Read Hindi, Fiji Yuhanna 12 Bible Online

Yuhanna 12 - Hindi, Fiji bible

Yuhanna 12

¹Fasah ke chhe din pahile Yeeshu Bethni gaaoñ meñ aais jahañ Laazras rahat raha aur jiske Yeeshu jinda karis raha.

²Huañ pe Yeeshu ke welkam ke khaatir khaana taiyaar kara gais. Maatha khaana parosat rahi aur Laazras ulog ke sañghe beiṭhis raha.

³Tab Meri lagbhag aadha leeṭa bahut mahañga aur mahke waala pefeum laay ke Yeeshu ke goṛ pe ḍaar ke aur aapan baar se uske goṛ pochhis. Uske mahak se puura ghar mahke laga.

⁴Yeeshu ke ek chela jiske naam Juḍas Iskariyoti raha, aur baad meñ jon Yeeshu ke pakaṛwaai, bolis,

⁵“Kaahe nai i pefeum jaada peisa meñ bech ke aur gareeb meñ baaṭ dewa jaay hei?”

⁶U i baat bolis raha, iske waaste nai ki u gareeb ke baare meñ sochat raha, lekin i kaaran ki u ek chor raha.

⁷Tab Yeeshu jawaab dees, “Uske akele chhoṛ deo! U hamme dafnaay ke roj ke waaste i pefeum rakkhis hei.

⁸Gareeb to tumhaar sañghe hardam rahi, lekin ham to tumhaar sañghe hardam nai rahega.”

⁹Bahut log ke pata laga ki Yeeshu huañ hei, tab u sab huañ aain, i kaaran nai ki ulog Yeeshu ke dekhi, lekin u sab Laazras ke dekhe maañgat rahin jiske Yeeshu mara meñ se jinda karis raha.

¹⁰Tab Baṛa Paadri log Laazras ke bhi maare ke waaste kosis karin.

¹¹Iske kaaran i raha ki bahut se Yahuudi log dharam guru ke saath chhoṛ ke Yeeshu pe biswaas kare lagin raha.

¹²Dusra roj jon sab log fasah ke teohaar manaay ke waaste aain raha, sunin ki Yeeshu Yarushalam aais hei.

¹³Tab u sab log khajuur ke ḍaari leke Yeeshu se mile ke khaatir chal deen, aur chillaay ke bole lagin, “Parmeshwar ke jay ho! Prabhu ke bagal se jon aay hei, uspe Prabhu ke aasheesh hoy! Prabhu ke aasheesh Israayel ke raaja pe bhi rahe!”

¹⁴Yeeshu ke ek gadha mila aur uspe beiṭh ke u chal paṛis, jeise Baaibal meñ likhaan raha.

¹⁵“Yarushalam ke log, ghabraana nai! Dekho ek gadha pe sawaar hoy ke tumhaar Raaja aay hei.”

¹⁶Uske chela log u ṭaaim i sab samajh nai paain raha, lekin Yeeshu ke mahima hoy ke baad ulog ke yaad aais ki Yeeshu ke baare meñ Baaibal meñ kaa likha raha aur log uske sañghe wahi sab karin.

¹⁷Jon log Yeeshu ke sañghe rahin jab u Laazras ke kabar meñ se bolaay ke mara se jinda karis raha, i baat ke gawaahi deen.

¹⁸Wahi kaaran bheeṛ Yeeshu se mile rahin, kaahe ki u sab sune rahin ki Yeeshu i chamatkaar karis raha.

¹⁹Farisi log tab ek dusra se bolin, “Dekho, ham to kuchh nai kar paata hei! Sab koi to Yeeshu ke pichchhe bhaage hei!”

²⁰Kuchh Greek log huañ rahin jon teohaar ke ṭaaim Yarushalam preya ke khaatir aay rahin.

²¹Ulog Filip ke lage gain, jon Galeel ke Beithseida ke rahe waala raha. U sab usse binti karin, “Bhaiya ham Yeeshu se mile mañgta hei.”

²²Filip tab Enḍru ke lage gais aur duuno jaay ke Yeeshu se baat cheet karin.

²³Yeeshu tab jawaab dees, “U ṭaaim aay gais hei jab Manush ke laṛka ke mahima mili.

²⁴Ham tum se sachche bolta hei, jab tak geñhu ke ek daana maṭṭi meñ gir ke mar nai jaay hei, tab tak u akele rahe hei, aur jeisehiyeñ u daana mar jaay hei, u bahut fare hei.

²⁵Jon aapan laaif se pyaar kare hei, uske khoy dei, aur jon aapan laaif se prem nai kare hei aur dusra ke khaatir jie hei, uske anant jeewan mili.

²⁶Agar koi hamaar sewa kare maañge hei to hamaar pichchhe hoy le, ki jisse jahañ ham hei huañ hamaar sewa kare waala bhi rahi. Aur hamaar Pita uske aadar kari jon hamaar sewa kare hei.

