Read Hindi, Fiji Yuhanna 10 Bible Online

Yuhanna 10 - Hindi, Fiji bible

Yuhanna 10

¹Yeeshu bolis, “Ham tum se sachche bolta hei, ki jon duaari se nai lekin dusra rasta se bheṛa ke gaiṭ ke bhittar jaay hei, u chor aur ḍaaku hei.

²Lekin jon duaari se bhittar jaay hei u bheṛa log ke shepaḍ rahe hei.

³Uske khaatir gaiṭkeepa gaiṭ khol dewe hei, aur u bhittar chala jaay hei. Bheṛa log bhi uske awaaj jaan le hei. U ek ek ke naam leke bolaay hei aur bahire le jaay hei.

⁴Jab u aapan sab bheṛa ke nikaar le hei tab u aage aage chale hei, aur uske bheṛa uske pichchhe pichchhe chale hei, kaahe ki u sab uske awaaj jaane hei.

⁵Bheṛa koi aur admi ke pichchhe nai chali. U sab uske awaaj nai jaani aur duur bhaag jaai.”

⁶Yeeshu i kahaani u sab ke sunaais, lekin ulog samajh nai paain ki u kaa bole hei.

⁷Yahi kaaran Yeeshu fir se bolis, “Ham tum se sachche bolta hei ki sab bheṛa ke duaari hamahi hei.

⁸Jon sab ham se aage aay rahin, u sab chor aur ḍaaku rahin aur bheṛa usman se koi ke nai sunin.

⁹Ham gaiṭ hei. Jon koi ham se bhittar aai uske uddhaar hoi, u bahire aur bhittar aay jaay saki aur chaara paai.

¹⁰Chor to khali chori kare, jaan se maare aur nuksaan kare aay hei. Ham to aaya hei ki u sab ke jeewan mile, aur puura jeewan mile.

¹¹Hamahi achchha shepaḍ hei, jon aapan bheṛa ke waaste jaan bhi de sake hei.

¹²Ek majduur, jon maalik bhi nai hei aur shepaḍ bhi nai hei, bheṛiya ke aate dekh ke bhaag jaay hei, tab bheṛiya bheṛa ke pakaṛ le hei aur baaki ke idhar udhar bhagaay de hei.

¹³Majduur bhaag jaay hei kaahe ki u to khali ek majduur hei aur uske kuchh parwaah nai rahe hei.

¹⁴Ham achchha shepaḍ hei. Ham aapan bheṛa ke janta hei aur u sab hamme jaane hei.

¹⁵Wahi rakam jeise hamaar Pita hamme jaane hei aur ham aapan Pita ke janta hei, ham aapan bheṛa ke khaatir jaan bhi de sakta hei.

¹⁶Hamaar paas aur bhi bheṛa hei jon i gaiṭ meñ nai hei. Jab u hamaar awaaj suni tab hamme uske bhi jaay ke laay ke hei. Tab khali ekke gaiṭ rahi aur ekke shepaḍ rahi.

¹⁷Pita ham se prem kare hei, kaahe ki ham aapan jaan dewe ke khaatir taiyaar hei, ki jisse ham uske fir se paay lei.

¹⁸Hamaar laaif ke ham se koi nai chheene sake hei, lekin ham apne uske khusi se deta hei. Hamme aapan laaif dewe ke adhikaar hei, i bhi adhikaar hei ki uske fir se lauṭaay lei. Aur yahi hei jon hamaar Pita hamme hukum dees hei.”

¹⁹Yahi baat ke kaaran admi log meñ dui bhaag hoy gais.

²⁰Bahut log bolin, “Isman saitaan hei aur i to pagla hei! Tab iske kaahe ke suno?”

²¹Lekin kuchh aur log bolat rahin, “Jon admi meñ saitaan rahe hei, u eisan baat nai kare sake hei! Keise ek saitaan ek añdha ke aañkhi achchha kare sake hei?”

²²Ṭhanḍa ke mausam raha. Yarushalam meñ chech ke teohaar manaawa jaat raha.

²³Yeeshu chech ke Soloman duaari ke baranḍa pe ghuumat raha.

²⁴Yahuudi log uske chaaro taraf se gher leen aur puuchhin, “Tum kab tak hamme ḍaauṭ meñ rakkhega? Agar tum Maseeh hei to hamme sachche bataay deo.”

²⁵Yeeshu jawaab dees, “Ham tumme bataay dia, lekin tum hamaar biswaas nai karta. Jon kaam ham Pita ke naam se karta hei usse to tum samajh jaao.

²⁶Lekin tum biswaas nai karega kaahe ki tum hamaar bheṛa nai hei.

²⁷Hamaar bheṛa to hamaar awaaj sune hei, ham ulog ke janta hei aur ulog hamaar pichchhe aay hei.

²⁸Ham u sab ke anant jeewan deta hei, aur u kabhi nai mari aur u sab ke ham se koi nai chheene saki.

²⁹Jon hamaar Pita hamme dees hei wahi sab se mahaan hei aur uske koi bhi hamaar Pita se nai chheene saki.

³⁰Pita aur ham ek hei.”

³¹Fir se Yahuudi log Yeeshu ke maare ke waaste patthar uṭhaain.

³²Yeeshu u sab se bolis, “Tumhaar saamne ham ketna achchha kaam jon Pita hamme dees raha, kara, isman se kon kaam ke waaste tum sab hamme patthar se maare mañgta hei?”

³³U log bolin, “Achchha kaam ke waaste ham tumme nai maarta hei, lekin jon tum Parmeshwar ke ninda karta hei uske khaatir! Tum to khali ek manush hei, lekin tum apne aap ke Ishwar banaay mañgta hei!”

³⁴Tab Yeeshu jawaab dees, “Tumhaar vachan meñ kaa i nai likha ki Parmeshwar bolis raha, ‘Tum sab Ishwar hei?’

³⁵Tum vachan ke jhuuṭa nai bole sakta, aur Parmeshwar wahi log se baat karis aur ulog ke Ishwar bolis.

³⁶Parmeshwar hamme chunke dunia meñ bhejis, tab tum keise bolta hei ki ham Ishwar ke ninda karta hei? Ham to i bola ki ham Parmeshwar ke laṛka hei.”

³⁷Agar ham u kaam nai karta jon hamaar Pita maañge hei to ham pe biswaas nai karo.

³⁸Aur agar ham u kaam kari jon hamaar Pita kare hei, to tum ham pe biswaas karo, chaahe tumme ham pe bharosa hei ya nai. Aur tab tum samajh lega ki wahi Pita hamaar sañghe hei, aur ham wahi hei jon Pita ke sañghe hei.

³⁹Ek dafe fir Yeeshu ke ulog pakṛe ke kosis karin, lekin u sab ke haath se nikar gais.

⁴⁰Aur Joḍan nadi ke paar u jagha pe chala gais, jahañ Yuhanna pahile baptisma det raha.

⁴¹Jab Yeeshu huañ raha to bahut se log uske paas aain aur bolin, “Yuhanna baptisma dewe waala koi chamatkaar nai karis raha, u jon kuchh Yeeshu ke baare meñ bolis raha, u sab sachche raha.”

⁴²Aur huañ bahut se log Yeeshu pe biswaas kare lagin.