Read Hindi, Fiji Luuk 9 Bible Online

Luuk 9 - Hindi, Fiji bible

Luuk 9

¹Yeeshu aapan baarah chela log ke ek sañghe bolaais, aur ulog ke dushṭ aatma nikaare ke aur bimaari ṭheek kare ke sakti aur adhikaar dees.

²Aur ulog ke Parmeshwar ke raaj ke parchaar kare ke aur bimaari ṭheek kare ke khaatir bhejis.

³Aur u bolis, “Rasta ke waaste kuchh nai lena, chale ke waaste naa laaṭhi, naa beg, naa khaana, ya peisa aur hiañ tak ki badle ke khaatir kapṛa bhi nai lena.

⁴Jon ghar meñ welkam mili, wahiñ ruk jaana, aur fir wahiñ se bida hona.

⁵Agar koi tumme welkam nai kari, to u ṭaaun se nikarte ṭaaim aapan goṛ ke garda wahiñ jhaaṛ dena. Yahi ulog ke waaste chetaaoni hoi.”

⁶Tab chela log gaaoñ gaaoñ jaay ke susamaachaar sunaawat rahin aur sab jagha log ke achchha karte, jaat rahin.

⁷Galeel ke raaja Heraḍ, jab i baat sunis tab u ghabraay gais, kaahe ke bahut log bolin ki Yuhanna, baptisma de waala jinda hoy gais hei.

⁸Ketna log to i bhi bolin ki Ilaayja dekhaay dees hei, aur kaafi log bolat rahin ki puraana nabi log meñ se ek jinda hoy gais hei.

⁹Heraḍ bolis, “Yuhanna ke muuṛ to hamahi kaṭwaaya raha, ab i kon hei jis ke baare meñ i sab baat sunaai de hei?” Heraḍ, Yeeshu ke dekhe maañgat raha.

¹⁰Tab chela log lauṭ ke aay ke Yeeshu se sab bataain ki ulog kon kon cheej karin raha. Tab u ulog ke alag kar ke Bethseida naam, ek ṭaaun meñ le gais.

¹¹Lekin kaafi log jaan gain ki u kahañ hei, aur uske pichchhe aain. Yeeshu u sab ke welkam karis aur Parmeshwar ke raaj ke baare meñ baat cheet karis aur kaafi log jon achchha bhi hoy maañgat raha ulog ke achchha karis.

¹²Sanjha ke ṭaaim, baarah chela log Yeeshu ke lage aay ke bolin, “I sab log ke ghare bhej deo ki ilog jaay ke khaana paani ke parband kare aur raat meñ soy ke khaatir jagha khoje, kaahe ke i suunsaan jagha hei.”

¹³Lekin Yeeshu bolis, “Tumahi ilog ke khaay ke waaste parband karo.” Ulog bolin, “Hamaar lage to khali paañch roṭi aur dui machhri hei. Kaa tum mañgta hei ki ham jaay ke ilog ke waaste khaana khareedi?”

¹⁴Huañ pe lagbhag paañch hajaar log rahin. Yeeshu chela log se bolis, “I sab ke laain meñ pachaas pachaas kar ke beiṭhaay deo.”

¹⁵Ulog eisehiyeñ karin.

¹⁶Tab Yeeshu paañch roṭi aur dui machhri leke, uppar swarag ke bagal dekh ke dhanbaad dees, aur uske tuuṛ tuuṛ ke chela log ke dete gais, ki sab ke baaṭ de.

¹⁷Sab koi peṭ bhar ke khaain. Aur baarah baaskeṭ bhar ke bacha kucha ṭukṛa chela log bharin.

¹⁸Jab Yeeshu akele preya karat raha, tab uske chela log uske lage rahin. Yeeshu ulog se puuchhis, “Log hamaar baare meñ kon cheej bole hei?”

¹⁹Ulog jawaab deen, “Koi bole hei tum Yuhanna, baptisma de waala hei, aur koi bole hei tum Ilaayja hei, aur kuchh log bole hei ki tum puraana nabi meñ se ek hei jon jinda hoy gais hei.”

