Read Hindi, Fiji Yuhanna 18 Bible Online

Yuhanna 18 - Hindi, Fiji bible

Yuhanna 18

¹Yeeshu preya kare ke baad aapan chela log ke sañghe Kidron valley ke paar gais. Huañ ek gaaḍan raha aur Yeeshu aapan chela log ke sañghe huañ gais.

²Uske pakaṛwaay waala Juḍas u jagha jaanat raha kaahe ke Yeeshu aapan chela log ke sañghe huañ hardam jaat raha.

³Juḍas bhi u gaaḍan meñ gais, aur uske sañghe Romi saulja, Baṛa Paadri aur Farisi log ke bagal se chech ke sardaar bhi gais. U log aapan sañghe batti, mashaal aur laṛe ke hatiaar bhi leke aain raha.

⁴Yeeshu to sab kuchh jaanat raha, ki kaa hoy waala hei. U aage baṛh ke puuchhis, “Tum kiske khojta hei?”

⁵U log jawaab deen, “Naasrat ke rahewaala Yeeshu ke.” Tab Yeeshu bolis, “U hamahi hei.” Uske pakaṛwaay waala Juḍas wahiñ sab ke sañghe khaṛa raha.

⁶Jeise Yeeshu bolis, “U hamahi hei”, sab log pichchhe haṭin aur maṭṭi pe gir paṛin.

⁷Yeeshu fir se puuchhis, “Tum log kis ke khojta hei?” U log fir jawaab deen, “Naasrat ke rahewaala Yeeshu ke.”

⁸Yeeshu jawaab dees, “Ham to tum se bol dia hei ki hamahi u hei. Aur agar tum sab hamme khojta hei to ilog ke jaay deo.”

⁹“Jisse uske bole waala vachan puura hoi. Tum jon ke hamme saupa hei ham usman se koi ke bhi naas nai hoy dega.”

¹⁰Saayman Peeṭa ke lage ek talwaar raha. U aapan talwaar nikaar ke Baṛa Paadri ke ek naukar ke raaiṭ kaan kaaṭ dees. U naukar ke naam Malkus raha.

¹¹Yeeshu, Peeṭa ke ḍaaṭis, “Talwaar bhittar rakkho. Kaa tum sochta hei ki ham u dukh ke pyaala nai piyega jon Pita hamme dees hei?”

¹²Tab Romi saulja aur uske admi Yeeshu ke pakaṛ ke baañdh deen.

¹³Aur u sab Yeeshu ke pakaṛ ke pahile to Annas ke lage le gain, jon u saal Baṛa Paadri Kaaifa ke sasur raha.

¹⁴I wahi Kaaifa raha jon Yahuudi log ke bataais raha ki sab ke bhalaai yahi meñ hei ki khali ekke admi maara jaay.

¹⁵Saayman Peeṭa aur ek aur chela Yeeshu ke pichchhe pichchhe gain. I chela Baṛa Paadri ke jaana pahichaana raha, aur u Yeeshu ke sañghe Baṛa Paadri ke añgna meñ gais.

¹⁶Peeṭa bahire duaari pe khaṛa hoy gais. U dusra chela jon Baṛa Paadri ke jaanat raha, bahire aay ke duaari pe khaṛi aurat se puuchh ke Peeṭa ke bhittar le gais.

¹⁷Duaari pe khaṛi aurat Peeṭa se puuchhis, “Kaa tum u admi ke chela to nai?” Peeṭa jawaab dees, “Nai. Ham nai hei.”

¹⁸Huañ bahut ṭhanḍa raha aur sab naukar aur sipaahi koyla ke aagi jaraay rakkhin raha, aur us ke chaaro bagal khaṛa hoy ke aagi taapat rahin. Peeṭa bhi u sab ke sañghe khaṛa hoy ke aagi taape laga.

¹⁹Tab Baṛa Paadri log Yeeshu se uske chela log aur uske updes ke baare meñ puuchhin.

²⁰Yeeshu jawaab dees, “Ham sab log se khula ruup meñ baat kara hei. Ham hardam sabha meñ aur chech meñ jahañ log baṭurat rahin huañ updes deta raha aur chhupaay ke to kuchh nai kara.

