Read Hindi, Fiji Yuhanna 20 Bible Online

Yuhanna 20 - Hindi, Fiji bible

Yuhanna 20

¹Etwaar ke sabere jab thoṛa añdhera raha, tab Meri Magdalini kabar ke lage gais aur dekhis ki huañ kabar ke muh se patthar haṭa hei.

²I dekh ke u dauṛ ke Saayman Peeṭa aur dusra chela log ke lage gais aur bolis, “Ulog Prabhu ke, kabar meñ se le ke chala gain hei! Ham nai janta ki uske kahañ rakkhin hei.”

³Peeṭa aur dusra chela log kabar pe gain.

⁴U dauṛin, lekin u jon dusra chela raha, u Peeṭa se jor dauṛ ke kabar pe pahile pahuñch gais.

⁵U kabar meñ jhaañk ke dekhis ki kafan ke kapṛa wahi paṛa hei, lekin u kabar ke bhittar nai gais.

⁶Jab Saayman Peeṭa huañ pahuñchis, tab u seedha kabar ke bhittar chala gais aur huañ kafan ke kapṛa gira paais.

⁷U i bhi dekhis ki jon kapṛa Yeeshu ke muuṛ pe bañdha raha, thoṛa duur pe alag lapṭaan rakha raha.

⁸Jon chela sab se pahile huañ pahuñchis raha, u bhittar jaay ke dekhis aur biswaas karis.

⁹U ṭaaim Peeṭa aur baaki chela log ke i nai pata raha ki Baaibal meñ likhaan raha ki Yeeshu fir se jinda hoy jaai.

¹⁰Tab u duuno dusra chela log ke lage ghare chala gain.

¹¹Meri kabar ke bahire khaṛi rowat rahi. Rote rote u kabar meñ jhaañkis.

¹²Huañ pe u dekhis ki jahañ pahile Yeeshu ke boḍi rakha raha, wahiñ pe dui ainjals ujjar kapṛa pahine beiṭhin raha, ek muuṛ ke bagal aur dusra goṛ ke bagal.

¹³"He aurat, tum kaahe roti hei?” U duuno usse puuchhin. Meri jawaab dees, “Ulog hamaar Prabhu ke uṭhaay le gain hei! Aur ham nai janta ki uske kahañ rakkhin hei.”

¹⁴Jeise Meri i baat bol ke pichchhe ghuumis to dekhis ki Yeeshu huañ pe khaṛa hei. Lekin Meri nai jaan paais ki u Yeeshu hei.

¹⁵Yeeshu usse puuchhis, “Tum kaahe roti hei? Tum kiske khojti hei?” U sochis u gaaḍna hei aur bolis, “Agar tum uske kahiñ le gaya hei to hamme bataao, ham jaay ke uske leke aayga.”

¹⁶Tab Yeeshu usse bolis, “Meri!” Meri uske bagal ghuum ke Aramik meñ bolis, “Rabbuni!” (Iske matlab hei, ‘Hamaar guru.)

¹⁷Yeeshu usse bataais, “Hamme nai pakṛo, kaahe ki ham abhi tak Pita ke ghare nai jaay paaya hei. Lekin hamaar chela log se jaay ke bol dena ki ham u sab ke Pita aur hamaar Pita, aur aapan Prabhu aur u sab ke Parmeshwar ke lage jaata hei.”

¹⁸Meri Magdalini jaay ke sab chela log ke bataais ki u Prabhu ke dekhis hei aur baat bhi karis hei. U bhi bataais jon Prabhu ulog se bataay ke waaste bolis raha.

¹⁹Wahi etwaar ke sanjha ke ṭaaim jab chela log, Yahuudi agua log se ḍar ke maare palla band kar ke ghar ke bhittar beiṭha rahin, tab Yeeshu aay ke ulog ke saamne khaṛa hoy gais. U bolis, “Tumme shaanti mile!”

²⁰I bol ke Yeeshu aapan haath aur saaiḍ dekhaais. Sab chela log Yeeshu ke dekh ke khusi hoy gain.

²¹Tab Yeeshu usse fir bolis, “Jeise Pita hamme bhejis hei, weise ham bhi tumme bhejta hei.”

²²I bol ke Yeeshu ulog ke uppar fuuñkis aur bolis, “Pawitr Aatma leo!

²³Jiske paap ke tum maaf karega, u sab ke maafi mili. Agar tum uske maaf nai karega, to ulog ke maafi nai mili.”

²⁴Thomas jiske Didumas bhi bola jaat raha, baarah chela log meñ se ek raha, lekin jab Yeeshu ulog ke saamne aais raha tab u huañ nai raha.

²⁵Aur ulog usse bataain, “Ham sab Prabhu ke dekha hei!” Lekin Thomas bolis, “Jab tak ham uske haath meñ neela ke cheenha aur saaiḍ nai dekh leta aur u jagha pe aapan uñgri nai ḍaar leta tab tak ham biswaas nai karega.”

²⁶Ek hapta ke baad jab Yeeshu ke chela log ghar meñ rahin, aur Thomas bhi huañ raha, aur palla bhi band raha, tab achaanak Yeeshu u sab ke beech meñ khaṛa hoy ke bolis, “Tumme saanti mile!”

²⁷Tab u Thomas se bolis, “Aapan uñgri se hamaar haath chhuo. Aur aapan haath hamaar saaiḍ meñ ḍaaro! Ḍaauṭ nai karo, aur biswaas karo!”

²⁸Thomas jawaab dees, “Hamaar Prabhu! Hamaar Parmeshwar!”

²⁹Yeeshu bolis, “Thomas, tum hamme dekh ke biswaas kara hei. Ulog dhann hei jon hamme bina dekhe ham pe puura bharosa rakkhe hei, aur biswaas kare hei!”

³⁰Yeeshu aur bahut se achambha waala kaam aapan chela log ke saamne karis raha, jiske baare meñ i buk meñ nai likha hei.

³¹Lekin jon kuchh bhi likhaan hei, u i kaaran likha hei ki tum biswaas karo ki Yeeshu Parmeshwar ke laṛka Maseeh hei aur tum sab biswaas karke uske naam se sachcha laaif paao.