Read Hindi, Fiji Yuhanna 6 Bible Online

Yuhanna 6 - Hindi, Fiji bible

Yuhanna 6

¹Iske baad Yeeshu, Galeel ke kunḍ jon Tabariyaas ke kunḍ ke naam se jaana jaay hei, uske u paar chala gais.

²Ek baṛa bheeṛ jon dekhis raha ki chamatkaar se keise u bimaar ke achchha kare hei, uske pichchhe hoy leen.

³Pahaaṛ pe chaṛh ke Yeeshu aapan chela log ke saathe beiṭh gais.

⁴Yahuudi log ke fasah ke teohaar nagichche raha.

⁵Jab Yeeshu dekhis ki ek baṛa bheeṛ uske lage aay hei, tab u Filip se bolis, “Hamme kahañ se etna khaana mili ki ham i sab log ke khawaay sakega?”

⁶Yeeshu khali uske ajmaay ke waaste eise bolis raha, kaahe ke u to jaanat raha ki uske kaa kare ke hei.

⁷Filip tab jawaab dees, “Sab ke khaatir thoṛa thoṛa baaṭe ke waaste, dui sao ḍola se kahiñ jaada ke to khali roṭi khareede ke paṛi.”

⁸Yeeshu ke ek chela, Enḍru jon Saayman Peeṭa ke bhaiya raha, bolis,

⁹“Hiañ ek laṛka hei jiske lage paañch roṭi aur dui machhri hei, lekin isse etna log ke waaste kaa hoi?”

¹⁰“Sab ke laain meñ beiṭhaao,” Yeeshu usse bolis. Huañ pe bahut graas raha. Kul milaay ke kuchh paañch hajaar log rahin. U sab laain meñ graas pe beiṭh gain.

¹¹Tab Yeeshu aapan haath meñ roṭi le ke, Ishwar ke dhanbaad de ke jon sab laain meñ beiṭha rahin uske baaṭ dees. Wahi rakam machhri ke bhi karis, aur jetna ulog maañgat rahin, otna sab ke dees.

¹²Sab log jetna khaay sakat rahin, otna khaain, aur Yeeshu aapan chela log se bolis, “Jetna ṭukṛa hei, sab baṭor leo, ki jisse kuchh barbaad nai hoy.”

¹³Chela log baarah baaskeṭ meñ, u paañch roṭi ke bacha ṭukṛa se bhar leen.

¹⁴Yeeshu ke i chakit kaam dekh ke sab log bole lagin, “Yahi to u nabi hei, jon ke dunia meñ aay ke raha!”

¹⁵Yeeshu jaanat raha ki yahi log uske pakaṛ ke raaja banaai. Tab u pahaaṛ pe chala gais jahañ u akele rahe saki.

¹⁶Sanjha ke ṭaaim, Yeeshu ke chela log kunḍ ke kinaare gain.

¹⁷U sab bauṭ meñ beiṭh ke kunḍ ke dusra paar Kafarnahuum ṭaaun ke taraf chal paṛin. Raat bhi hoy gais aur Yeeshu abhi tak ulog ke lage nai aais raha.

¹⁸Aur jor hawa chale lagis jisse baṛa baṛa halkora uṭhe lagis.

¹⁹Jab ulog kareeban teen ya chaar kilomeeṭa bauṭ chalaay leen, tab dekhin ki Yeeshu paani pe chal ke ulog ke lage aay hei. Jeise jeise u nagichche aate gais, chela log ḍar gain.

²⁰Lekin Yeeshu ulog se bolis, “Ham Yeeshu hei! Ḍaro nai!”

²¹Chela log Yeeshu ke bauṭ meñ beiṭhaay waala rahin ki kinaara aay gais.

²²Jon log kunḍ ke eesṭ ke bagal rahe gain raha i jaanat rahin ki huañ khali ekke bauṭ raha. Aur ulog i bhi jaanat rahin ki Yeeshu aapan chela log ke saathe nai gais raha.

²³Tabriyaas se kuchh bauṭ huañ aais jahañ Prabhu, dhanbaad de ke baad paañch hajaar log ke khaana khawaais raha.

