Read Hindi, Fiji Yuhanna 3 Bible Online

Yuhanna 3 - Hindi, Fiji bible

Yuhanna 3

¹Huañ ek Yahuudi ke sardaar Nikoḍimas naam ke admi raha, aur u Farisi dal ke raha.

²Ek raat u Yeeshu ke lage aais aur usse bolis, “Guru, ham janta hei ki Ishwar tumme bhejis hei ki tum aay ke hamme sikhaao. Agar Ishwar tumhaar sañghe nai rahta to jon chamatkaar tum hamme dekhaaya hei, nai dekhaay sakta.”

³Tab Yeeshu jawaab dees, “Ham tum se sachche bolta hei, jab tak koi admi nawa janam nai le le, tab tak u Parmeshwar ke raaj nai dekhe saki!”

⁴Nikoḍimas fir se puuchhis, “Keise ek baṛa admi fir se peida hoy sake hei? Kaa u aapan amma ke peṭ meñ fir se jaay ke dusra dafe peida hoy sake hei?”

⁵Tab Yeeshu jawaab dees, “Ham tum se sachche bolta hei, jab tak ek admi paani aur Aatma se janam nai le, tab tak u Parmeshwar ke raaj meñ nai jaay sake.

⁶Ek admi aapan amma bappa ke deñhi se laaif paay hei, lekin aatmik jeewan to khali Aatma se paay hei.

⁷Ghabraana nai jab ham tumme bataayga ki tumme fir se janam le ke hei.

⁸Khali Parmeshwar ke Aatma nawa jeewan de sake hei. Aatma u hawa ke rakam hei jon jab maañge chale hei. Tum khali hawa ke awaaj sune sakta hei, lekin tum nai janta ki u kahañ se aay hei, aur kahañ jaay hei.”

⁹“I keise hoy sake hei?” Nikoḍimas puuchhis.

¹⁰Tab fir Yeeshu jawaab dees, “Keise tum Israayeli log ke guru hoy ke bhi i baat nai samjha?

¹¹Ham tum se sachche bolta hei, ham sab wahi bolega jon ham dekha hei aur janta hei. Lekin jon ham bolta hei, tum hamaar u baat nai maanega.

¹²Jab ham tum se dunia ke baat karta hei to tum ham pe biswaas nai karta, to agar ham swarag ke baat karega to kaa tum ham pe biswaas karega?

¹³Khali manush ke laṛka ke chhoṛ ke koi bhi admi swarag pe nai gais, jon fir se huañ se nichche utar aais hei.

¹⁴Jeise Maozas jañgal meñ ek nakli saañp ke uppar chaṛhaais raha, weisaiyeñ i bhi jaruuri hei ki Manush ke laṛka ke bhi uppar chaṛhaawa jaay,

¹⁵ki jisse jon koi bhi uspe biswaas kari u anant jeewan paai.

¹⁶Parmeshwar dunia ke log se etna pyaar karis ki aapan eklauta laṛka ke dunia meñ bhejis, ki jon koi bhi uspe biswaas kari, u naas nai hoi lekin anant jeewan paai.

¹⁷Ishwar aapan beṭa ke dunia meñ i kaaran nai bhejis ki u dunia ke saja de. Uske bhejis hei ki u dunia ke bachaay!

¹⁸Jon koi bhi Ishwar ke beṭa pe biswaas kare hei, u naas nai hoi, lekin jon uspe biswaas nai kare hei to uske satyanaas hoy jaai, kaahe ki ulog Ishwar ke eklauta beṭa pe biswaas nai karin.

¹⁹Roshni dunia meñ aay gais hei, aur jon koi bhi kharaab kaam kari uske saja mili, kaahe ki ulog añjora se jaada añdhera se pyaar kare hei.

²⁰Jon bhi koi kharaab kaam kare hei, u añjora se haiṭ kare hei, aur roshni ke lage nai aay hei, kaahe ki añjora meñ u sab ke kharaab kaam dekhaay jaay.

²¹Lekin jon seedha rasta pe chale hei, u jyoti ke saamne aay hei ki jisse sab log i dekhe saki ki Ishwar ke marji ke mutaabik kaam kare hei.

²²Iske baad Yeeshu aur uske chela log Juḍia meñ aais, aur huañ uske sañghe kuchh din rahe ke, log ke baptisma det raha.

²³Yuhanna bhi Salim ke nagichche Aenon meñ baptisma det raha, kaahe ki huañ ḍher paani raha, aur log aay ke usse baptisma let rahin.

²⁴Yuhanna ke abhi tak jel meñ nai rakha gay raha.

²⁵Wahiñ pe Yuhanna ke chela log se aur ek Yahuudi se sudh hoy ke baare meñ jhagṛa bhais.

²⁶U log Yuhanna ke lage jaay ke bolin, “He Guru, u jon admi Joḍan nadi ke eesṭ meñ tumhaar sañghe raha, aur uske baare meñ tum ham se bola raha, u ab baptisma dewe hei, aur sab log wahi ke paas jaay hei.”

²⁷Yuhanna jawaab dees,

²⁸“Tumme yaad hoi ham bataay raha ki ham Maseeha nai hei. Ham to khali usse pahile bheja gaya hei.

²⁹Saadi meñ dulha hei jiske saadi hoy hei. Dulha ke dost to uske awaaj sunke khusi hoy hei. Yahi kaaran ham bhi bahut khusi hei.

³⁰Ab bahut jaruuri hei ki Yeeshu baṛa hoy aur ham chhoṭa bani.”

³¹Jon swarag se aay hei u bahut mahaan hoy hei. Aur jon koi bhi dunia se aay hei, dharti ke hee rahe hei, aur khali duniadaari ke baat kare hei. Lekin jon swarag se aay hei u sab se achchha hei.

³²Jon kuchh bhi u dekhis aur sunis hei, wahi bataais hei, lekin fir bhi koi uspe biswaas nai karin.

³³Lekin jon koi bhi uspe biswaas kare hei, u jaane hei ki Ishwar sachcha hei.

³⁴Ishwar aapan beṭa bhejis ki u uske sandesa sab ke sunaay, aur u uske Pawitr Aatma se bhar dees hei.

³⁵Pita aapan beṭa se bahut pyaar kare hei, aur sab hak uske haath meñ de dees hei.

³⁶Jon koi beṭa pe biswaas kare hei, anant jeewan uske mile hei. Lekin jon beṭa ke nai maane hei, u anant jeewan nai paai aur Parmeshwar usse hardam gussa meñ rahi.”