Read Hindi, Fiji Yuhanna 11 Bible Online

Yuhanna 11 - Hindi, Fiji bible

Yuhanna 11

¹Laazras naam ke ek admi bimaar raha. U Meri aur uske bahini Maatha ke gaaoñ Bethni meñ rahat raha.

²I wahi Meri rahi jon Prabhu ke goṛ pe mahke waala pefeum chhoṛ ke aapan baar se pochhis raha. Yahi ke bhaiya Laazras bimaar raha.

³Duuno bahini Yeeshu ke lage khabar bhejin, “Prabhu tumhaar ek pyaara dost Laazras bimaar hei.”

⁴Jab Yeeshu i sunis to bolis, “Uske bimaari ke ant maut nai hei. I to Pita aur uske laṛka ke mahima ke ṭaaim hei.”

⁵Yeeshu, Meri, Maatha aur uske bhaiya Laazras se bahut prem karat raha.

⁶Lekin fir bhi u wahiñ pe dui aur roj ruk gais.

⁷Tab u aapan chela log se bolis, “Aao ham ab fir se Juḍia chali.”

⁸Chela log bolin, “Thoṛa din pahile wahiñ pe kuchh log tumme patthar se maare maañgat rahin, fir bhi tum wahiñ jaay mañgta hei?”

⁹Yeeshu bolis, “Kaa din meñ baarah ghanṭa nai hei? Agar tum din meñ chalega to suuraj ke roshni meñ dhakka nai khaayga.

¹⁰Lekin agar tum raat meñ chalega, to dhakka jaruur lagi, kaahe ki u ṭaaim añdhiyaar rahi.”

¹¹Yeeshu i baat bol ke fir se bolis, “Hamaar dost Laazras soy gais hei, aur ham jaay ke uske jagaayga.”

¹²Chela log jawaab deen, “Prabhu, agar u sowe hei, to iske matlab hei ki u achchha hoy jaai.”

¹³Yeeshu to Laazras ke maut ke baare meñ bolat raha, lekin chela log sochin ki u khali uske neeñd meñ soy ke baare meñ bole hei.

¹⁴Tab Yeeshu u sab se safa safa bol dees, “Laazras mar gais hei!

¹⁵Ham khusi hei ki ham huañ pe nai raha, kaahe ki ab tumme mauka mili ki tum ab ham pe biswaas karega. Aao uske paas chalo.”

¹⁶Thomas, jon ke Didumas naam se bolaay jaat raha, u aapan saathi log se bolis, “Aao. Chalo, ki jisse ham bhi uske sañghe mare saki.”

¹⁷Jab Yeeshu Bethni meñ pahuñchis, to pata laga ki chaar roj pahile Laazras ke dafnaay dewa gais raha.

¹⁸Bethni, Yarushalam se lagbhag teen kilomeeṭa ke duuri pe raha.

¹⁹Aur bahut se Yahuudi log Maatha aur Meri ke ghare jaay ke uske bhaiya ke mare pe shok manaat rahin.

²⁰Jab Maatha sunis ki Yeeshu aay hei, to usse mile ke waaste u gais. Lekin Meri ghar pe hee rahe gais raha.

²¹Maatha Yeeshu se bolis, “Prabhu, agar tum hiañ rahta, to hamaar bhaiya nai marta.

²²Ab bhi ham janta hei ki, Parmeshwar wahi kari jon tum maañgega.”

²³Ispe Yeeshu bolis, “Tumhaar bhaiya fir se jinda hoy jaai.”

²⁴Maatha fir se bolis, “Ham janta hei ki aakhri roj u fir se jinda hoy jaai.”

²⁵Tab Yeeshu usse bolis, “Hamahi to hei jon mara ke fir se jinda karta hei! Jon koi bhi ham pe biswaas kari, u mar ke bhi fir se jinda hoy jaai.

²⁶Aur jon jinda hei aur ham pe biswaas kari, u kabhi nai mari. Kaa tum biswaas karti hei?”

²⁷Tab u bolis, “Haañ Prabhu, ham biswaas karta hei ki tumahi Maseeh hei aur Parmeshwar ke laṛka hei jon dunia meñ aay waala raha.”

²⁸Etna bol ke u aapan bahini Meri ke lage chali gais aur uske kaan meñ dheere se bolis, “Guru ji aay gais hei, aur tumme dekhe maañge hei.”

²⁹Jab Meri i sunis, to jaldi se uṭh ke Yeeshu se mile chali gais.

³⁰Yeeshu abhi gaaoñ tak nai pahuñchis raha, lekin abhi wahi jagha raha jahañ Maatha ke bheñṭ usse bhais raha.

³¹Bahut Yahuudi log Meri ke ghar meñ uske dheeraj dewe ke khaatir aay rahin, aur jab u sab dekhin ki Meri uṭh ke jaldi jaldi jaay hei to sochin ki u kabar pe roy ke khaatir jaay hei. U sab uske pichchhe hoy leen.

