Read Hindi, Fiji Yuhanna 19 Bible Online

Yuhanna 19 - Hindi, Fiji bible

Yuhanna 19

¹Tab Paaylaṭ hukum dees ki Yeeshu ke chaabuk lagaawa jaay.

²Saulja log kaaṭa ke ek taaj banaain, aur Yeeshu ke muuṛ pe rakh deen, aur tab uske pepal rang ke kapṛa pahinaain.

³Tab saulja aay ke Yeeshu se bolin, “Yahuudi ke raaja, jeete raho!” Aur aage jaay ke uske thappaṛ maarin.

⁴Ek dafe fir Paaylaṭ bahire aay ke bolis, “Dekho ham iske bahire laata hei aur tum apne dekhna ki ham isman koi dos nai paaya hei, ki iske saja dei.”

⁵Tab Yeeshu bahire aais, u kaaṭa ke taaj aur pepal rang ke kapṛa pahine raha. Tab Paaylaṭ ulog se bolis, “Dekho! yahi hei u admi!”

⁶Jab Baṛa Paadri aur chech ke saulja Yeeshu ke dekhin to chillaay uṭhin, “Uske kros pe chaṛhaao! Kros pe chaṛhaao!” Paaylaṭ fir se bolis, “Tumahi iske le jaao aur kros pe chaṛhaao. Ham isman kuchh dos nai dekha.”

⁷Tab bheeṛ jawaab dees, “Ham log ke kaanuun bataay hei ki iske maare ke chaahi, kaahe ki i apne aap ke Parmeshwar ke laṛka bataay hei.”

⁸Jab Paaylaṭ i baat sunis to aur ghabraay gais.

⁹U bhittar lauṭ ke gay aur Yeeshu se puuchhis, “Tum kahañ ke rahe waala hei?” Lekin Yeeshu jawaab nai dees.

¹⁰Tab Paaylaṭ Yeeshu se bolis, “Tum ham se kaahe nai baat karta hei? Kaa tum i nai janta ki ham tumme chhoṛ de sakta hei? Aur kros pe bhi chaṛhwaay sakta hei?”

¹¹Yeeshu tab jawaab dees, “Agar Parmeshwar tumme hak nai deta, to tum hamme kuchh nai kare sakta. Lekin jon hamme tumhaar haath saupis hei u to aur bhi baṛa paap karis hei.”

¹²Tab Paaylaṭ, Yeeshu ke chhoṛe maañgat raha. Lekin bheeṛ aur jor se chillaain, “Agar tum iske chhoṛa to tum Raaja ke dusman hoy jaayga! Jon koi bhi apne aap ke raaja bole hei u Raaja ke dusman hei.”

¹³Jab Paaylaṭ i baat sunis to Yeeshu ke bahire laais. Tab u ek jagha (chabutra) pe, jon ke Heebru meñ ‘Gabattha’ bola jaay hei huañ nyaay kare waala jagha pe beiṭhis.

¹⁴U roj fasah ke taiyaari ke roj raha, aur Paaylaṭ sab se bolis, “Dekho, aapan raaja ke dekho!”

¹⁵“Maar ḍaalo! Maar ḍaalo!” u sab chillaay ke bolin, “Kros pe laṭkaay deo!” Tab Paaylaṭ u sab se bolis, “Kaa ham tumhaar raaja ke kros pe chaṛhaai?” Baṛa Paadri log jawaab deen, “Raaja Keisar ke chhoṛ ke hamaar koi aur raaja nai hei!”

¹⁶Tab Paaylaṭ, Yeeshu ke kros pe chaṛhaay ke khaatir ulog ke haath meñ de dees. Tab u sab Yeeshu ke aapan adhikaar meñ le leen.

¹⁷Yeeshu aapan kros u jagha le gais jahañ ke naam ‘Khopṛi ke jagha’ bola jaay hei. (Heebru meñ i jagha ke ‘Gulgutha’ bola jaay hei).

¹⁸Huañ pe ulog Yeeshu ke kros pe chaṛhaain, aur uske duuno bagal dui aur chor ke bhi laṭkaay deen.

¹⁹Paaylaṭ ek noṭis likhwaay ke kros pe lagwaay dees. Uspe likhaan raha, “Naasrat ke rahe waala, Yahuudi ke raaja.”

²⁰Bahut log i noṭis ke paṛhin kaahe ki suuchna Heebru, Leṭin aur Greek meñ likhaan raha. Aur jon jagha Yeeshu ke kros pe chaṛhaaya gais raha, u jagha ṭaaun ke nagichche raha, aur bahut se Yahuudi iske paṛhin.