²⁰“Lekin tum hamme kon cheej bolta hei?” Peeṭa bolis, “Tum Parmeshwar ke bheja Maseeha hei.”

²¹Yeeshu ulog se bolis ki i baat koi aur se nai bataana.

²²Yeeshu i bhi bolis, “Manush ke laṛka ke khaatir dukh uṭhaay ke jaruuri hei, u des ke neta log, baṛa paadri, aur Maozas ke kaanuun ke guru log, ke haath se dukh uṭhaai. Ulog uske ṭhukraai, aur maar ḍaari, lekin teen roj baad jinda hoy jaai.”

²³Tab Yeeshu sab se bolis, “Agar koi hamaar pichchhe aay maañge, to apne aap ke bhulaay de. Sab roj aapan kros uṭhaay ke hamaar pichchhe chale.

²⁴Kaahe ke agar koi aapan jaan bachaay maañge to uske khoy dei, lekin jon koi hamaar waaste aapan jaan khoi, u uske bachaai.

²⁵Tumme kon cheej mili, agar tum puura dunia apnaay lega lekin aapan jaan khoy dega?

²⁶Agar tumme hamaar baat se saram lage hei, tab Manush ke laṛka bhi jab u aapan aur aapan Pita ke aur ainjal ke mahima ke sañghe aai to tum se sarmaai.

²⁷Ham sachche bolta hei ki jon sab hiañ khaṛa hei, usman se kuchh log bina Parmeshwar ke raaj dekhe nai mari.

²⁸Lagbhag aaṭh roj ke baad Yeeshu, Peeṭa, Yuhanna, aur Jeims ke sañghe leke pahaaṛ pe preya kare chala gais.

²⁹Jab u preya karat raha, uske chehra ke ruup badal gais, aur uske kapra ekdam ujjar hoy ke chamke lagis.

³⁰Wahi lage Maozas aur Ilaayja huañ aay ke usse baat kare lagin.

³¹I duuno swarag ke mahima meñ dekhaai deen, aur Yeeshu ke mare ke baare meñ baat cheet kare lagin, jon Yarushalam meñ hoy waala raha.

³²Peeṭa aur uske sañghe dui aur chela, neeñd meñ suta rahin. Achaanak ulog uṭhin aur mahima se bhara Yeeshu ke dekhin. Aur sañghe u duuno admi ke bhi dekhin.

³³Jab Maozas aur Ilaayja jaay lagin, tab Peeṭa Yeeshu se bolis, “E Swaami, ketna achchha raha ki ham hiañ hei! Ham teen ṭenṭ banaayga, ek tumhaar waaste, ek Maozas ke waaste aur ek Ilaayja ke waaste.” Lekin Peeṭa nai jaanat raha ki u kaa bole hei.

³⁴Peeṭa baat karte raha, ki baadar ulog ke uppar chhaay gais aur ulog ḍar gain.

³⁵Baadar meñ se ek awaaj sunaais, “I hamaar chuna laṛka hei. Iske suno.”

³⁶U awaaj ke baad, ulog khali Yeeshu ke dekhin. Thoṛa deri tak ulog chuppe rahin, aur jon kuchh dekhin raha, uske baare meñ kuchh nai bolin.

³⁷Dusra roj jab ulog pahaaṛ se utrin, tab ek baṛa bheeṛ ulog se milis.

³⁸Ek admi bheeṛ meñ se chillaay ke bolis, “E guru, ham binti karta hei, hamaar eklauta laṛka pe daya karo!

³⁹Ek dushṭ aatma uske pakṛe hei aur u chillaay hei. U iske eise shaik kare hei ki iske muñh se fena nikar aay hei, aur tab tak nai chhoṛe hei jab tak i ekdam thak nai jaay.

⁴⁰Ham tumhaar chela log se binti kara ki ulog i bhuut ke nikaar de lekin ulog nikaar nai paain.”

⁴¹Yeeshu ulog se bolis, “Tum jiddi aur thoṛa biswaas waala log! Ham kab tak tumhaar sañghe rahe paayga aur jon tum karta hei uske sahe paayga?” Tab Yeeshu bolis, “Aapan laṛka ke hamaar lage laao.”

