Read Hindi, Fiji Yuhanna 8 Bible Online

Yuhanna 8 - Hindi, Fiji bible

Yuhanna 8

²Dusra din sabere u chech gais. Sab log uske lage aain, Yeeshu beiṭh ke u sab ke sikhaay laga.

³Tab kaanuun ke guru aur Farisi log ek aurat ke le ke aain, u aurat aḍalṭri meñ pakṛi gay rahi. U log uske sab ke beech meñ khaṛa kar deen.

⁴Tab u sab bolin, “Guru ji, i aurat ek dusra admi jon iske admi nai raha, ke sañghe sote pakṛi gais.

⁵Maozas ke kaanuun hamme bataay hei ki eisan aurat ke patthar se maar deke chaahi! Tum kaa bolta hei?”

⁶I sawaal ulog Yeeshu se i kaaran karin raha, kaahe ke ulog uske fasaay maañgat rahin aur dos lagaay maañgat rahin. Lekin Yeeshu nichche jhuk ke uñgri se maṭṭi pe likhe lagis.

⁷Ulog Yeeshu se sawaal puuchhte rahin. Aakhri meñ Yeeshu khaṛa hoy ke bolis, “Agar tum meñ se koi kabhi paap nai kara hei to, pahila patthar se iske maaro!”

⁸Fir se u jhuk ke maṭṭi pe likhe laga.

⁹I baat sun ke baṛa se leke chhoṭa tak ek ek kar ke sab chal deen. Aakhri meñ, Yeeshu aur u aurat akele rahe gais.

¹⁰Yeeshu khaṛa hoy ke puuchhis, “Sab kahañ hei? Kaa koi nai bacha jon tumme saja dei?”

¹¹U aurat bolis, “Prabhu, koi nai.” Tab Yeeshu usse bolis, “Ham bhi tumme saja nai dega. Tum ab jaao, lekin ab se paap nai karna.”

¹²Ek dafe fir Yeeshu bheeṛ se baat karis. I dafe u bolis, “Ham dunia ke jyoti hei! Hamaar pichchhe aao, aur tum kabhi añdhera meñ nai chalega. Tumhaar lage u roshni rahi jon jeewan de hei.”

¹³Farisi log nai maanin aur bolin, “Tumahi ek hei jon aapan baare meñ bolta hei, aur jon tum bolta hei, u sachche nai hei!”

¹⁴Yeeshu jawaab dees, “Agar ham aapan baare meñ bolta hei, to i sab baat sachcha hei! Kaahe ke ham janta hei ki ham kahañ se aaya hei aur kahañ jaayga. Lekin tum sab nai janta hei ki ham kahañ se aaya hei aur kahañ jaata hei.

¹⁵Tum sab i dunia ke log ke ekke rakam feisla karta hei, lekin ham koi ke feisla nai karta.

¹⁶Agar ham feisla kari, to ham insaaf ke saath feisla karega, kaahe ke ham akele feisla nai sunaata. Hamaar Pita jon hamme bhejis hei hamaar sañghe rahe hei.

¹⁷Tumhaar kaanuun maañge hei ki aur koi cheej ke maana jaay ke khaatir dui gawaah ke jaruurat hei

¹⁸Ham aapan gawaahi khud deta hei, aur hamaar Pita jon hamme bhejis hei, u bhi hamaar gawaahi de hei.

¹⁹Tab ulog puuchhin, “Tumhaar Pita kahañ hei?” “Tum hamme aur hamaar Pita ke nai janta!” Yeeshu bolis, “Agar tum hamme janta to hamaar Pita ke bhi janta.”

²⁰Yeeshu i sab baat tab bolis raha, jab u jahañ daan waala ḍibba rakha jaay hei, huañ updes dewat raha. Fir bhi koi uske nai pakṛis, kaahe ke uske ṭaaim abhi nai aais raha.

²¹Yeeshu fir aur log se bolis, “Ham jaata hei, aur tum sab hamme khojega. Lekin tum sab huañ nai jaay sakta hei jahañ ham jaata hei, tum sab aapan paap meñ marega.”

²²Tab Yahuudi guru log puuchhin, “Kaa i apne aap ke maare maañge hei? Iske matlab kaa hei jab i bole hei ki ham huañ nai jaay sakta jahañ i jaai?”

²³Yeeshu bolis, “Tum nichche ke hei, lekin ham uppar ke hei. Tum i dunia ke hei lekin ham i dunia ke nai hei.

²⁴Yahi kaaran ham bola ki tum sab aapan aapan paap meñ marega. Agar tum biswaas nai karta ki ham “Ham hei” to tum aapan paap meñ marega.

²⁵Sab log puuchhis, “Tum kon hei?” Yeeshu jawaab dees, “Wahi jon ham suru se bataate aaya hei.

²⁶Tumhaar baare meñ hamme aur bahut bole ke hei aur feisla kare ke hei, lekin jon hamme bhejis hei, u sachcha hei, jon bhi kuchh ham usse suna hei, wahi dunia ke bataata hei.”

²⁷Koi nai samjhis ki Yeeshu aapan Pita ke baare meñ baat kare hei.

²⁸Yeeshu aur aage bolis, “Jab tum Manush ke laṛka ke uppar uṭhaayga, tab jaanega ki, ‘Ham wahi hei’ aur ham apne aap se kuchh nai karta, lekin ham wahi bolta hei jon Pita Parmeshwar hamme bataais hei.

²⁹Jon hamme bhejis hei, u hamaar sañghe hei. Ham hardam wahi karta jon u maañge hei, aur u hamme kabhi nai chhoṛi.”