²¹Baṛa Paadri log Paaylaṭ se jaay ke bolin, “Kaahe ke tum ‘Yahuudi ke raaja’ likha? I likho, ‘I apne aap bolis hei ki i Yahuudi ke raaja hei.” ’

²²Tab Paaylaṭ u sab se bolis, “Jon kuchh bhi likhaan hei badla nai jaai!”

²³Jab saulja log Yeeshu ke kros pe chaṛhaay deen, tab uske kapṛa ke chaar hissa meñ baaṭ deen, chaaro saulja ke waaste. Lekin uske uppar waala kapṛa khali ek kapṛa ke bana raha, aur usman koi siyan nai raha.

²⁴Saulja apne meñ baat karin, “Iske faaṛo nai. Iske daaoñ lagaay ke dekho ki kiske mile hei.” I sab i kaaran bhais ki jon kuchh bhi Baaibal meñ likhaan raha, u sachche hoy ke raha, “Ulog hamaar kapṛa ke baaṭi aur wahi kapṛa ke waaste jua kheli.” Tab saulja log wahi karin, jon ke baare meñ baat cheet kare rahin.

²⁵Yeeshu ke amma wahiñ kros ke bagal meñ khaṛi rahi. Uske sañghe uske bahini Meri, aur Clopas ke amma, aur Meri Magdalini bhi khaṛi rahin.

²⁶Jab Yeeshu aapan amma ke, aur aapan sab se pyaara chela ke dekhis jon uske bagal meñ khaṛa raha, tab u aapan amma se bolis, “Ab se i admi tumhaar beṭa hei.”

²⁷Tab u aapan chela se bolis, “Ab se i tumhaar amma hei.” Wahi ṭaaim se u chela uske aapan ghare le gais.

²⁸Yeeshu jaanat raha ki ab uske kaam khalaas hoy gais hei. Aur jon likhaan raha uske puura kare ke waaste, bolis, “Ham pyaasa hei!”

²⁹Huañ pe sasta waain raha. Log waain meñ spanj bhijaay ke, ek peṛ ke ḍaari se uske muh ke lage le gais.

³⁰Jab Yeeshu waain pee lees tab bolis, “Puura hoy gais!” Tab u aapan muuṛ nichche kar lees aur mar gais.

³¹Dusra roj sabat aur fasah ke teohaar ke din raha. I Yahuudi log ke ek khaas din raha. Yahuudi agua log nai maañgat rahin ki murda kros pe sabat ke roj laṭka rahe, aur Paaylaṭ se maañg karin ki duuno chor ke goṛ tuuṛ dewa jaay aur kros se nichche utaar dewa jaay.

³²Sab se pahile saulja log u duuno chor ke goṛ tuuṛ deen, jon huañ kros pe laṭkin raha.

³³Lekin jab ulog Yeeshu ke lage aain, to dekhin ki u to mar gais hei, aur uske goṛ nai tuuṛin.

³⁴Ek saulja, Yeeshu ke bagal meñ spia bhokis, aur khuun aur paani nikre laga.

³⁵Ham janta hei ki i sachche hei, kaahe ke i baat u bataais raha jon huañ pe raha. Ab tum bhi biswaas karo.

³⁶I sab i kaaran bhais hei ki Baaibal sachche hoy, jon bole hei, “Uske deñhi ke ek bhi haḍḍi nai ṭuuṭi”

³⁷Aur, “U log uske dekhi jiske bagal meñ spia se bhoka jaai.”

³⁸Josaf, jon Armathia se aais raha, Yeeshu ke ek chela raha. I baat u chhupaay ke rakkhis raha, kaahe ki u Yahuudi agua se ḍarat raha. Lekin ab u Paaylaṭ se puuchhis, ki u Yeeshu ke boḍi le lei. Paaylaṭ uske haañ kar dees, aur Josaf Yeeshu ke boḍi kros pe se utaar lees.

³⁹Nikoḍimas bhi aais, u aapan sañghe lagbhag tees (30) kilo gandhras aur peṛ patti se bana achchha mahke waala masaala le ke aais. I wahi Nikoḍimas raha jon ek raat ke Yeeshu ke lage aais raha.

⁴⁰Duuno admi Yeeshu ke boḍi ke le ke Yahuudi rasam ke mutaabik uske deñhi meñ mahke waala tel lagaay ke aur kafan meñ lapeṭ deen.

⁴¹Jahañ pe Yeeshu ke kros pe chaṛhaawa gais raha, huañ pe ek gaaḍan raha, u gaaḍan meñ ek kabar raha, jon abhi tak kaam meñ nai laawa gais raha.

⁴²Dusra din sabat ke din raha, aur Yahuudi log yahi taiyaari meñ lage rahin. Yahi kaaran raha ki ulog jaldi se Yeeshu ke u nagichche waala kabar meñ rakh deen.