Read Hindi, Fiji Yuhanna 1 Bible Online

Yuhanna 1 - Hindi, Fiji bible

Yuhanna 1

¹Dunia ke bane se pahile vachan raha, u Ishwar ke sañghe rahis, aur u sachche meñ Ishwar raha.

²Sab se pahile u vachan Ishwar ke sañghe raha.

³Aur wahi vachan ke sahaare, Ishwar sab cheej banaais. U shabd ke bina ek bhi cheej nai banis. Aur jon cheej bhi banis

⁴uske jeewan ke sota wahi vachan raha, aur yahi jeewan ham log ke khaatir roshni laais.

⁵Wahi roshni añdhiyaar meñ chamkat raha aur u añdhera bhi u roshni ke butaay nai sakis.

⁶Ishwar aapan ek duut bhejis, uske naam Yuhanna raha,

⁷u roshni ke baare meñ bataay aais raha aur sab log ke rasta dekhaais ki log biswaas kare.

⁸Yuhanna u roshni nai raha. U to khali u roshni ke baare meñ bataay aais raha.

⁹Jon sachcha roshni sab ke uppar chamke hei u dunia meñ aais hei.

¹⁰Vachan dunia meñ raha, lekin uske koi nai pahichaanis, jab ki Parmeshwar aapan vachan se dunia banaais.

¹¹U to aapan log meñ bhi gais, lekin aapan log bhi uske nai apnaais.

¹²Jon jon bhi uske apnaais aur uske naam pe biswaas karis. U sab log ke u hak dees ki u sab Parmeshwar ke laṛkan bane.

¹³U sab Ishwar ke laṛkan weisaiyeñ to nai ban gais aur admi ke maañge se bhi nai banis Parmeshwar khud apne u sab ke aapan laṛkan banaais.

¹⁴Vachan admi ke ruup dhar lees, aur hamaar beech meñ rahe lagis. Ham uske sachcha mahima dekha, u mahima uske mila kaahe ki u aapan baap ke ekke laṛka raha Usman se Prabhu ke sachchaai aur daya hamaar lage aay gais hei.

¹⁵Yuhanna uske baare meñ chillaay ke bolis, “Yahi ke baare meñ to ham bataata raha, jab ham bola raha, ‘U hamaar pichchhe aay hei, lekin u ham se bahut baṛa hei, kaahe ki u hamaar peida hoy se bahut pahile se raha.” ’

¹⁶Uske baṛappan raha ki u ham pe daya dekhaais, aur aasheesh pe aasheesh dete gais.

¹⁷Maozas ke bagal se to Ishwar hame kaanuun dees, lekin sachchaai aur baṛappan to Yeeshu Maseeh ke bagal se aais.

¹⁸Koi bhi Ishwar ke nai dekhis, khali wahi laṛka jon Ishwar ke godi meñ hei, hame dekhaais ki Ishwar keisan hei.

¹⁹Yahuudi agua log, Yarushalam ke kuchh paadri aur madat kare waala log ke, Yuhanna ke lage puuchhe bhejis ki u kon hei.

²⁰Yuhanna khula aam bataais, “Ham Maseeha nai hei.”

²¹“Tab tum kon hei?” ulog puuchhis, “Kaa tum Ilaayja hei?” “Nai, ham to u bhi nai,” Yuhanna bolis. “Tab kaa tum nabi hei?”, u sab puuchhin. “nai”, u jawaab dees.

²²“Tum hame bataao, tum kon hei?” u sab bolin. “Uske lage hamme jawaab le jaay ke hei, jon hamme bhejis hei.”

²³Tab Yuhanna, Aayzaaya nabi ke vachan meñ bolis, “Ham khali wahi hei jon akele jagha pe chillaay ke bole hei, ‘Prabhu ke waaste seedha rasta banaao!” ’

²⁴Kuchh log ke bhi Yuhanna ke lage bheja gais raha.

²⁵U log us se puuchhis, “Tum Maseeh bhi nai hei, nabi bhi nai hei, aur Ilaayja bhi nai hei, to tum kaahe ke baptisma deta hei?”

²⁶Yuhanna jawaab dees, “Ham to khali paani se baptisma deta hei, lekin tumhaar beech meñ ek admi aais hei jiske tum sab nai janta hei.

²⁷Jon hamaar pichchhe aaywaala hei uske to ham juuta ke bandhan tak khole laayk nai hei.”

²⁸Yuhanna i sab baat tab bolis jab u Bethni gaaoñ meñ Joḍan nadi ke kinaare baptisma det raha.

