Read Hindi, Fiji Yuhanna 16 Bible Online

Yuhanna 16 - Hindi, Fiji bible

Yuhanna 16

¹“Ham tum se i sab bataata hei ki tumhaar biswaas kamti nai hoi.

²U log tumme aapan sabha meñ se nikaar dei, aur eisan ṭaaim bhi aai jab ulog tumme maar dei aur sochi ki eise kare se ulog Parmeshwar ke sewa kare hei.

³U log tumhaar sañghe i sab kari kaahe ke ulog naa to hamme jaane hei aur naa to Pita ke jaane hei.

⁴Lekin ham tumme i sab baat abhi bataata hei ki jab ṭaaim aai, ulog i sab kaam kari, tab tumme yaad aai ki ham kaa bola raha.

⁵Lekin ab ham lauṭ ke uske lage jaata hei jon hamme bhejis hei, aur tum meñ se koi bhi nai i puuchhis ki ham kahañ jaata hei.

⁶I baat sun ke tum bahut dukhi hei.

⁷Lekin ham tum se sachche bolta hei, ki i tumhaar khaatir achchha hoi ki ham chala jaai, kaahe ki agar ham nai jaayga to madadgaar tumhaar lage nai aai. Aur jeise ham jaayga, weise madadgaar tumhaar lage bhej dega.

⁸Aatma aay ke, dunia ke log ke paap, dharam, achchha, bura aur nyaay ke baare meñ samjhaai.

⁹Paap ke baare meñ dunia ke log nai jaane hei, kaahe ki ulog ham pe biswaas nai kare hei.

¹⁰I log i bhi nai jaane hei ki kaa sach hei aur kaa jhuuṭ, kaahe ki ham Pita ke lage jaata hei, aur tum fir hamme nai dekhega.

¹¹Nyaay ke baare meñ bhi ilog nai jaane hei, kaahe ki dunia ke agua ke nyaay mil gais hei.”

¹²“Hamme tum se aur bahut kuchh bataay ke hei, lekin tum uske abhi sahe nai sakega.

¹³Lekin jab Pawitr Aatma aai aur Parmeshwar ke baare meñ sachcha baat bataai, tab u sachchaai ke bagal sab ke le chali. U aapan bagal se kuchh nai boli, lekin wahi boli jon u sunis hei aur aage chal ke hoy waala hei.

¹⁴U hamme mahima dei, kaahe ki u hamaar sandesa tumme bataai.

¹⁵Jon bhi kuchh Pita ke hei u sab hamaar hei, yahi khaatir ham bola ki u hamaar baat tumme bataai.”

¹⁶“Thoṛa deri meñ tum hamme nai dekhega, lekin thoṛa deri ke baad fir se hamme dekhe sakega.”

¹⁷Uske kuchh chela log aapas meñ bole lagin, “Iske matlab kaa hei? U bole hei ki thoṛa deri ke baad ham uske nai dekhe sakega, aur fir thoṛa deri ke baad ham uske dekhe sakega, aur u i bhi bole hei, ki u Pita ke lage jaay hei.”

¹⁸‘I thoṛa deri’ ke matlab kaa hei? Ham nai samajhe sakta ki u kaa bole hei!”

¹⁹Yeeshu jaan gais ki ulog usse kuchh puuchhe maañge hei aur tab u bolis, “Ham bola raha, ‘Thoṛa deri meñ tum hamme nai dekhega, aur fir thoṛa deri ke baad tum hamme dekhe sakega.’ Kaa yahi tum aapas meñ puuchh taachh karta hei?

²⁰Ham tum se sachche bolta hei, tum sab royga aur soch karega lekin sab dunia khusi manaai, tum dukhi hoyga, lekin tumhaar dukh, sukh meñ badal jaai.

²¹Jab ek aurat bachcha ke janam dewe ke ṭaaim rahe hei, tab u bahut dukhi rahe hei, kaahe ke u peeṛa sahe ke ṭaaim hoy hei, lekin jab bachcha ke janam de de hei tab u sab dukh bhuul jaay hei, aur bachcha ke dunia meñ aay ke waaste khusi manaay hei.

²²Yahi abhi tumhaar sañghe hoy hei, tum abhi udaas hei, lekin ham tumme fir dekhega, to tumhaar man khusi se bhar jaai, eisan khusi jiske tum se koi chheene nai saki.”

²³“Jab u roj aai, tab tum ham se kuchh nai maañgega. Ham tum se sachche bataata hei, agar tum Pita se hamaar naam pe kuchh bhi maañgega, u tumme hamaar naam se de dei.

²⁴Abhi tak to tum hamaar naam se kuchh nai maañga, lekin ab maañgo to tumme mili, tab tumhaar khusi puura hoy jaai.”

²⁵“Ham tum se i sab bañdha baat meñ bola hei. Lekin jab ṭaaim aai tab ham sab khula baat meñ Pita ke baare meñ baat karega.

²⁶U roj jab aai, tum hamaar naam se usse maañgega, ham i nai bolta ki ham tumhaar khaatir maañgega.

²⁷Pita to apne tum se prem kare hei, kaahe ki tum ham se prem karta hei, aur i biswaas kara ki ham Parmeshwar ke bagal se aaya hei.

²⁸Ham Pita ke taraf se dunia meñ aay raha aur fir i dunia ke chhoṛ ke Pita ke lage jaata hei.”

²⁹Tab chela log Yeeshu se bolin, “Ab tum chhupa baat meñ nai lekin safa safa bolta hei.

³⁰Ham sab ab jaan gaya hei ki tum sab janta hei, ab i jaruurat nai ki koi tum se sawaal kare. Yahi hamme biswaas karaais hei ki tum Parmeshwar ke taraf se aaya hei.”

³¹Yeeshu ulog ke jawaab dees, “Kaa ab tum ham pe biswaas karta hei?

³²Ṭaaim aay hei, nai! nai! aay gais hei, jab tum sab chhitraay jaayga, aur tum sab ek ek karke aapan aapan ghare bhaag jaayga, aur ham akele rahe jaayga. Fir bhi ham akele nai hei, kaahe ki Pita hamaar sañghe hei.

³³Ham tumme i sab bataaya, ki jisse tum ham se saanti paao, kaahe ki tum ham se juṭa hei. Dunia tumme sataai. Lekin himmat rakkho! Ham dunia ke jeet lia hei!”