Read Hindi, Fiji Yuhanna 17 Bible Online

Yuhanna 17 - Hindi, Fiji bible

Yuhanna 17

¹I sab baat bole ke baad, Yeeshu asmaan ke bagal dekh ke bolis, “He Pita, u ṭaaim aay gais hei. Aapan laṛka ke mahima deo, ki jisse tumhaar laṛka tumhaar mahima dekhaay saki.

²Tumahi to uske sab ke uppar adhikaar dia hei, ki jisse u sab log ke anant jeewan dei, jon ke tum uske dia hei.

³Anant jeewan ke matlab hei ki ulog tumme, ek sachcha Parmeshwar jaani, aur Yeeshu Maseeh ke bhi jaani jon ke tum bheja hei.

⁴Jon kaam tum hamme kare ke waaste dia raha, uske ham puura karke i dharti pe tumhaar mahima kara hei.

⁵Aur ab, He Pita, tum aapan saamne hamaar mahima karaao, wahi mahima jon hamme tumhaar sañghe, dunia ke bane se pahile raha.”

⁶“Ham tumme u sab ke dekhaaya ki tum keisan hei, jon ke tum hamme i dunia meñ dia hei. U sab tumhaar rahin, aur tum ulog ke hamme dia. U log tumhaar vachan maanin.

⁷Aur ab ulog jaan gain hei ki jon sab tum hamme dia hei, sab tumhaar taraf se aais hei.

⁸Ham ulog ke wahi sandesa dia jon tum hamme dia raha, aur ulog sab maan ke biswaas bhi kar leen, ulog jaane hei ki yahi sachaai hei ki ham tumhaar taraf se aaya hei, aur i bhi biswaas kare hei ki tumahi hamme bheja hei.

⁹Ham dunia ke waaste nai lekin uske waaste jiske ham tumme dia hei, binti karta hei, kaahe ki u sab tumhaar hei.

¹⁰Aur jon kuchh bhi hamaar hei, u sab tumhaar bhi hei, aur jon tumhaar hei, u hamaar hei, aur yahi se hamaar mahima karis hei.

¹¹Ham i dunia ke chhoṛ ke tumhaar lage aata hei, aur aapan chela log ke yahi dunia meñ chhoṛta hei. He Pawitr Pita, tum jon naam dia hei wahi ke sakti se i sab ke dekh bhaal karna ki jisse i sab ek hoy ke rahe jeise ki tum aur ham ek hei.

¹²Jab tak ham uske sañghe raha, tumhaar naam ke sakti se ham i sab ke gaaḍ kara. Khali ek ke chhoṛ ke koi aur naas nai bhais ki jisse Baaibal meñ likha baat puura hoi.

¹³Ab ham tumhaar lage aata hei. Ham dunia meñ i sab baat bataata hei ki u sab hamaar khusi ke aapan man meñ puura bhar le aur samajh bhi le.

¹⁴Ham u sab ke tumhaar vachan sunaay dia hei, lekin dunia ke log usse jaran kare hei, kaahe ki u i dunia ke nai hei jeise ki ham i dunia ke nai hei.

¹⁵Ham i preya i khaatir nai karta ki tum u sab ke dunia se uṭhaay lo, lekin i kaaran ki tum ulog ke saitaan se bachaay ke rakhna.

¹⁶Jeise ham i dunia ke nai hei, weisaiyeñ u sab bhi i dunia ke nai hei.

¹⁷Sachchaai se u sab ke pawitr karo kaahe ki tumhaar vachan sachcha hei.

¹⁸Jeise tum hamme dunia meñ bheja wahi rakam ham bhi u sab ke dunia meñ bheja hei.

¹⁹Ham apne aap ke uske khaatir puura rakam se de dia hei, ki jisse u sab sachchaai se pawitr hoy jaay.

²⁰Ham khali u sab ke khaatir nai, lekin ulog ke khaatir preya karta hei jon sab uske vachan se ham pe biswaas kari.

²¹Hamaar binti hei, He Pita, u sab ek hoy jeise ham tum meñ hei aur tum ham meñ hei, wahi rakam u sab ham meñ bhi rahi, jisse dunia boli ki tumahi hamme bheja hei.

²²Jon mahima tum hamme dia hei, wahi ham u sab ke dia hei ki jisse jeise ham ek hei, u sab bhi ek hoy jaay.

²³Ham u sab meñ aur tum ham meñ hei ki jisse u sab puura rakam se ek hoy jaay, aur dunia jaane ki tum hamme bheja hei, aur jeise tum ham se prem kara hei, weise u sab se bhi prem kara hei.

²⁴He Pita, ham i mañgta hei ki jon ke tum hamme dia hei, u sab hamaar sañghe rahe ki jisse jahañ ham rahi wahiñ u sab bhi rahe, aur u mahima ke dekhe jon ke tum dunia ke bane se pahile hamme dia raha.

²⁵He Pawitr Pita, dunia to tumme nai jaanis, lekin ham to tumme jaana hei, aur ilog to i jaan gain hei ki tumahi hamme bheja hei.

²⁶Ham to tumhaar naam se i sab se bataay dia hei, aur bataate rahega ki jon pyaar tum hamme dia hei, u sab meñ hoi, aur ham bhi u sab meñ rahega.”