²⁴U log dekhin ki Yeeshu aur uske chela huañ se chala gain hei. Tab ulog bauṭ meñ beiṭh ke Yeeshu ke khoje ke waaste Kafarnahuum gain.

²⁵U log Yeeshu ke kunḍ ke wesṭ meñ paain aur puuchhin, “Guru ji, tum hiañ kab aaya?”

²⁶Yeeshu bolis, “Ham sachche bolta hei, tum hamme i kaaran nai khojta hei ki tum hamme chakit kaam karte dekha hei, lekin i kaaran khojta hei ki tum jetna mañgta raha otna khaaya.

²⁷Kharaab hoy waala khaana ke khaatir mehnat nai karo, lekin weisan khaana ke khaatir mehnat karo jon hardam rahe, aur u tumme khali Manush ke laṛka dei, kaahe ke Pita yaane Parmeshwar uspe aapan adhikaar dees hei.”

²⁸U log puuchhis, “Parmeshwar kaa maañge hei ki ham uske khaatir kari?”

²⁹Yeeshu jawaab dees, “Parmeshwar maañge hei ki tum uspe biswaas karo jiske u bhejis hei.”

³⁰U sab jawaab deen, “Tab tum kaa chakit kaam karega ki ham biswaas kari? Tum kaa karega?

³¹Jeise ki hamaar baap daada to jañgal meñ mana khaais raha, aur Baaibal meñ likha hei ki ulog ke swarag se roṭi khaay ke khaatir mila raha.”

³²Tab Yeeshu u sab ke bataais, “Ham tum se sachche bolta hei ki tumme swarag ke roṭi Maozas nai dees raha. Hamaar Pita jon swarag meñ hei wahi tumme sachcha swarag ke roṭi de hei.

³³U Parmeshwar ke roṭi hei jon swarag se utar ke nichche dunia meñ aay ke jeewan de hei.”

³⁴Ulog tab bolin, “Prabhu, hamme hardam wahi roṭi dena!”

³⁵Yeeshu jawaab dees, “Jeewan ke roṭi ham hei! Jon koi bhi hamaar lage aay hei, u kabhi bhuuka nai rahi. Jon koi bhi ham pe biswaas kare hei, u pyaasa nai rahi.

³⁶Ham tum se bol dia hei ki tum dekh ke bhi ham pe biswaas nai karta.

³⁷Jon koi ke bhi aur jon bhi cheej hamaar Pita hamme dees hei, u hamaar lage aai, aur ham uske kabhi duur nai karega.

³⁸Kaahe ke ham aapan waaste nai lekin jon hamme bhejis hei uske ichchha puura kare ke waaste swarag se aaya hei.

³⁹Aur jon hamme bhejis hei u maañge hei ki jiske u bhejis hei u sab kabhi heraay nai. Uske badle meñ u maañge hei ki aakhri roj ham u sab ke fir se jinda kar dei.

⁴⁰Hamaar Pita ke i ichchha hei ki jon koi bhi laṛka ke dekh ke aur uspe biswaas kari, u anant jeewan paai aur ham uske aakhri roj jinda kar dega.

⁴¹Sab log bhunbhunaay lagin kaahe ke Yeeshu bolis raha ki wahi u roṭi hei jon swarag se aais hei.

⁴²Ulog ek dusra se puuchhe lagin, “Kaa i Josaf ke laṛka Yeeshu nai hei? Kaa ham iske amma bappa ke nai janta? I keise bole hei ki i swarag se aais hei?”

⁴³Yeeshu tab u sab se bolis, “Bhunbhunaao nai!

⁴⁴Koi bhi hamaar paas nai aay sake, jab tak hamaar Pita jon hamme bhejis hei, nai maañgi. Agar ulog aai, to ham ulog ke aakhri roj jinda karega.

⁴⁵Ek nabi likhis raha, 'Prabhu sab ke sikhaai.’ Yahi khaatir jon koi Pita ke sune hei aur usse seekhe hei aur wahi log hamaar lage aai.

⁴⁶Pita ke bagal se jon aais hei khali wahi Pita ke dekhis hei. Uske chhoṛ ke koi aur Pita ke nai dekhis hei.

