Read Hindi, Fiji Luuk 8 Bible Online

Luuk 8 - Hindi, Fiji bible

Luuk 8

¹Iske baad, Yeeshu gaaoñ gaaoñ aur ṭaaun ṭaaun parchaar karte, aur Parmeshwar ke raaj ke baat sunaate raha. Uske sañghe uske baarah chela bhi rahin,

²aur ulog ke sañghe u aurat log bhi rahin, jon sab dushṭ aatma se chhuṭkaara paay leen raha, aur bimaari se achchha hoy gain raha. Usman se ek, Meri jon Magdalini kahaawat rahi aur jisman saat dushṭ aatma rahis.

³Joanna, jis ke admi Khoja raha aur jon Heraḍ ke meneja raha, aur Susanna, aur kaafi aur aurat log, jon aapan peisa se Yeeshu aur uske chela log ke madat karat rahin.

⁴Jab ek baṛa bheeṛ dusra dusra ṭaaun se aay ke Yeeshu ke chaaro taraf jama hoy lagin, tab u ulog ke ek kahaani bataais,

⁵“Ek ṭaaim ek admi khet meñ bia bowe gais raha. Jab u khet meñ bia chheeṭat raha, tab kuchh bia rasta ke kinaare gir gais, u sab ke goṛ se kachar dewa gais, aur chiṛia aay ke uske khaay lees.

⁶Kuchh bia chaṭṭaan pe gira, aur jab u jamis, tab uske paani nai mile se sukhaay gais.

⁷Kuchh bia jañgal jhaaṛi ke beech meñ gira, u sab jamis lekin jhaaṛi u sab ke dabaay dees.

⁸Aur kuchh bia achchha jameen pe giris, peṛ jamis, aur baṛa hoy ke sao guna fal laais.” Jab Yeeshu kahaani sunaay dees, tab ulog se bolis, “Agar tum log ke lage kaan hei to suno!”

⁹Yeeshu ke chela log kahaani ke matlab puuchhin.

¹⁰Yeeshu jawaab dees, “Tum sab ke Parmeshwar ke raaj ke seekraṭ ke samajh dewa gais hei, dusra log ke kahaani sunaawa jaay hei, ki jisse ulog dekhi lekin dekhe nai paai, aur suni lekin samjhe nai paai.”

¹¹“I kahaani ke matlab i hei, bia Parmeshwar ke vachan hei.

¹²Jon bia rasta ke kinaare giris raha, i ulog hei, jon sandes sune hei, lekin saitaan aay ke ulog ke dil se vachan leke chala jaay hei, ki kahiñ eise nai hoy ki log vachan pe biswaas kare aur bach jaay.

¹³Jon bia chaṭṭaan pe gira, i ulog hei jon vachan ke to khusi se le lewe hei, lekin jaṛ nai pakṛe ke kaaran ilog khali thoṛa deri biswaas rakkhe hei, aur ṭesṭ ke ṭaaim gir jaay hei.

¹⁴Jon bia jhaaṛi meñ giris, i ulog hei jon vachan sune hei, lekin chinta, aur peisa aur jeewan ke sukh dukh meñ fañs jaay hei, aur eisan log ke fal pake nai paay.

¹⁵Jon bia achchha maṭṭi meñ giris, i ulog hei jon vachan ke sune hei, aur achchha bhala samjhe hei. Aur eisane log achchha fal laay hei.

¹⁶Koi batti baar ke pyaala ke nichche nai rakkhe hei aur naa to khaṭia ke nichche rakkhe hei. Lekin batti hardam batti rakkhe waala jagha pe rakkha jaay hei, ki jisse jon koi bhi bhittar aai, uske ujera mili.

¹⁷Koi eisan cheej lukaan nai hei, jon mile nai sake hei. Aur jon bhi chhipaan cheej hei u to saamne aai.

¹⁸Yahi kaaran saaodhaan raho ki tum keise sunta hei! Jon koi ke lage kuchh hei, uske aur dewa jaai, lekin jon log ke lage kuchh bhi nai hei, ulog se to u bhi le lewa jaai jon ulog samjhe hei ki uske lage hei.

