Read Hindi, Fiji Luuk 5 Bible Online

Luuk 5 - Hindi, Fiji bible

Luuk 5

¹Ek roj Yeeshu Ganesarat laik ke kinaare khaṛa hoy ke, Parmeshwar ke vachan sunaat raha, jab bheeṛ uspe gir paṛis.

²U dekhis ki laik ke kinaare dui bauṭ lagis hei, aur machhua log usman se utar ke jaal dhowat rahin.

³Yeeshu, Saayman ke bauṭ pe chaṛh ke usse bolis ki uske laik ke kinaare se thoṛa duur pe le chale. Yeeshu bauṭ meñ beiṭh gais, aur sab ke sikhaay laga.

⁴Jab Yeeshu baat kar lees, tab u Saayman se bolis, “Ab gahira paani meñ chalo, aur machhri pakṛe ke waaste jaal ḍaaro.”

⁵Saayman bolis, “E Prabhu, ham sab to raat bhar mehnat kara, lekin kuchh nai pakṛa. Fir bhi jab tum bolta hei to ham jaal ḍaarega.”

⁶Ulog weisaiyeñ karis aur etna jaada machhri jaal meñ aay gais ki jaal faṭe waala raha.

⁷Ulog aapan saathi log ke jon dusra bauṭ meñ rahin, ishaara kar ke bolaain, ki aay ke ulog ke madat kare. Ulog aay ke duuno bauṭ meñ etna machhri bharin ki bauṭ ḍuube laga.

⁸Jab Saayman Peeṭa i dekhis, to u Yeeshu ke goṛ pe gir paṛis aur bolis, “E Prabhu, hamaar lage se chala jaao, ham ek paapi admi hei!”

⁹Peeṭa ke saathi jab dekhin ki ulog etna jaada machhri pakaṛ leen hei, tab ulog hairaan hoy gain.

¹⁰Uske aur saathi, Zabdi ke laṛka Jeims aur Yuhanna bhi hairaan bhain. Tab Yeeshu, Saayman se bolis, “Ḍaro nai! Ab se tum machhri ke badle admi pakṛega.”

¹¹Ulog bauṭ ke kinaare le aain aur sab kuchh chhoṛ ke Yeeshu ke pichchhe hoy leen.

¹²Ek dafe Yeeshu ek ṭaaun meñ aais jahañ ek admi raha, jiske koṛhi ke bimaari raha. U Yeeshu ke jeise dekhis, weise jameen pe gir paṛis aur binti kare lagis, “E Prabhu, agar tum maañgo to hamme achchha kare sakta hei.”

¹³Yeeshu haath aage baṛhaay ke uske chhuis, aur bolis, “Ham mañgta hei ki tum achchha hoy jaao.” Aur wahi lage u koṛhi achchha hoy gais.

¹⁴Tab Yeeshu usse bolis, “Iske baare meñ koi se nai bataana, lekin seedha aapan paadri ke lage jaao, aur apne aap ke dekhaao. Tab gawaahi ke khaatir, ki tum achchha hoy gaya hei, Maozas ke kaanuun ke mutaabik, balidaan chaṛhraao.”

¹⁵Lekin Yeeshu jon cheej karis raha, i khabar bahut jor se sab bagal feil gais, aur bheeṛ pe bheeṛ uske sune ke khaatir aur achchha hoy ke waaste aay lagin.

¹⁶Lekin Yeeshu ek suunsaan jagha jaay ke akele meñ preya kare lagis.

¹⁷Ek roj Yeeshu parchaar karat raha, aur kuchh Farisi log aur kaanuun ke agua log huañ beiṭha rahin. Ulog Galeel aur Juḍia ke kona kona se aur Yarushalam se aain raha. Changa kare ke waaste Yeeshu pe Parmeshwar ke sakti raha.

¹⁸Kuchh log, ek admi ke jiske lakwa maaris raha, ek khaṭia pe uṭhaay ke Yeeshu ke saamne ghar ke bhittar laay maañgat rahin.

