Read Hindi, Fiji Yuhanna 7 Bible Online

Yuhanna 7 - Hindi, Fiji bible

Yuhanna 7

¹Iske baad Yeeshu Galeel gais. U Juḍia nai jaay maañgat raha, kaahe ke huañ pe Yahuudi agua log uske maare ke waaste rasta khojat rahin.

²U ṭaaim Yahuudi log ke poch banaay waala teohaar nagichche raha.

³Aur Yeeshu ke bhaiya log usse bolin, “Tum kaahe nai Juḍia chala jaata hei? Tab tumhaar chela log bhi dekhe saki ki tum kaa karta hei.

⁴Kaahe ki jon koi bhi naami bane maañge hei, to u luk ke kaam nai kari. Yahi khaatir dunia ke janaao ki tum kaa karta hei!”

⁵Abhi tak Yeeshu ke bhaiya bhi uspe biswaas nai karat rahin.

⁶Yeeshu jawaab dees, “Hamaar ṭaaim abhi nai aais hei, lekin tumhaar ṭaaim to hardam ek rakam rahe hei.

⁷Sansaar ke log tumme haiṭ nai kari. Lekin wahi log ham se dusmani rakkhe hei kaahe ke ham uske bataay deta hei ki ulog kharaab kaam kare hei.

⁸Tum sab teohaar meñ jaao. Hamaar ṭaaim abhi nai aais hei, aur ham nai jaayga.”

⁹I sab bol ke Yeeshu wahiñ Galeel meñ ruk gais.

¹⁰Jab Yeeshu ke sab bhaiya teohaar meñ chala gais, tab u bhi chuppe se huañ gais.

¹¹Teohaar ke ṭaaim Yahuudi agua log Yeeshu ke khojat rahin, aur sab se puuchhat rahin, “U kahañ hei?”

¹²Aur sab koi chuppe chuppe Yeeshu ke baare meñ baat kare lagin, kuchh to bolat rahin, “Yeeshu achchha admi hei,” aur kuchh bolat rahin, “U sab ke kharaab rasta dekhaay hei.”

¹³Lekin Yahuudi agua ke ḍar ke maare koi Yeeshu ke baare meñ khul ke nai bolat rahin.

¹⁴Jab teohaar aadha khalaas hoy gais raha, tab Yeeshu chech meñ gais aur updes de laga.

¹⁵Uske updes sunke Yahuudi agua log chakit hoy gain, aur bolin, “Iske gyaan kahañ se mila? I to kabhi skuul bhi nai gais hei!”

¹⁶Yeeshu jawaab dees, “Jon updes ham deta hei, u hamaar bagal se nai hei, lekin jon hamme bhejis hei uske bagal se hei.

¹⁷Agar koi sachche ke uske ichchha puura kare maañge hei to u jaan lei ki ham jon kuchh bhi sikhaata hei u Parmeshwar ke bagal se aay hei, hamaar bagal se nai.

¹⁸Agar ham aapan baṛaai mañgta, to ham aapan bagal se bolta. Lekin ham aapan bheje waala ke baṛaai mañgta hei, yahi khaatir ham sachche bolta hei jhuuṭ nai.

¹⁹Kaa Maozas Parmeshwar ke kaanuun tumme nai dees? Fir bhi tum sab uske nai maanta hei! Tab kaahe ke tum sab hamme maare mañgta hei?”

²⁰Tab sab log jawaab deen, “Tum pagla hei! Tumme keise pata hei ki koi tumme maare maañge hei?”

²¹Yeeshu bolis, “Jab ham ek chamatkaar dekhaaya, tab tum chakit hoy gaya.

²²Yahi kaaran Maozas khatna ke aagya dees raha. U Maozas ke bagal se nai raha lekin tumhaar baap daada se chala aais hei. Tum to sabat ke din bhi laṛka log ke khatna karta hei.

²³Jab sabat ke roj laṛka log ke khatna kare ke, Maozas ke kaanuun ke mutaabik achchha hei to ham se kaahe ke gussa hei ki sabat ke roj ham ek admi ke achchha kara.

²⁴Muh dekh ke nyaay nai karo, lekin raaiṭ rakam se nyaay karo.”

²⁵I baat pe Yarushalam ke kuchh log bolin, “Kaa i wahi admi nai jiske sab log maare maañgat rahin?

²⁶Dekho i sab se baat kare hei, fir bhi iske koi kuchh nai bole hei. Kaa eise to nai ki hamaar agua log iske sachcha maan leen hei ki yahi Maseeh hei?

