Read Hindi, Fiji Yuhanna 21 Bible Online

Yuhanna 21 - Hindi, Fiji bible

Yuhanna 21

¹Is ke baad Yeeshu ek dafe fir Tibiriyaas laik ke kinaare aapan chela log ke saamne aais. I sab eise bhais.

²Saayman Peeṭa, Thomas jiske naam Didumas bhi raha, Natanyel jon Galeel ke Kaana ṭaaun ke rahe waala raha, Jabdi ke duuno laṛkan, aur dui aur chela, sab ek jagha pe baṭure rahin.

³Saayman Peeṭa bolis, “Ham machhri maare jaata hei!” Aur log bolin, “Ham bhi tumhaar sañghe chalega.” Sab aapan bauṭ meñ beiṭh ke chal paṛin. Lekin u raat ulog ek bhi machhri nai pakṛin.

⁴Sabere hote jab Yeeshu laik ke kinaare aay ke khaṛa bhais, tab chela log uske nai pahichaanin.

⁵Yeeshu u sab se puuchhis, “Kuchh machhri pakṛa ki nai?” “Nai,” ulog bolin.

⁶Tab Yeeshu u sab se bolis, “Aapan jaal bauṭ ke raaiṭ saaiḍ meñ ḍaaro, aur tab tumme machhri mili.” Ulog wahiñ jaal ḍaar deen, aur jaal meñ etna ḍher machhri aay gais ki ulog jaal kheeche nai sakin.

⁷Yeeshu ke ek pyaara chela Peeṭa se bolis, “I to Prabhu hei!” Jab Peeṭa sunis ki u Prabhu hei, tab u aapan kapṛa pahin lees jon utaaris raha, aur paani meñ kuud gais.

⁸Bauṭ khali ek sao meeṭa kinaare se duur raha. Aur dusra chela log machhri se bhara jaal kheech ke kinaare laain.

⁹Jab sab chela log laik ke kinaare aain, to dekhin ki koyla ke aagi pe machhri aur roṭi rakhaan hei.

¹⁰Yeeshu aapan chela log se bolis, “Jon machhri tum pakṛa hei, usman se kuchh hiañ laao.”

¹¹Saayman Peeṭa, bauṭ meñ lauṭ gais aur jaal ke ghaseeṭ ke kinaare laais. Usman ek sao aur tirpan (153) baṛa baṛa machhri raha. Etna jaada machhri jaal meñ raha, fir bhi jaal nai faṭa.

¹²Yeeshu bolis, “Aao aur khaana khaao!” Chela log meñ se koi ke bhi himmat nai raha ki usse puuchhe ki u kon hei. Ulog to jaan gain raha ki u Prabhu hei.

¹³Tab Yeeshu ulog ke aapan haath se kuchh roṭi aur machhri dees.

¹⁴I tisra dafe raha jab ke Yeeshu fir se jinda hoy ke baad aapan chela log ke saamne aais raha.

¹⁵Jab Yeeshu aur uske chela log khaana khaay leen, tab u Saayman Peeṭa se puuchhis, “Saayman, Yuhanna ke laṛka, kaa tum hamme i sab log se jaada pyaar karta hei?” Saayman Peeṭa bolis, “Haañ Prabhu, tum to janta hei ham tum se ketna pyaar karta hei!” “Hamaar bheṛa ke bachcha ke dekh bhaal karna,” Yeeshu usse bolis.

¹⁶Tab Yeeshu fir se dusra dafe puuchhis, “Saayman, Yuhanna ke laṛka, kaa tum ham se prem karta hei?” Peeṭa bolis, “Haañ Prabhu, tum to janta hei ki ham tumme ketna pyaar karta hei!” “Hamaar bheṛa ke dekh bhaal karna,” Yeeshu usse bolis.

¹⁷Tab Yeeshu tisra dafe fir puuchhis, “Saayman, Yuhanna ke laṛka, kaa tum ham se prem karta hei?” Peeṭa dukhi bhais, kaahe ki Yeeshu usse teen dafe puuchhis ki u usse prem kare hei ki nai. U bolis, “Prabhu, tum to sab kuchh janta hei. Tum to i bhi janta hei ki ham tum se ketna prem rakhta hei.” “Achchha to hamaar bheṛa ke khaana dena,” Yeeshu usse bolis.

¹⁸“Ham tum se sachche bolta hei, ki jab tum jawaan raha, tab kamar baañdh ke jahañ maañgat raha huañ jaat raha, lekin jab tum buḍḍha hoy jaayga, tab aapan haath feilaayga, tab dusra tumhaar kamar pe peṭi baañdhi aur tum jahañ nai maañgega, huañ tumme le jaai.”

¹⁹Yeeshu i baat i kaaran bolis raha, ki jisse sab jaan jaay ki Peeṭa kon rakam se mari aur Parmeshwar ke khaatir mahima laai. Tab u Peeṭa se bolis, “Hamaar pichchhe aao!”

²⁰Peeṭa ghuumis aur dekhis ki Yeeshu ke pyaara chela uske pichchhe aay hei. I wahi raha jon khaana khaaay ke ṭaaim Yeeshu ke bagal meñ beiṭha raha aur puuchhis raha, “Prabhu tumme kon pakaṛwaai?”

²¹Jab Peeṭa uske dekhis tab Yeeshu se puuchhis, “Prabhu, iske kaa hoi?”

²²Tab Yeeshu jawaab dees, “Isse tumme kaa, agar ham maañgi to u hamaar lauṭe tak jinda rahi? Tum hamaar pichchhe aao.”

²³Chela log ke beech i baat feil gais, ki u chela kabhi nai mari. Lekin Yeeshu i to nai bolis raha ki u kabhi nai mari. U to khali bolis raha, “Isse tumme kaa, agar ham chaahi to u hamaar lauṭe tak jinda rahi.”

²⁴I wahi chela hei, jon i sab ke gawaahi dees raha. Wahi i sab likhis raha, aur ham janta hei ki u sachche bole hei.

²⁵Yeeshu aur bahut kaam karis raha. Agar u sab ek ek kar ke likha jaay, to ham samajhta hei ki, jon buk meñ likha jaata u i dunia meñ nai aṭta.