³²Meri huañ pahuñchis jahañ Yeeshu raha. Aur jeisehiyeñ u uske dekhis uske goṛ pe gir paṛis aur bolis, “Prabhu, agar tum hiañ rahta to hamaar bhaiya nai marta.”

³³Jab Yeeshu uske aur Yahuudi log ke rote dekhis to uske dil bhar aais, aur u bahut dukhi hoy gais.

³⁴Tab u puuchhis, “Tum log uske kahañ dafnaaya hei?” “Aao aur dekho, Prabhu.” ulog bolin.

³⁵Yeeshu roy laga.

³⁶Tab sab log bolin, “Dekho u Laazras se ketna prem karat raha”

³⁷Kuchh to i bhi bolin, “I to añdha ke aañkhi dees raha, to kaahe ke i Laazras ke mare se nai bachaais?”

³⁸Yeeshu bahut udaas raha aur ek gahira saas lees aur kabar ke taraf chala gais, jon ek gufa raha, aur jiske muh pe ek patthar rakha raha.

³⁹Yeeshu bolis, “Patthar haṭaao!” Laazras ke bahini Maatha bolis, “Prabhu, ab tak to usman se kharaab gandh nikre laga hoi. U to chaar roj se gaaṛa gais hei!”

⁴⁰Yeeshu usse bolis, “Kaa ham tum se i nai bola ki agar tum biswaas karegi to Parmeshwar ke mahima dekhegi?”

⁴¹Log patthar haṭaay deen. Yeeshu uppar dekhis aur bolis, “He Pita, ham tumme dhanbaad deta hei, ki tum hamaar sunta hei.

⁴²Ham janta hei ki tum hamme hardam sunta hei, lekin ham ilog ke khaatir fir se bolta hei, ki jisse ilog biswaas kari ki tumahi hamme bheja hei.”

⁴³I baat bol ke Yeeshu jor se bolis, “Laazras, bahire nikro!”

⁴⁴Laazras bahire aais, uske haath aur goṛ abhi bhi kafan ke kapṛa se bañdha raha, aur muh pe bhi kafan ke kapṛa lapṭaan raha. Yeeshu ulog se bolis, “Iske khol deo aur jaay deo.”

⁴⁵Bahut Yahuudi log, jon Meri ke lage khaṛa rahin dekhin ki Yeeshu kaa karis raha, aur uspe biswaas karin.

⁴⁶Lekin kuchh kuchh lauṭ ke Farisi aur agua log se jaay ke bataain ki Yeeshu kaa karis raha.

⁴⁷Ispe Baṛa Paadri aur Farisi log ek sabha bulaain aur bolin, “Ham kaa kari? I to bahut se chamatkaar kare hei!

⁴⁸Agar ham iske eise chhoṛ dega to sab log ispe biswaas kar lei aur Romi adhikaari hamaar agaiñsṭ kaam kari aur hamaar Mandir aur hamaar des ke barbaad kar dei!”

⁴⁹Usman se ek jiske naam Kaaifa raha, aur jon u saal ek Baṛa Paadri ban gais raha, bolis, “Tum sab pagla hei!

⁵⁰Kaa tum i nai samajhta ki tumhaar bhalaai yahi meñ hei ki ham sab ke khaatir ek ke maar deo ki jis se ham sab bach jaai?”

⁵¹I baat u aapan bagal se nai bolis raha, lekin u saal ke Baṛa Paadri hoy ke naate bolis raha, u i profasi karis raha, ki Yeeshu Yahuudi jaat ke waaste mari.

⁵²Aur khali ulog ke waaste nai lekin Parmeshwar ke log jon idhar udhar chhitraay gais hei, u sab ke ek sañghe laay ke waaste.

⁵³Aur wahi roj se Yahuudi log Yeeshu ke maare ke waaste kosis kare lagin.

⁵⁴Yahi kaaran Yeeshu Juḍia meñ sab ke saamne ghuume nai sakis, aur u aapan chela log ke sañghe Efraim meñ chala gais aur huañ rahe lagis, jahañ aur koi nai raha.

⁵⁵Fasah ke teohaar ke ṭaaim aay waala raha, aur yahi kaaran gaaoñ ke bahut log Yarushalam meñ aain ki jisse u apne aap ke fasah ke teohaar se pahile safa kar le.

⁵⁶U sab Yeeshu ke khojat rahin, aur chech meñ khaṛa hoy ke aapas meñ baat kare lagin, “Tum kaa sochta hei? Kaa u teohaar meñ aai?”

⁵⁷Udhar Baṛa Paadri aur agua log bataain raha ki agar koi Yeeshu ke pata jaane hei to usse aay ke bataay ki jisse ulog uske pakṛe saki.