²¹Tab tum ham se kaahe ke puuchhta hei? Jon log hamaar baat sunin hei, wahi log se puuchho ki ham kaa bola hei. U sab jaane hei ki ulog se kon kon baat bola.

²²Yeeshu ke i baat pe, ek saulja jon uske bagal meñ khaṛa raha, Yeeshu ke ek thappaṛ maaris, aur bolis, “Tum purohit se i rakam baat karta hei?”

²³Yeeshu tab jawaab dees, “Agar ham kuchh ulṭa baat bola hei, to sab ke bataao ham kaa bola hei. Aur agar ham ṭheek bola hei to hamme fir kaahe ke maarta hei?”

²⁴Tab Annas, Yeeshu ke weisaiyeñ bañdha, Kaaifa Baṛa Paadri ke lage bhej dees.

²⁵Saayman Peeṭa khaṛa hoy ke aagi taapat raha, tab huañ ke log usse puuchhin, “Kahiñ tum bhi uske chela meñ se ek to nai hei?” Peeṭa muuṛ hilaay ke naa kar dees, “Ham nai hei.”

²⁶Baṛa Paadri ke naukar meñ se ek naukar jon u admi ke palwaar raha, jiske kaan Peeṭa kaaṭis raha, usse puuchhis, “Kaa ham gaaḍan meñ tumme uske sañghe nai dekha raha?”

²⁷Peeṭa ek dafe fir nai kar dees, aur wahi ṭaaim murga bolis.

²⁸Sabere hoy waala raha, aur Yeeshu ke Kaaifa ke lage se gavna ke jagha laawa gais. U log u jagha nai gain, kaahe ke u sab apne aap ke safa rakkhe maañgat rahin, ki jisse u sab fasah ke teohaar ke khaana khaay sake.

²⁹Paaylaṭ bahire nikar ke uske lage aais aur puuchhis, “I admi pe kaa dos hei?”

³⁰U log jawaab deen, “Agar i admi kharaab kaam nai kare hota, to ham iske aap ke haath meñ nai deta.”

³¹Tab Paaylaṭ ulog se bolis, “Tum log iske le jaao aur aapan kaanuun ke mutaabik iske saja deo.” Tab Yahuudi log usse bolis, “Koi ke maare ke hamaar lage hak nai hei.”

³²Ab eise bhais ki Yeeshu jon baat bolis raha, puura hoi. Aur i ek saain raha ki keise uske maut hoi.

³³Paaylaṭ fir bhittar chala gais. U Yeeshu ke bhittar bolaay ke bolis, “Kaa tum Yahuudi ke raaja hei?”

³⁴Tab Yeeshu bolis, “Kaa tum i baat apne aap bolta hei, ki aur sab log bhi hamaar baare meñ yahi bole hei?”

³⁵Paaylaṭ jawaab dees, “Kaa ham Yahuudi hei? Khud tumhaar admi log aur Baṛa Paadri log tumme hamaar haath meñ deen hei. Tum kaa galti kara raha?”

³⁶Yeeshu jawaab dees, “Hamaar raaj i dunia ke nai hei. Agar hamaar raaj i dunia ke rahta, to hamaar naukar hamaar bagal se laṛta aur ham Yahuudi agua log ke haath meñ nai paṛta, lekin hamaar raaj hiañ ke nai hei.”

³⁷Tab Paaylaṭ bolis, “To kaa tum raaja hei?” Ispe Yeeshu jawaab dees, “Tumahi to bolta hei ki ham raaja hei. Ham to yahi kaaran janam lia raha aur yahi kaaran dunia meñ aaya hei ki sachchaai ke baare meñ sab se bataai. Jon bhi koi sachchaai ke apnaay hei u hamaar baat sune hei.”

³⁸Tab Paaylaṭ puuchhis, “Sachchaai kaa hei?” Fir Paaylaṭ sab log ke lage jaay ke bolis, “Ham koi kaaran nai paata ki iske ham saja dei.”

³⁹“Lekin reeti riwaaj ke kaaran ham hardam fasah ke teohaar pe, ek keidi ke chhoṛ deta hei. Kaa tum sab i maañgo hei ki ham Yahuudi ke raaja ke chhoṛ dei?”

⁴⁰Sab log chillaay ke bolin, “Nai, uske nai! Ham Baarabba ke mañgta hei.” (Baarabba ek chor raha.)