¹⁹Lekin bahut bheeṛ ke kaaran, ulog uske Yeeshu ke lage nai laay paain. Aur tab, ulog uske khaṭia sahit ruuf pe le gain aur ruuf ukhaaṛ ke, ghar meñ bheeṛ ke beecho beech, Yeeshu ke saamne utaar deen.

²⁰Tab Yeeshu ulog ke biswaas dekh ke bolis, “E dost, tumhaar paap maaf hoy gais hei.”

²¹Tab huañ ke baṛkue aur Farisi log ek dusra se baat biwaad kare lagin, “I kon hei jon Parmeshwar ke ninda kare hei! Khali Parmeshwar hamaar paap ke maaf kare sake hei.”

²²Yeeshu to u sab ke bichaar jaanat raha aur ulog se bolis, “I rakam ke baat kaahe sochta hei?

²³I bole ke sahaj hei, ‘Tumhaar paap ke maafi mil gais hei,’ ya i bole ke, ‘uṭho aur chalo firo!’

²⁴Lekin ab tum dekhega ki Manush ke laṛka ke lage bhi, dharti pe paap ke maafi dewe ke adhikaar hei.” Aur tab u jiske lakwa maaris raha, u admi se bolis, “Ham tum se bolta hei, aapan khaṭia uṭhaao aur ghare jaao!”

²⁵Wahi lage u admi sab ke aage uṭhis, aur aapan khaṭia uṭhaay ke Prabhu ke baṛaai karte aapan ghare chala gais.

²⁶Sab koi takte rahe gain aur Prabhu ke naam lete, ḍar se bole lagin, “I keisan chamatkaar hamme aaj dekhe ke mila hei!”

²⁷Iske baad Yeeshu bahire gais aur ṭeks baṭorewaala Levi ke dekhis, u aapan ofis meñ beiṭha raha. Yeeshu usse bolis, “Hamaar pichchhe aao.”

²⁸Levi sab kuchh chhoṛ ke Yeeshu ke pichchhe hoy lees.

²⁹Tab Levi, Yeeshu ke khaatir aapan ghar pe ek baṛa paaṭi rakkhis. Mehmaan bahut rahin, jisman bahut ṭeks baṭorewaala bhi rahin.

³⁰Bahut Farisi aur paṛha likha log jon huañ rahin, Yeeshu ke chela log pe kurkuraain, “Tum sab kaahe ke ṭeks baṭorewaala log aur paapi log ke sañghe khaata peeta hei?”

³¹Tab Yeeshu u sab se bolis, “Jon admi ke kuchh bimaari nai hei, uske ḍokṭa ke jaruurat nai hei, lekin ulog ke hei jon bimaar hei.

³²Ham dharam pe chalewaala log ke nai lekin paapi log ke bachaay ke waaste aaya hei.”

³³Kuchh log Yeeshu se bolis, “Yuhanna ke chela log hardam upwaas karat rahin aur preya bhi karat rahin, aur Farisi log ke chela bhi wahi kare hei, lekin tumhaar chela log khaay piye hei.”

³⁴Tab Yeeshu bolis, “Jab tak baraati log dulha ke sañghe rahe hei, bina khaay piye nai rahe hei.

³⁵Lekin jab ṭaaim aai aur u huañ se uṭhaay lewa jaai, tab ulog upwaas kari.”

³⁶Tab Yeeshu ulog ke ek kahaawat sunaais, “Tum nawa kameez ke faaṛ ke puraana kameez pe chakti nai lagaata. Agar tum lagaayga to, tum nawa ke bhi faaṛ dega aur u puraana meñ bhi mil nai paai.

³⁷Aur koi nawa waain, puraana waain ke beg meñ nai bhari, kaahe ke nawa waain, puraana waain ke beg ke faaṛ ke bahe jaai, aur waain ke beg bhi naas hoy jaai.

³⁸Lekin nawa waain nawa beg meñ bhare ke chaahi!

³⁹Aur koi bhi puraana waain piye ke baad nawa waain nai piye maañgi. Ulog bole hei, ‘Puraana waain hee achchha hei!” ’