²⁷Lekin i keise hoy sake hei? Iske to ham janta hei ki i kahañ ke hei, lekin jab Maseeh aai to koi nai jaani ki u kahañ ke hei.”

²⁸Yeeshu chech meñ updes de ke ṭaaim chillaay ke bolis, “Kaa tum sachche ke janta hei ki ham kahañ se aaya hei? Ham apne aap nai aaya! Jon hamme bhejis hei u sachcha hei, aur tum uske nai janta.

²⁹Lekin ham janta hei ki hamme kon bhejis hei, kaahe ke ham uske bagal se aaya hei.”

³⁰Ispe kuchh log Yeeshu ke wahi ṭaaim pakṛe maañgat rahin. Lekin koi bhi uspe haath nai lagaais, kaahe ke abhi uske ṭaaim nai aais raha.

³¹Ulog meñ se bahut log rahin jon Yeeshu pe biswaas karat rahin, aur bolin, “Jab Maseeh aai, to kaa i admi se jaada chamatkaar dekhaai!”

³²Jab Farisi log sunin ki Yeeshu ke baare meñ log kaa bole hei, to u sab Baṛa Paadri ke sañghe milke chech ke pulis ke bhejis ki Yeeshu ke pakaṛ le.

³³Lekin Yeeshu usse bolis, “Ham to tumhaar sañghe thoṛa deri aur rahega, aur tab ham huañ chala jaayga jahañ hamaar bheje waala hei.

³⁴Tum hamme khojega lekin nai paayga. Tum huañ nai jaay sakta jahañ ham jaata hei.”

³⁵Yahuudi agua log ek dusra se puuchhe lagin, “I kahañ jaay hei jahañ ham iske nai paayga? Kaa i koi duur des jaay hei jahañ hamaar log rahe hei? Kaa i Greek log ke bhi updes dei?

³⁶I bole hei ki ham iske khojega, lekin khoj nai paayga, iske matlab kaa hei? Kaahe nai ham huañ jaay sakta hei jahañ i jaay hei?”

³⁷Teohaar ke aakhri aur khaas roj Yeeshu khaṛa hoy ke chillaay ke bolis, “Agar tum pyaasa hei, to hamaar paas aao aur pio!

³⁸Jeise ki Baaibal meñ likha hei, jon ham pe biswaas kari, uske bhittar se jeewan ke paani bahi.”

³⁹I vachan u Pawitr Aatma ke baare meñ bolis, jon ki khali biswaas kare waala ke mili. Aatma abhi koi ke bhi nai mila, kaahe ke Yeeshu ke abhi puura mahima nai mila hei.

⁴⁰Jab bheeṛ sunis ki Yeeshu kaa bole hei, to usman se kuchh bolin, “I to nabi hoy sake hei!”

⁴¹Dusra log bolin, “I to Maseeha hei!” Kuchh aur log bolin, “Kaa Maseeha Galeel se aay sake hei?”

⁴²Baaibal bole hei ki Maseeha, Raaja Ḍeiviḍ ke palwaar se aai. Kaa iske matlab i nai hoy hei ki uske janam Bethlaham gaaoñ meñ hoi jahañ Ḍeiviḍ rahe hei?”

⁴³Yeeshu ke kaaran huañ ke log meñ dusmani hoy gais.

⁴⁴Kuchh admi uske pakṛwaay maañgat rahin, lekin uske haath nai lagaay sakin.

⁴⁵Jab chech ke pulis, baṛa paadri aur Farisi log ke lage lauṭ aain, tab usse puuchha gais, “Tum kaahe Yeeshu ke nai laaya?”

⁴⁶Ulog bolin, “Koi bhi abhi tak u admi ke rakam baat nai karis!”

⁴⁷Farisi log usse bolin, “Kaa tum bhi pagla hoy gaya hei?

⁴⁸Koi bhi adhikaari ya Farisi uspe kabhi biswaas nai karis.

⁴⁹Aur ilog jon kaanuun nai jaane, uspe Parmeshwar ke saraap hei.”

⁵⁰Nikoḍimas bhi u ṭaaim huañ raha. U huañ ke ek adhikaari raha, aur ek dafe pahile Yeeshu ke lage aais raha.

⁵¹U bolis, “Hamaar kaanuun ke mutaabik ham koi admi ke saja nai de sakta jab tak ham uske baat nai sun lei aur i jaan lei ki u kaa karis raha.”

⁵²Tab u sab bolin, “Nikoḍimas, saait tum Galeel se aaya hei! Baaibal paṛho, aur tumme pata lagi ki koi bhi nabi Galeel se nai aais hei.”

⁵³Aur sab aapan aapan ghare chala gain.