Read Hindi, Fiji Yuhanna 15 Bible Online

Yuhanna 15 - Hindi, Fiji bible

Yuhanna 15

¹Yeeshu aapan chela log se bolis, “Sachcha ḍaar ham hei, aur hamaar Pita uske gaaḍna hei.

²Wahi hamaar u sab ḍaar ke kaaṭe hei jon fare nai hei, aur jon ḍaar fare hei uske chhaañṭ ke rakkhe hei, ki jisse usman aur far lage.

³Hamaar vachan se tum sab safa hoy gaya hei.

⁴Hamaar sañghe raho, aur ham tumhaar sañghe rahega. Ek ḍaar akele meñ nai fare hei, lekin jab u dusra ḍaari meñ juṛ jaay hei to fare hei. Yahi rakam jab tak tum hamaar meñ nai rahega, tab tak tum bhi nai fal laay sakega.”

⁵“Ham peṛ hei, aur tum sab uske ḍaar hei. Jon ham meñ rahe hei, aur ham usman, wahi jaada fari, kaahe ki tum hamaar bina kuchh nai kare sakta hei.

⁶Agar koi ham meñ nai rahe to u kaṭa ḍaar ke rakam feñk dewa jaai, aur suukhaay jaai, log u sab ke baṭor ke aagi meñ jhok de hei aur sab jar jaay hei.

⁷Agar tum ham se juṛa rahega aur hamaar vachan tum meñ bana rahi, tab tum jon kuchh bhi maañgega, u tumme mil jaai.

⁸Hamaar Pita ke mahima yahi meñ hei ki tum bahut se fal laao, tabahi tum hamaar chela bana rahega.

⁹Ham tumme weisaiyeñ pyaar karta hei jeise hamaar Pita ham se kare hei, hamaar prem meñ bañdha raho.

¹⁰Agar tum hamaar sab baat maanega, to hamaar prem meñ bana rahega, jeise ham aapan Pita ke sab baat ke maanta hei aur uske prem meñ bana rahta hei.”

¹¹“I sab baat ham tum se i kaaran bola hei ki hamaar khusi meñ tum bhi mila raho, aur tumhaar khusi puura hoy jaai.”

¹²Ab ham tumme bataata hei ki jeise ham tum se prem kara hei, weisaiyeñ tum bhi ek dusra se prem karo.

¹³Pyaar ke sab se baṛa sabuut wahi hei jon aapan dost ke waaste aapan jaan de de hei.

¹⁴Tum sab hamaar dost rahega, agar tum hamaar sab baat sunega aur uske maanega.

¹⁵Ham tumme naukar nai maanta kaahe ki ek naukar nai jaane hei ki uske maalik kaa kare hei. Ham tumme dost bolaata hei kaahe ki ham tumme u sab bataay dia jon ham aapan Pita se suna raha.

¹⁶Tum hamme nai chuna, lekin ham tumme chuna aur dunia meñ bheja ki jisse tum sab fal laao, eisan fal jon hardam rahe. Hamaar Pita tumme u sab dei jon tum hamaar naam se maañgega.

¹⁷Yahi hei jon ham tum se mañgta hei. Sab se prem karo.”

¹⁸“Agar dunia tum se jaran kare hei, to yaad rakkho u tum se pahile ham se jaran karis.

¹⁹Agar tum dunia ke hota, tab dunia tum se aapan rakam prem rakhta. Lekin ham tumme i dunia se chuna hei, yahi kaaran dunia tum se jaran kare hei.

²⁰Yaad rakhna ham tumme kaa bataaya hei, ‘Naukar aapan maalik se baṛa nai hei.’ Agar log hamme sataais hei, tab u tumme bhi sataai, agar u hamaar vachan maani to u tumhaar baat bhi maani.

²¹Ilog tumhaar sañghe wahi kari jon ilog hamaar sañghe karis hei kaahe ki tum sab hamaar hei, aur ulog hamaar bheje waala ke nai jaane hei.

²²Agar ham aay ke ulog se baat nai kara hota, to ulog ke paap nai lagta, lekin ab to ulog ke paap se bache ke koi rasta nai.

²³Jon koi ham se jaran kare hei u hamaar Pita se bhi jaran kare hei.

²⁴U sab paapi nai hota agar ham u sab ke beech meñ u kaam nai karta jon aur koi nai kare sakat raha, lekin ab to u sab dekh leen hei ki ham kaa kara raha, fir bhi ulog ham se aur hamaar Pita se jaran kare hei.

²⁵I sab i kaaran bhais ki uske niyam ke buk meñ likha hei ki i baat puura hoi, ‘Ulog ham se bekaar meñ jaran rakkhis.” ’

²⁶“Ham tumhaar lage ek madadgaar bhejega, jon Pita ke bagal se hoi, aur u tumme hamaar bagal se gawaahi dei.

²⁷Aur tum bhi hamaar baare meñ sab se bataayga, kaahe ki suru se tum hamaar sañghe raha hei.”