³⁰Jab Yeeshu i sab bol dees, to kaafi log uspe biswaas karin.

³¹Jon log Yeeshu pe biswaas karin, usse Yeeshu bolis, “Agar tum hamaar baat pe chalo to sachche ke hamaar chela hei.

³²Tum sachchaai jaanega, aur wahi sachchaai tumme chhuṭkaara dewaai.”

³³U sab jawaab deen, “Ham sab Abraham ke khaandaan ke hei! Ham kabhi kisi ke gulaami nai kara. Kon rakam se ham aajaad hoyga?”

³⁴Yeeshu jawaab dees, “Ham sachche bolta hei ki jon koi bhi paap kare hei, u paap ke gulaam hei!

³⁵Aur gulaam, hardam ekke ghar meñ nai rahe hei, lekin laṛka sada ekke palwaar ke sañghe rahe hei.

³⁶Agar laṛka tumme ajaadi de hei to tum ajaad hei!

³⁷Ham janta hei ki tum Abraham ke khaandaan ke hei. Fir bhi tum hamme maare mañgta hei, kaahe ke hamaar sandes tumme achchha nai lage hei.

³⁸Ham wahi bolta hei jon ham aapan Pita ke hiañ dekha hei, wahi rakam jeise tum wahi karta hei jon tum aapan Pita (Abraham) se suna hei.”

³⁹Tab sab log Yeeshu se bolin, “Hamaar Pita Abraham hei!” Yeeshu jawaab dees, “Agar tum sachche ke Abraham ke laṛkan hota to wahi karta jon Abraham karis raha.

⁴⁰Fir bhi tum hamme maare mañgta hei, kaahe ke ham wahi sachcha baat bataata hei jon hamaar Pita hamme dees hei. Abraham to kabhi eise nai karis raha.

⁴¹Lekin tum wahi karta hei jon tumhaar Pita karis raha.” Ulog tab bolin, “Ham log pe dos nai lagaao ki ham log ke bappa koi aur hei. Parmeshwar hamaar Pita hei, aur ham sab uske laṛkan hei.”

⁴²Yeeshu tab bolis, “Agar Parmeshwar tumhaar Pita hota, to tum sab ham se prem karta, kaahe ke ham khali Parmeshwar ke bagal se aaya hei. U hamme bhejis hei. Ham apne aap nai aaya hei.

⁴³Tum kaahe nai samajhta hei ki ham kaa bolta hei? Kaa tum hamaar baat sunke sahe nai sakta hei?

⁴⁴Tumhaar Pita to saitaan hei, aur tum wahi karta hei jon u maañge hei. U suru se hatyaara aur jhuuṭa raha. Usman kuchh sach nai hei. U aapan bhaasha bole hei, aur jon kuchh bhi bole hei, u sab jhuuṭ hei. U khali jhuuṭa nai hei lekin u sab jhuuṭ ke baap hei.

⁴⁵Jon kuchh bhi ham bola hei, u sab sach hei, aur tum abhi bhi ham pe biswaas nai karta.

⁴⁶Tum meñ se kon i saabit kare sake hei ki ham paapi hei? Agar koi nai to kaahe ke hampe biswaas nai karta? Aakhir, ham sachche bolta hei.

⁴⁷Jon koi bhi Parmeshwar ke hei, u uske sandes suni. Lekin tum Parmeshwar ke nai hei, yahi kaaran tum uske baat nai sunta.”

⁴⁸Log Yeeshu se bolis, “Ham sab sachche bolat raha ki tum Saamri hei, tum meñ saitaan hei!”

⁴⁹Yeeshu jawaab dees, “Ham meñ saitaan nai hei. Ham aapan Pita ke aadar karta hei, lekin tum hamme aadar nai karta.

⁵⁰Ham aapan baṛaai nai mañgta. Lekin ek hei jon maañge hei ki hamaar aadar hoy, aur u wahi hei jon hamaar waaste nyaay kare hei.

⁵¹Ham tum se sachche bolta hei ki agar koi hamaar baat maan ke uspe chale hei to kabhi nai mare hei.”

⁵²Tab fir Yahuudi log bolin, “Ab hamme biswaas hoy gais hei ki tum meñ saitaan hei. Abraham to mar gais hei, aur sab nabi bhi. Keise tum bole sakta hei ki jon tum pe biswaas kari u kabhi nai mari?

⁵³Kaa tum Abraham se bhi baṛa hei? U to mar gais hei, aur sab nabi bhi mar gais hei. Tum apne aap ke kaa samajhta hei?”

⁵⁴Yeeshu jawaab dees, “Agar ham apne aap aapan baṛaai kari to kaa faayda. Hamaar Pita hei jon hamaar baṛaai kare hei. Tum bhi to bolta hei ki u tumhaar Parmeshwar hei.

⁵⁵Tum to uske nai janta hei. Agar ham boli ki ham uske nai janta hei, to ham tum sab ke rakam jhuuṭa hoy jaayga. Lekin ham uske janta hei, aur i bhi janta hei ki u kaa bole hei.

⁵⁶Tumhaar Pita Abraham hamme dekh ke bahut khusi bhais raha.”

⁵⁷Tab Yahuudi log usse bolis, “Abhi to tum pachaas ke bhi nai hei! Keise tum bole sakta hei ki tum Abraham ke dekha hei?

⁵⁸Yeeshu jawaab dees, “Ham tum se sachche bolta hei, Abraham ke peida hoy se pahile se ham hei.”

⁵⁹Tab sab log Yeeshu ke maare ke waaste patthar uṭhaain, lekin u chuppe se chech se chala gais.