¹⁹Yeeshu ke amma aur bhaiya log uske lage aain, lekin usse mile nai paain kaahe ke huañ bahut baṛa bheeṛ raha.

²⁰Koi Yeeshu se bolis, “Tumhaar amma aur bhaiya log bahire khaṛa hei aur tum se mile maañge hei.”

²¹Yeeshu bolis, “Hamaar amma aur bhaiya log, ulog hei jon Parmeshwar ke vachan sune hei aur uske maane hei.”

²²Ek roj Yeeshu aur uske chela log bauṭ meñ gain, aur u ulog se bolis, “Aao ham sab laik ke u bagal chali.”

²³Aur jab ulog bauṭ meñ jaawat raha, tab Yeeshu soy gais. Achaanak laik pe tufaan aay gais, aur bauṭ ḍuube laga. Ulog museebat meñ paṛ gain.

²⁴Tab ulog jaay ke Yeeshu ke jagaain, “Swaami, Swaami! Ham log ḍuubta hei!” Yeeshu uṭh ke hawa aur halkora ke ḍaaṭis. Hawa aur halkora ruk gais, aur sab saanti hoy gais.

²⁵Tab Yeeshu aapan chela log se bolis, “Kaa tum log ke lage biswaas nai hei?” Lekin ulog to ḍar ke maare aur hairaan hoy ke ek dusra se bole lagin, “I kon hei? I to hawa aur halkora ke bhi hukum dewe hei aur u sab iske baat sune hei!”

²⁶Yeeshu aur uske chela log Galeel ke laik paar kar ke Gerasa ke des meñ pahuñchin.

²⁷Jeise Yeeshu bauṭ se utris, u ṭaaun ke ek admi ulog se milis. U admi meñ dushṭ aatma raha. U bahut roj se nañge ghuumat raha, aur ghar meñ nai lekin kabrastaan meñ rahat raha.

²⁸U Yeeshu ke dekhis aur chillaais, aur uske aage aay ke gir ke jor se bolis, “He Yeeshu, Parmeshwar ke laṛka, tumme ham se kaa kaam hei? Ham binti karta hei hamme nai sataao!”

²⁹U i baat bolis kaahe ke Yeeshu u dushṭ aatma ke hukum dees ki u admi se nikar jaay. U admi ke bhuut hardam hamla karat raha. Aur chaahe uske haath aur goṛ chain se bañdha rahe ya kaṛa pahra rahe, u sab ke tuuṛ dewat raha. Aur tab jon dushṭ aatma rahis, uske jañgal meñ suunsaan jagha pe le jaawat raha.

³⁰Yeeshu usse puuchhis, “Tumhaar naam kaa hei?” U jawaab dees, “Hamaar naam sena hei.” U i khaatir i bolis raha, kaahe ke uske bhittar bahut dushṭ aatma rahin.

³¹U sab Yeeshu se binti kare lagin ki ulog ke gahira gaddha meñ nai jaay de. (U jagha pe dushṭ aatma log ke saja mile hei, aur ilog ke bhi saja mili.)

³²Wahi log ke lage, ek suar ke baṛa jhunḍ charat rahin. Ulog Yeeshu se binti karin, ki u ulog ke suar meñ bhej de, aur Yeeshu wahi karis.

³³Tab dushṭ aatma, ulog se nikar ke aur suar meñ ghus gais. Aur u jhunḍ harharaay ke laik meñ kuud gain aur wahiñ ḍuub marin.

³⁴Jab suar charaay waala log i sab dekhin, tab ulog dauṛ ke ṭaaun aur gaaoñ meñ sab bagal i khabar feilaay deen.

³⁵Huañ ke log i dekhe ke waaste aain ki huañ kon cheej bhais raha, aur jab ulog Yeeshu ke lage aain, to dekhe hei ki jon admi meñ dushṭ aatma raha, u achchha hoy gais aur kapṛa pahin ke, Yeeshu ke goṛ ke lage beiṭhis hei. U sab log ḍar gain.