²⁷“Ab hamaar dil bahut dukhi hei, aur ham kaa bole sakta hei? Kaa ham i boli, ‘He Pita, hamme i ṭaaim se bachaay leo’? Nai, yahi kaaran to ham aaya hei, to hamme i dukh ke ṭaaim ke saamna kare ke paṛi.

²⁸He Pita, aapan naam ke mahima karaao!” Tab asmaan se awaaj aais, “Ham wahi naam ke mahima kara hei aur aage bhi karte rahega!”

²⁹Jon log huañ bagal meñ khaṛa rahin, u sunin aur bolin, ki baadar garjis hei, lekin aur log bolin, “Ek ainjal usse bolis hei!”

³⁰Ispe Yeeshu ulog se bolis, “I awaaj hamaar khaatir nai raha, lekin tum sab ke waaste raha.

³¹Ab sansaar ke nyaay kare ke ṭaaim aay gais hei, aur i dunia pe raaj kare waala saitaan ke nikaara jaai.

³²Aur jab ham jameen se uppar uṭhaawa jaayga tab ham sab ke aapan bagal kheechega.”

³³Yeeshu i baat bol ke ishaara kar dees raha ki uske maut keise hoi.

³⁴Bheeṛ Yeeshu se bolis, “Hamaar niyam ke buk i bataay hei ki Maseeha janam janam jee to tum keise bolta hei ki Manush ke laṛka ke uucha uṭhaawa jaai? I Manush ke laṛka kon hei?”

³⁵Yeeshu jawaab dees, “Ujera thoṛa deri aur tumhaar sañghe rahi. Jab tak ujera hei, tab tak chalte raho, eise nai ki añdhera tumme aay ke gher le. Jon añdhera meñ chale hei, u nai jaane ki u kahañ jaay hei.

³⁶Jab tak añjora tumhaar sañghe hei u añjora pe biswaas karo ki jisse tum añjora ke laṛkan bana raho.” I baat bole ke baad Yeeshu akele meñ jaay ke chhip gais.

³⁷Yeeshu ulog ke saamne bahut se chamatkaar karis raha, fir bhi ulog uspe biswaas nai karin.

³⁸Yahi kaaran ki jisse Aayzaaya nabi ke u sab baat puura hoi, “Prabhu, hamaar vachan pe kon biswaas karis? Prabhu ke sakti ke kon pahichaanis?”

³⁹Aur u sab Yeeshu pe biswaas nai kare sakin, kaahe ki Aayzaaya i bhi bolis raha,

⁴⁰“Parmeshwar uske aañkhi añdha kar dees raha aur u sab ke dil kaṛa kar dees raha, ki jisse u sab ke aañkhi dekhe nai sake, aur u sab ke dimaag samajhe nai sake, aur ulog Parmeshwar ke lage bhi nai aai, ki ulog ke achchha kare.”

⁴¹Aayzaaya i sab bolis, kaahe ki u apne aap Yeeshu ke mahima ke dekhis raha aur uske baare meñ bataais raha.

⁴²I bhi bhais ki bahut se Yahuudi adhikaari Yeeshu pe biswaas karin, lekin Farisi log ke kaaran ulog sab ke saamne uske apnaay nai sakin, kaahe ki kahiñ eise nai hoy ki u sab ke chech se nikaar dewa jaay.

⁴³Iske alaawa u agua log Parmeshwar ke aadar se jaada aapan baṛaai jaada pasand karat rahin.

⁴⁴Ek jordaar awaaj meñ Yeeshu bolis, “Jon ham pe biswaas kare hei, u khali ham pe nai, lekin uspe bhi biswaas kare hei jon hamme bhejis hei.

⁴⁵Aur jon bhi koi hamme dekhi, u uske bhi dekhi jon hamme bhejis hei.

⁴⁶Ham dunia meñ añjora ban ke aaya hei ki jon koi bhi ham pe biswaas kari, u añdhera meñ nai rahi.

⁴⁷Agar koi hamaar sandesa sune aur uske mutaabik nai chale to ham uske dos nai dega kaahe ki ham sansaar ke dos lagaay ke khaatir nai, lekin uske bachaay ke khaatir aaya hei.

⁴⁸Jon hamaar apmaan kare hei, aur hamaar vachan nai sune hei, uspe dos lagaay waala khali ek hei, jon vachan ham bola hei u aakhri roj uske dosi ṭhaharaai. ?

⁴⁹I sachchaai hei, kaahe ki ham aapan bagal se kuchh nai bola hei, lekin hamaar Pita jon hamme bhejis hei, hamme bataais hei ki ham kaa boli.

⁵⁰Aur ham i janta hei ki Pita ke hukum anant jeewan laay hei. Yahi kaaran jon bhi ham bolta hei uske jeise Pita ham se bolis hei, weisaiyeñ ham bolta hei.