Read Hindi, Fiji Yuhanna 4 Bible Online

Yuhanna 4 - Hindi, Fiji bible

Yuhanna 4

¹Yeeshu jaanat raha ki Farisi log sun leen hei ki u Yuhanna se jaada log ke jeet ke baptisma de hei, aur ulog uske pichchhe chale lagin hei.

²Yeeshu apne aap baptisma nai det raha, lekin uske chela log det rahin.

³Yeeshu Juḍia chhoṛ ke Galeel ke bagal jaay laga.

⁴I dafe uske Samaaria se hoy ke jaay ke raha.

⁵Rasta meñ uske Sukhaar ṭaaun mila. Uske nagichche meñ u jameen raha, jon Jaykab bahut din pahile aapan laṛka Josaf ke dees raha.

⁶Jaykab ke kuaañ bhi wahiñ raha. Chalte chalte lagbhag baarah baje ke ṭaaim jab Yeeshu thak gais raha, to u wahi kuaañ ke bagal meñ beiṭh gais. Aur Yeeshu ke chela log ṭaaun khaana khareede chala gain.

⁷Wahi ṭaaim ek Saamri aurat kuaañ pe paani bhare aais.

⁸Yeeshu usse bolis, “Kaa tum hamme paani piyaay sakti hei?”

⁹Saamri aurat Yeeshu se bolis, “Tum ek Yahuudi hei aur ham ek Saamri aurat. Tum keise ham se paani mañgta hei jab ki Yahuudi aur Saamri ek dusra se kuchh sambandh nai rakkhe hei?”

¹⁰Yeeshu jawaab dees, “Tum nai jaanti ki Ishwar tumme kaa de maañge hei, aur tum i bhi nai jaanti ki tum se kon paani maañge hei. Agar tum jaanti, to ham se jeewan jal maañgti.”

¹¹“E guru,” u aurat bolis, “Tumhaar paas to paani bhare ke waaste kuchh bhi nai hei, aur kuaañ bhi bahut gahira hei. Tum kahañ se jeewan jal laayga?

¹²Tum hamaar bappa Jaykab se to baṛa nai hei, jon hamaar waaste i kuaañ khodis raha ki jisse uske palwaar aur jaanwar isman se paani piye saki?”

¹³Tab Yeeshu uske jawaab dees, “Jon koi i paani pee u fir se pyaasa hoy jaai.

¹⁴Lekin jon koi bhi i paani pee jon ham deta hei, u kabhi pyaasa nai hoi. Jon paani ham dega u ek sota ke rakam hei jon anant jeewan ke waaste hardam nikarte rahi.”

¹⁵U aurat fir se bolis, “E Prabhu, hamme u paani deo ki jisse ham kabhi pyaasa nai rahi aur hiañ kabhi paani bhare ke waaste nai aai.”

¹⁶Yeeshu tab bolis, “Jaao, aapan admi ke le aao.”

¹⁷“Hamaar lage admi nai hei,” u aurat bolis. “Tum sachche bolti hei,” Yeeshu bolis, “tumhaar admi nai hei.

¹⁸Abhi tak tum paañch ke sañghe saadi kari, aur abhi jon tumhaar sañghe hei u tumhaar admi nai hei.”

¹⁹U aurat bolis, “Ab ham samajh gaya ki tum koi nabi hei

²⁰Hamaar baap daada yahi pahaaṛ pe Parmeshwar ke weship karin, lekin tum bolta hei ki Yarushalam hee u jagha hei jahañ weship kare ke chaahi.”

²¹Tab Yeeshu usse bolis, “E aurat, ham pe biswaas karo, ṭaaim aay hei jab tum log naa to i pahaaṛ pe aur naa to Yarushalam meñ Pita ke weship karega.

²²Tum Saamri log nai janta ki tum sab kiske weship karta hei. Aur ham Yahuudi u Parmeshwar ke janta hei jiske ham weship karta hei, kaahe ki Parmeshwar ham Yahuudi ke jariye dunia ke bachaai.

²³Lekin u ṭaaim aay waala hei, yaane ki aay gais hei jab sachcha weship kare waala log Pita ke weship, aatma aur sachchaai se kari, kaahe ki Pita aapan weship ke khaatir eisane log ke khojis hei.

²⁴Parmeshwar Aatma hei, aur i jaruuri hei ki u sab weship kare waala Aatma aur sachchaai se weship kare.”

²⁵U aurat tab bolis, “Ham sab janta hei ki Maseeha aay waala hei. Wahi hei jiske ham Krisṭ bolega. Jab u aai tab hamme sab samjhaai.”

²⁶“Ham wahi hei,” Yeeshu bolis, “aur ham abhi tum se baat karta hei.”