⁴⁷Ham tum se sachche bolta hei ki jon koi ham pe biswaas kare hei wahi ke anant jeewan mili.

⁴⁸Ham jeewan ke roṭi hei!

⁴⁹Tumhaar baap daada jañgal meñ mana khaay ke mar gain.

⁵⁰Lekin i u roṭi hei jon swarag se utris hei, ki jisse jon koi bhi khaai u kabhi nai mari.

⁵¹Hamahi u jeewan ke roṭi hei jon swarag se utris hei! Jon koi bhi i roṭi khaai u sab roj jinda rahi. Aur jon roṭi jeewan ke khaatir ham dunia ke log ke dega, u hamaar deñhi hei.”

⁵²Ispe Yahuudi log aapas meñ baad biwaad karin aur puuchhin, “I keise aapan deñhi hamme khaay ke waaste dei?”

⁵³Yeeshu jawaab dees, “Ham tum se sachche bolta hei, jab tak tum Manush ke laṛka ke deñhi nai khaayga aur uske khuun nai piyega, tum nai jiyega.

⁵⁴Agar tum hamaar deñhi khaayga aur hamaar khuun piyega, to tumme anant jeewan mili, aur ham tumme aakhri roj jiyaay dega.

⁵⁵Hamaar deñhi asli khaana hei, aur hamaar khuun asli piye ke cheej hei.

⁵⁶Agar tum hamaar deñhi khaayga aur hamaar khuun piyega, tum ham meñ rahega aur ham tum meñ rahega.

⁵⁷Jeise jeewit Pita hamme bhejis hei, aur ham Pita ke kaaran jinda hei, weisaiyeñ jon hamaar deñhi khaay hei, u hamaar kaaran jinda rahi.

⁵⁸Jon roṭi swarag se utris hei weisan nai hei jon tumhaar baap daada khaain hei. Ulog to mar gain hei, lekin jon koi i roṭi khaai u hardam jinda rahi.”

⁵⁹I sab baat Yeeshu Kafarnahuum ke ek chech meñ updes dete ṭaaim bolis raha.

⁶⁰Uske kaafi chela log i baat sunin aur usse puuchhin, “I to bahut kaṛa baat hei, iske kon suni?”

⁶¹Yeeshu jaanat raha ki uske chela log bhunbhunaay hei. Tab u puuchhis, “Etna chhoṭa baat ke kaaran tumhaar biswaas hil gais hei?

⁶²U ṭaaim kaa hoi jab tum sab dekhega ki Manush ke laṛka uppar swarag jaay hei jahañ se u aais hei?

⁶³Aatma hee jeewan dees hei! Manush ke taakat kuchh nai kare sake. Jon baat ham tum se bataaya hei, u jeewan de waala Aatma se aais hei.

⁶⁴Fir bhi tum meñ se ketna ham pe biswaas nai kare maañge hei.” Yeeshu i sab baat bolis kaahe ke u suru se jaanat raha ki kon kon uspe biswaas kare hei. U i bhi jaanat raha ki uske kon pakaṛwaai.

⁶⁵Tab Yeeshu bolis, “Tum hamaar lage nai aay sakta, jab tak Pita nai chaahi. Yahi khaatir ham i sab baat tum sab se bataaya hei.”

⁶⁶Yahi sab baat ke kaaran bahut se chela log uske saath chhoṛ deen.

⁶⁷Tab Yeeshu aapan baarah chela log se puuchhis, “Aur tum sab? Kaa tum bhi hamme chhoṛe mañgta hei?”

⁶⁸Saayman Peeṭa jawaab dees, “Prabhu, ham kiske lage jaai? Anant jeewan ke baat to khali tumhaar lage hei.

⁶⁹Ham tum pe biswaas karta hei, aur i bhi jaan lia hei ki tumahi Parmeshwar ke pawitr jan hei.”

⁷⁰Tab Yeeshu aapan chela log se bolis, “Ham, tum baarah log ke chuna, lekin tum meñ se ek saitaan hei!”

⁷¹Yeeshu to Saayman Iskariyoti ke putr Juḍas ke baare meñ bolis raha jon u baarah chela meñ se ek raha. Wahi aage chal ke Yeeshu ke pakaṛwaai.