rakam ke rogi Yeeshu ke aage laawa gais, aur u ek ek pe haath rakh ke sab ke ṭheek kar dees.

⁴¹Dushṭ aatma bhi chillaay ke bolis, “Tum Parmeshwar ke laṛka hei!” Aur u sab log meñ se nikar gais. Aur Yeeshu ulog ke ḍaaṭis, aur ulog ke bole ke mauka nai dees ki u Maseeha hei.

⁴²Sabere hote Yeeshu ṭaaun chhoṛ ke ek suunsaan jagha pe gais. Sab log uske khoje lagin, aur jab paain to uske jaay se roke lagin.

⁴³Lekin Yeeshu ulog se bolis, “Hamme aur bhi jagha Parmeshwar ke raaj ke vachan sunaay ke hei, kaahe ke yahi khaatir hamme bheja gais hei.”

⁴⁴Aur tab u Galeel ke chech meñ parchaar kare lagis.