Read Hindi, Fiji Yuhanna 14 Bible Online

Yuhanna 14 - Hindi, Fiji bible

Yuhanna 14

¹Yeeshu tab aapan sab chela log se bolis, “Dukhi nai ho aur ghabraao bhi nai. Parmeshwar pe bharosa rakkho aur ham pe bhi.”

²Hamaar Pita ke ghare bahut se rahe ke jagha hei. Agar nai hota to ham tum se bol deta. Ham tumhaar khaatir jagha taiyaar kare jaata hei.

³Jab ham huañ jaay ke tumhaar waaste jagha taiyaar kar lega, tab fir lauṭ ke aayga aur tum sab ke hiañ se aapan sañghe le jaayga, ki jisse jahañ ham rahega wahiñ tum bhi rahega.

⁴Tum u rasta janta hei jahañ ham jaata hei.”

⁵Tab Thomas Yeeshu se bolis, “Prabhu, ham to i bhi nai janta ki tum kahañ jaata hei! To ham rasta keise jaanega?”

⁶Yeeshu tab bolis, “Rasta, jeewan aur sachchaai hamahi hei! Hamaar bina koi bhi Pita ke lage nai jaay sake.

⁷Agar tum sab hamme janta hei, to hamaar Pita ke bhi janta. Lekin ab se tum sab Pita ke jaan lia hei kaahe ki tum sab uske dekha hei.”

⁸Filip tab bolis, “Prabhu, hamme Pita ke dekhaao, ham to khali yahi mañgta hei.”

⁹Tab Yeeshu jawaab dees, “Filip, ham ketna ṭaaim se tumhaar sañghe raha, fir bhi tum hamme nai janta? Jon bhi koi hamme dekhis hei, u Pita ke bhi dekhis hei, fir tum kaahe ke bolta hei, ‘Hamme Pita ke dekhaao’?

¹⁰Kaa tum sab biswaas nai karta ki ham Pita meñ hei aur Pita ham meñ hei? Tab u sab chela log se bolis, “Jon bhi kuchh ham tum se bolta hei u aapan bagal se nai bolta hei, lekin ham meñ rahe waala Pita, aapan sab kaam kare hei.

¹¹Hamaar biswaas karo ki ham Pita meñ hei aur Pita ham meñ. Agar nai to jon sab kaam ham karta hei wahi ke dekh ke tab biswaas karo.

¹²Ham tum se sachche bolta hei, hamaar biswaas kare waala u sab kaam kare saki jon ham karta hei, aur usse bhi baṛa kaam kare saki kaahe ki ham Pita ke lage jaata hei.

¹³Aur tum hamaar naam se jon kuchh bhi maañgega, ham uske puura karega, ki jisse laṛka ke bagal se Pita ke mahima hoi.

¹⁴Ham wahi karega, jon tum ham se kare ke bolega.”

¹⁵“Agar tum ham se prem karta hei, to jon ham bolta hei, u karo.

¹⁶Ham Pita se maañgega ki u tumhaar khaatir ek dusra madadgaar bheje, jon tumhaar sañghe hardam rahe saki.

¹⁷U Aatma hei, jon Parmeshwar ke baare meñ sachchaai bataay hei. Dunia uske nai apnaai kaahe ki u naa to uske dekhi, aur naa to uske jaani. Lekin tum to uske janta hei, kaahe ki u tumhaar sañghe rahe hei, aur tumhaar sañghe hee hardam rahi.”

¹⁸“Ham tumme anaath nai chhoṛega, ham tumhaar lage lauṭ aayga.

¹⁹Thoṛa deri meñ dunia hamme nai dekhi, lekin tum hamme dekhega, kaahe ki ham jinda hei aur tum bhi jinda rahega.

²⁰U din jab aai, tab tum jaanega ki ham aapan Pita meñ hei aur tum ham meñ hei, jeise ham tum meñ hei.”

²¹“Jon hamaar baat maane hei aur uspe chale hei, wahi ham se prem kare hei. Hamaar Pita wahi se prem kari, jon ham se prem kare hei, ham bhi wahi log se prem karega aur uske saamne aayga.”

²²Juḍas Iskariyoti nai lekin dusra Juḍas tab puuchhis, “Prabhu, i keise hei ki tum khali hamme dekhaayga lekin puura dunia ke nai dekhaayga?”

²³Yeeshu tab jawaab dees, “Jon koi ham se prem kare hei wahi hamaar baat pe chali. Hamaar Pita uske pyaar kari, aur ham aur hamaar Pita ulog ke lage aayga aur ulog ke sañghe rahega.

²⁴Jon ham se prem nai kare hei, u hamaar kaha nai maani. I sab baat jon tum sunta hei, hamaar nai hei lekin hamaar Pita ke hei jon hamme bhejis hei.

²⁵“Jab tak ham tumhaar sañghe hei, ham tum se i sab baat bolta hei.

²⁶Lekin jon madat kare waala Pawitr Aatma jiske hamaar Pita, hamaar naam se bheji, u tumme sab baat sikhaay dei, aur jon baat ham tumme bataaya hei, uske hardam yaad karaai.”

²⁷“Ham tumme saanti deta hei, aur i hamaar aapan saanti hei jon ham tumme deta hei. Ham u rakam ke saanti nai deta jon dunia tumme dei. Yahi kaaran ghabraao nai aur wari nai karo, aur ḍaro bhi nai.

²⁸Tum to sun lia hei ki ham tum se kaa bola hei, ‘Ham jaata hei, aur fir tumhaar lage aayga.’ Agar tum ham se prem karta hei, to khusi hoyga kaahe ki ham aapan Pita ke lage jaata hei, aur Pita ham se bahut baṛa hei.

²⁹I sab hoy se pahile ham tum se sab kuchh bataay dia hei, ki jisse jab i sab hoi, tab tum biswaas karega.

³⁰Ab ham bahut deri tak tum se baat nai kare sakta, kaahe ki dunia ke raaja, saitaan aay waala hei. U to hamaar kuchh nai bigaaṛe sake hei.

³¹Lekin dunia ke log ke jaane ke hei ki ham aapan Pita se prem karta hei, wahi kaaran ham wahi karta hei jon u hamme bataay hei. Aao, i jagha se chalo.”