³⁶Tab u sab log jon dekhin raha ki u admi ṭheek hoy gais hei, sab ke jaay ke bataain.

³⁷Tab Gerasa ke agal bagal ke sab log Yeeshu se binti kare lagin ki u huañ se chala jaay, kaahe ke ulog sab ḍar gain. Jab Yeeshu bauṭ meñ chaṛh ke jaay laga,

³⁸tab jon admi se dushṭ aatma nikra raha, u bhi Yeeshu se binti kare laga, “Hamme aapan sañghe le chalo.” Lekin Yeeshu usse bolis,

³⁹“Aapan ghare lauṭ jaao, aur sab log se bataao ki Parmeshwar tumhaar khaatir ketna baṛa baṛa kaam karis hei.” U admi jaay ke puura ṭaaun meñ parchaar kare laga, ki Yeeshu uske waaste ketna baṛa baṛa kaam karis raha.

⁴⁰Jab Yeeshu lauṭis, tab huañ ek baṛa bheeṛ uske welkam kare ke waaste waiṭ karat raha.

⁴¹Tab Jaayras naam ke ek admi, jon huañ ke chech ke agua raha, aay ke Yeeshu ke aage ghuṭna ṭek dees, aur binti karis ki u uske ghare chale,

⁴²kaahe ke uske baarah saal ke eklauti laṛki mare waali rahi. Jab Yeeshu Jaayras ke sañghe jaat raha, tab bheeṛ uske uupar girat paṛat rahin.

⁴³Bheeṛ meñ ek aurat rahi jiske baarah saal se khuun bahe waala bimaari raha, aur u aapan etna peisa ḍokṭa pe kharcha kar dees raha, aur fir bhi u koi ke haath se achchha nai bhais.

⁴⁴Aur jeise u pichchhe se aay ke Yeeshu ke kapṛa chhuis, uske khuun bahe ke band hoy gais.

⁴⁵Yeeshu puuchhis, “Hamme kon chhuis?” Sab koi nai bol dees lekin Peeṭa aur uske saathi bolis, “E Swaami! Etna bheeṛ meñ tumhaar chaaro bagal se log tumme dabaay hei aur tumhaar uppar gire hei”

⁴⁶Lekin Yeeshu bolis, “Koi hamme chhuis hei, kaahe ke ham meñ se sakti nikris hei.”

⁴⁷U aurat dekhis ki u baat chhupaay nai saki, aur kaapte Yeeshu ke lage aay ke uske goṛ pe gir paṛis. Aur sab ke saamne bataais ki kaahe ke u Yeeshu ke chhuis raha, aur keise u wahi lage achchhi hoy gais hei.

⁴⁸Yeeshu u aurat se bolis, “Tum aapan biswaas se ab achchhi hoy gayi hei. Ab saanti se chali jaao!”

⁴⁹Yeeshu baat karat raha, jab Jaayras ke ghar se khabar aais, “Tumhaar laṛki mar gais hei. Ab guru ke tang nai karo.”

⁵⁰Lekin i sun ke Yeeshu Jaayras se bolis, “Soch nai karo! Khali biswaas rakkho, tumhaar laṛki bach jaai.’.

⁵¹Yeeshu uske ghare pahuñch ke, aur khali Peeṭa, Yuhanna, Jeims aur laṛki ke maiya aur bappa ke bhittar le gais.

⁵²Sab koi u laṛki ke mare pe rowat rahin. Lekin Yeeshu bolis, “Ro nai, u laṛki maris nai hei. U to khali sowe hei.”

⁵³Sab log Yeeshu pe hase lagin, kaahe ke ulog jaanat rahin ki laṛki mar gais hei.

⁵⁴Yeeshu laṛki ke haath pakaṛ ke jor se bolis, “E laṛki uṭho!”

⁵⁵Uske saas lauṭ aais aur u uṭh ke beiṭh gais. Yeeshu bolis ki uske khaay ke waaste kuchh deo.

⁵⁶Laṛki ke maiya bappa hairaan rahin, lekin Yeeshu ulog ke rokis ki huañ jon cheej bhais raha, uske baare meñ koi se kuchh nai bataana.