²⁹Dusra roj Yuhanna dekhis ki Yeeshu uske lage chala aay hei aur u bolis, “Yahi hei Parmeshwar ke memna, jon dunia ke sab paap ke aapan uppar uṭhaay le jaai!”

³⁰Yahi hei jiske baare meñ ham bataata raha jab ham bola, “Ek admi hamaar pichchhe aay hei, aur u ham se bahut baṛa hei, kaahe ki u hamaar peida hoy se pahile raha.”

³¹Ham nai janta raha ki u kon hei. Ham to khali paani se baptisma dewe aay raha, ki jisse Israayel ke sab log uske dekhe saki.

³²Yuhanna aapan gawaahi dees, “Ham dekha ki ek Aatma kabuttar ke rakam, asmaan se utar ke Yeeshu pe ruk gais.”

³³Tab bhi ham nai jaan paaya ki i wahi hei, lekin jon hamme bhejis raha ki ham paani se baptisma dei, ham se bataais, “Tum dekhega ek Aatma aay ke koi pe ruki. Tab tum jaanega ki i wahi hei jon Pawitr Aatma se baptisma dei.”

³⁴Ham dekh lia hei aur tumme bataata hei ki yahi Parmeshwar ke laṛka hei.

³⁵Dusra roj Yuhanna fir aapan chela log ke sañghe wahiñ khaṛa raha,

³⁶jab u dekhis ki Yeeshu bagal se jaay hei, tab u bolis, “Yahi Ishwar ke memna hei.”

³⁷Yuhanna ke dui chela i baat sunke Yeeshu ke lage gain.

³⁸Jab Yeeshu ghuum ke u duuno ke dekhis to puuchhis, “Tumme kaa chaahi?” U duuno jawaab deen, “Guru ji, tum kahañ rahta hei?”

³⁹Yeeshu jawaab dees, “Aao aur dekho!” U ṭaaim sanjha ke lagbhag chaar baja raha aur u sab chela jaay ke dekhin ki Yeeshu kahañ rahe hei. Aur baaki ṭaaim wahi ke sañghe bitaain.

⁴⁰Usman se ek admi, jon Yuhanna ke sun ke Yeeshu ke lage gais raha, uske naam Enḍru raha aur u Saayman Peeṭa ke bhaiya raha.

⁴¹Sab se pahile u aapan bhaiya Saayman se milis aur bataais, “Ham Maseeha ke khoj lia hei.”

⁴²Enḍru aapan bhaiya ke Yeeshu ke lage le aais. Jab Yeeshu uske dekhis to bolis, ‘Tumhaar naam Saayman hei aur tum Yuhanna ke laṛka hei. Tum "Kaifa" yaane ki "chaṭṭaan" ke naam se jaana jaayga. (U Peeṭa ke rakam hei jiske matlab ‘ek patthar’ hei.)

⁴³Dusra roj Yeeshu Galeel jaay ke waaste plen banaais. Huañ u Filip se milis aur bolis, “Hamaar sañghe aao!”

⁴⁴Filip, Beitseida ṭaaun ke rahe waala raha, wahiñ pe jahañ Peeṭa aur Enḍru rahat rahin.

⁴⁵Filip, Natanyel se milis aur usse bataais, “Hamme u mil gais hei jiske baare meñ Maozas kaanuun ke buk meñ likhis raha, aur yahi ke baare meñ nabi bhi likhis raha. Uske naam Yeeshu hei, u Josaf ke laṛka hei aur Naasrat meñ rahe hei.”

⁴⁶Natanyel puuchhis, “Kaa Naasrat meñ se kuchh achchha nikre sake hei?” “Aao aur dekho,” Filip bolis.

⁴⁷Jab Yeeshu dekhis ki Natanyel uske lage aay hei, tab u uske baare meñ bolis, “I to sachcha Israayeli hei, isman kuchh bhi jhuuṭ nai hei!”

⁴⁸Natanyel usse puuchhis, “Tum hamme keise janta hei?” Yeeshu jawaab dees, “Filip ke bolaay se pahile ham tumme anjeer ke peṛ ke nichche dekh lia raha.”

⁴⁹Natanyel tab bolis, “Guru ji, tum Ishwar ke laṛka hei aur Israayel ke raaja hei!”

⁵⁰Yeeshu jawaab dees, “Kaa tum i kaaran ham pe biswaas karta hei ki ham tumme bataaya ki ham tumme anjeer (fig) ke peṛ ke nichche dekh lia raha? Tum isse bhi bahut baṛa kaam dekhega.

⁵¹Ham tum se sachche sachche bataata hei, tum dekhega ki asmaan khuli aur ainjals uppar jaay ke fir Manush ke laṛka pe utri.”