Read Hindi, Fiji Yuhanna 2 Bible Online

Yuhanna 2 - Hindi, Fiji bible

Yuhanna 2

¹Teen din ke baad Kaana ṭaaun jon Galeel meñ hei, huañ ek saadi raha. Yeeshu ke amma bhi huañ rahi.

²Yeeshu aur uske chela log ke bhi u saadi ke neota milis raha.

³Jab sab waain khalaas hoy gais, tab Yeeshu ke amma usse bolis, “Uske lage aur waain nai hei.”

⁴Yeeshu bolis, “Tum hamme nai bataao ki hamme kaa kare ke hei. Hamaar ṭaaim abhi nai aais hei.”

⁵Meri tab naukar se bolis, “Wahi karo jon i bataay hei.”

⁶Neota meñ chhe (6) baṛa baṛa patthar ke bartan raha, huañ ke log usman se paani nikaar ke apne aap ke safa karat rahin. I huañ ke reeti riwaaj raha. Ek ek bartan meñ lagbhag ek sao leeṭa paani bhara jaay sakat raha.

⁷Tab Yeeshu ek naukar se bolis, “I sab bartan meñ paani bharo.” U sab usman muh tak paani bhar deen.

⁸Tab Yeeshu fir bolis, “Ab isman se kuchh paani nikaar ke u admi ke lage le jaao, jon i sab ke dekh bhaal kare hei.” Naukar wahi karis jon Yeeshu usse bolis raha.

⁹Jab dekhbhaal karewaala admi uske cheekhis tab u paani waain meñ badal gais raha. U nai jaanat raha ki u waain kahañ se aais hei. Lekin u naukar, to jaanat raha.

¹⁰Tab u dulha ke bolaay ke bolis, “Sab koi pahile achchha waain de hei, aur jab pahuna log jaada pee le hei tab uske saadhaaran waain dewa jaay hei. Lekin tum to abhi tak achchha waain rakha hei!”

¹¹Yahi Yeeshu ke pahila chamatkaar raha jon Galeel ke Kaana ṭaaun meñ suru karis raha, aur aapan mahima dekhaais aur uske chela log uspe biswaas karin.

¹²Iske baad, Yeeshu aur uske amma, aur bhaiya aur chela log Kafarnahuum ṭaaun chala gais aur huañ kuchh din rahin.

¹³Yahuudi log ke fasah ke teohaar aay waala raha, aur Yeeshu Yarushalam chala gais.

¹⁴Huañ u dekhis ki chech meñ kuchh log chaua aur kabuttar beche hei, aur ṭaibal pe peisa badli kare waala log bhi beiṭhin hei.

¹⁵Tab Yeeshu ek rassi ke chaabuk banaais aur sab log ke bheṛa aur beil ke sañghe chech ke bahire kar dees. Aur jon peisa badli kare waala log rahin uske bhi ṭaibal ulṭaay dees aur sab peisa idhar udhar chhitraay dees.

¹⁶Tab Yeeshu jon kabuttar bechat rahin, usse bolis, “I sab ke hiañ se le jaao! Hamaar Pita ke ghar ke khareed been ke jagha nai banaao.”

¹⁷Tab uske chela log ke yaad aais ki Baaibal meñ likha raha, “Hamaar bhakti aur prem tumhaar ghar ke waaste, He Prabhu, ham meñ aagi ke rakam bare hei.”

¹⁸Yahuudi agua log Yeeshu se ek sawaal karin, “Kon se chamatkaar tum hamme dekhaayga, ki ham biswaas kari ki tumme i kaam kare ke hak hei?”

¹⁹“I chech ke ujaaṛ deo, aur ham teen roj meñ iske fir se banaay dega.”

²⁰Agua log jawaab deen, “Kaa tum iske teen roj meñ banaay dega? Hamme to i chech ke banaay meñ forṭi siks (46) saal laga raha.”

²¹Lekin jon chech ke baat Yeeshu karat raha, u uske deñhi raha.

²²Aur jab Yeeshu mar ke jinda hoy gais, tab uske chela log ke yaad aais ki u kaa bolat raha. Aur tab u sab Baaibal aur usman kaa likha hei, uspe biswaas karin.

²³Jab Yeeshu Yarushalam meñ fasah ke teohaar ke ṭaaim raha tab bahut se log uspe biswaas karin, kaahe ki ulog dekhin ki Yeeshu ketna chamatkaar karis raha.

²⁴Lekin Yeeshu jaanat raha ki u sab ke dil meñ kaa hei, aur u sab pe bharosa nai karis.

²⁵I jaruurat nai raha ki koi Yeeshu ke u sab ke baare meñ bataay, kaahe ki u apne aap sab ke dil ke baat jaanat raha.