⁴²Jab laṛka ke Yeeshu ke lage laawa jaat raha, tab bhuut uske pakaṛ ke puura shaik kar dees. Yeeshu u bhuut ke ḍaaṭis. Aur u laṛka ke achchha karke, uske bappa ke lauṭaay dees.

⁴³Sab koi Parmeshwar ke mahaan sakti se hairaan rahe gain.

⁴⁴Sab log u kaam se jon Yeeshu karat raha hairaan rahin, tab Yeeshu aapan chela log se bolis, “Yaad rakhna, jon baat ham tum se bataay waala hei! Manush ke laṛka ke, uske dusman ke hawaale kar dewa jaai.”

⁴⁵Lekin chela log nai jaane sakin ki Yeeshu kaa bole hei. Uske matlab ulog se lukaan raha. Ulog samajh nai sakin, aur puuchhe se ḍarat rahin.

⁴⁶Chela ek dusra se laṛe lagin, ki ulog meñ se sab se baṛa kon hei.

⁴⁷Yeeshu jaanat raha ki ulog kaa soche hei, aur u ek bachcha ke aapan bagal khaṛa kar ke,

⁴⁸tab u chela log se bolis, “Jab tum hamaar naam se ek bachcha ke welkam karega, tab tum hamme bhi welkam karta hei. Aur jab tum hamme welkam karta hei, tab tum uske bhi welkam karta hei, jon hamme bhejis hei. Kaahe ke tum log meñ se jon sab se chhoṭa hei, wahi sab se baṛa hei.”

⁴⁹Yuhanna bolis, “E guru, ham ek admi ke dekha, jon tumhaar naam se dushṭ aatma ke nikaarat raha. Ham uske roka, kaahe ke u ham log ke grup ke nai raha.”

⁵⁰Yeeshu bolis, “Uske nai roko, jon koi tumhaar agaiñsṭ nai hei, u tumhaar sañghe hei.”

⁵¹Yeeshu ke swarag jaay ke ṭaaim nagichche raha, aur u Yarushalam jaay ke bichaar karis.

⁵²U aapan kuchh log ke aage bhej dees raha, ki jisse ulog jaay ke Saamri gaaoñ meñ sab taiyaari kari.

⁵³Lekin huañ ke log uske welkam nai karin, kaahe ke u Yarushalam jaat raha.

⁵⁴I dekh ke uske chela Jeims aur Yuhanna bolin, “E Swaami! Kaa tum mañgta hei ki ham hukum dei aur swarag se aagi gir ke i sab ke bhasam kar dei?”

⁵⁵Lekin Yeeshu ulog ke ḍaaṭis, “Tum nai janta ki tum kon aatma ke hei. Manush ke laṛka sab log ke naas kare nai aais hei, lekin ulog ke bachaay aais hei.”

⁵⁶Aur ulog dusra gaaoñ chala gain.

⁵⁷Jab ulog rasta pe jaat rahin, tab koi bolis, “Tum jahañ jaayga, ham tumhaar sañghe chalega.”

⁵⁸Yeeshu bolis, “Lomṛi ke gaḍḍha hei aur asmaan ke chiṛia ke ghosla hei, lekin Manush ke laṛka ke to sir rakkhe ke bhi jagha nai hei.”

⁵⁹Yeeshu ek dusra admi se bolis, “Hamaar pichchhe aao.” Lekin u admi bolis, “E Prabhu, pahile jaay ke ham aapan bappa ke maṭṭi de dei.”

⁶⁰Yeeshu bolis, “Jon mara hei, ulog ke aapan murda apne gaaṛe deo, lekin tum jaay ke Parmeshwar ke raaj ke baare meñ parchaar karo.”

⁶¹Tab koi dusra Yeeshu se bolis, “E Prabhu, ham to tumhaar pichchhe chalega, lekin pahile jaay ke ham aapan ghar ke sab log se bida le lei.”

⁶²Yeeshu usse bolis, “Jon koi aapan haath hal pe rakh ke aur pichchhe taake hei, u Parmeshwar ke raaj ke laayk nai hei.”