²⁷Wahi ṭaaim sab chela log lauṭ aain, aur i dekh ke achambha kare lagin ki Yeeshu u aurat se baat kare hei. Lekin koi bhi i nai puuchhis ki, “Tum usse kaahe ke baat karta hei?”

²⁸Tab u aurat aapan bartan wahiñ chhoṛ ke ṭaaun ke bagal bhaagis, aur sab log se bataay lagi,

²⁹“Aao aur dekho, u admi ke dekho, u sab jaane hei jon ham abhi tak kara hei, aur hamme sab bataay dees hei! Kahiñ yahi Maseeh to nai?”

³⁰Ṭaaun ke sab log Yeeshu ke dekhe ke waaste uske lage chal deen.

³¹Jab tak i sab hot raha, Yeeshu ke chela log usse binti karat rahin, “Guru ji, kuchh khaay leo.”

³²Lekin Yeeshu u sab se bataais, “Hamaar lage eisan khaana hei jiske baare meñ tum sab nai janta.”

³³Tab sab chela log aapas meñ baat kare lagin, “Kaa koi iske khaay ke waaste kuchh laais hei?”

³⁴Yeeshu tab fir se bolis, “Hamaar khaana yahi hei jon Parmeshwar chaahe hei! Wahi hamme bhejis hei, aur hamme u kaam puura kare ke hei jon u hamme kare ke bhejis hei.

³⁵Tum saait bolega ki kaṭni ke abhi chaar mahina aur baaki hei. Lekin ham tum se bataata hei, aañkhi uṭhaay ke dekho ki sab khet meñ anaaj kaṭe ke khaatir taiyaar hei.

³⁶Aur jon log kaaṭe hei uske majduuri mile hei, aur anant jeewan ke khaatir fal baṭore hei. Tab jon koi bhi bowe hei aur jon koi kaaṭe hei duuno milke khusi manaai.

³⁷Iske waaste i kahaawat achchha hei. “Bowe koi aur kaaṭe koi aur.”

³⁸Ham tumme u khet meñ kaaṭe ke waaste bhejta hei, jahañ dusra sab mehnat karin.

³⁹U ṭaaun ke bahut Saamri log Yeeshu pe biswaas kare lagin, kaahe ki u aurat bole rahi, “I admi hamme sab bataay dees jon kaam ham kare raha.”

⁴⁰U log aay ke Yeeshu se binti kare lagin ki u uske sañghe ruke, aur u uske sañghe dui roj aur rukis.

⁴¹Yeeshu ke parchaar sunke bahut se Saamri Yeeshu pe biswaas karin.

⁴²U log u Saamri aurat se bolin, “Ab ham log khali tumhaar bole pe Yeeshu pe biswaas nai karta hei. Ab to ham khud sun lia hei, aur samajh lia hei ki wahi dunia ke bachaay aais hei!”

⁴³Yeeshu bolis raha, “Aapan des meñ nabi ke aadar nai hoy hei.” Fir dui roj huañ rahe ke baad u Galeel chala gais.

⁴⁴

⁴⁵Huañ ke log uske welkam karin, kaahe ki ulog teohaar meñ dekh leen raha ki Yeeshu kon kon kaam huañ karis raha.

⁴⁶Jab Yeeshu Galeel meñ raha, to u Kaana ṭaaun gais jahañ u paani ke waain meñ badlis raha. Huañ ek sarkaari naukar mila jiske laṛka Kafarnahuum meñ bimaar raha.

⁴⁷Aur jab u admi sunis ki Yeeshu, Juḍia meñ hei, to uske lage jaay ke chirauri karis ki u jaay ke uske laṛka ke mare se bachaay.

⁴⁸Yeeshu, u kaam kare waala se bolis, “Jab tak tum achambha ke kaam aur chamatkaar nai dekhega, tab tak tum biswaas nai karega!”

⁴⁹U admi fir se bolis, “Prabhu ji, aay ke hamaar laṛka ke mare se bachaay lo!”

⁵⁰Tab Yeeshu bolis, “Tumhaar laṛka nai mari. Jaao, ghare jaao, uske lage.” Yeeshu pe biswaas karke u admi ghare jaay laga.

⁵¹Rasta meñ uske naukar usse milin aur bataain, “Tumhaar laṛka ab bilkul ṭheek hei!”

⁵²U usse puuchhis ki kon ṭaaim laṛka achchha bhais? U log bolin, “Lagbhag ek baje uske bukhaar utar gais raha.”

⁵³Laṛka ke bappa ke yaad aais ki wahi ṭaaim Yeeshu bolis raha, “Tumhaar laṛka jee!” Aur tab se u admi aur uske palwaar Yeeshu pe biswaas kare lagin.

⁵⁴Yahi dusra chamatkaar raha jon Yeeshu, Juḍia se lauṭ ke Galeel meñ karis raha.