Read Hindi, Fiji Yuhanna 9 Bible Online

Yuhanna 9 - Hindi, Fiji bible

Yuhanna 9

¹Rasta meñ Yeeshu ek admi ke dekhis, jon janam se añdha raha.

²Yeeshu ke chela log usse puuchhis, “Guru ji, i admi kaahe ke añdha peida bhais hei? Kon paap karis raha, i admi, ki iske amma bappa?”

³Yeeshu jawaab dees, “Nai, i kaaran nai raha! Lekin iske añdha hoy ke kaaran, tum sab dekhega, keise Parmeshwar iske khaatir chamatkaar kari.

⁴Jab tak din rahi, hamme u kaam kare ke hei, jiske waaste u hamme bhejis hei. Jab raat hoy jaai, koi kaam nai kare saki.

⁵Jab tak ham dunia meñ hei, ham i dunia ke jyoti hei.”

⁶I baat bol ke Yeeshu maṭṭi pe thuukis, thuuk se maṭṭi ke saan ke u añdha ke aañkhi pe lagaay dees.

⁷Tab u bolis, “Silom ke kunḍ meñ jaay ke aapan aañkhi dhoy leo.” U admi huañ jaay ke aapan aañkhi dhoy lees aur dekhe laga. Silom ke matlab hei, jon bheja gais hei

⁸Uske paṛosi aur ulog jon uske bheek maañgat dekhat rahin, bolin, “Kaa i u admi nai jon huañ beiṭh ke bheek maañgat raha?”

⁹Kuchh admi bolin ki u wahi bhikhaari hei, baaki log bolin ki i u admi nai hei lekin uske rakam lage hei. Lekin u sab se bataais, “Ham wahi admi hei.”

¹⁰“Tab tum keise dekhe sakta hei?” ulog puuchhin.

¹¹U jawaab dees, “Yeeshu naam ke admi maṭṭi saan ke hamaar aañkhi pe lagaais aur bolis ki Silom ke kunḍ meñ jaay ke aapan aañkhi dhoy leo. Ham huañ jaay ke aapan aañkhi dhoy lia aur dekhe laga.”

¹²“Ab u kahañ hei?” ulog puuchhin. “Ham nai janta,” u bolis.

¹³Tab ulog u admi ke jon añdha raha aur dekhe laga raha, Farisi ke paas le gais.

¹⁴Jon din Yeeshu uske aañkhi kholis raha, u sabat ke din raha.

¹⁵Farisi log usse fir se puuchhin, ki u keise dekhe lagis hei, aur u fir jawaab dees, “Yeeshu maṭṭi saan ke hamaar aañkhi pe lagaais. Aur jab ham dhoy lia tab dekhe laga.”

¹⁶Kuchh Farisi tab bolin, “I admi Parmeshwar ke bagal se nai aais hei. Agar aata to sabat ke kaanuun ke nai tuuṛta.” Dusra log bolin, “I bataao ki keise ek paapi eisan chamatkaari kaam kare sake hei?” Aur u sab dui bhaag meñ baṭ gain.

¹⁷Farisi log ek dafe fir se u admi se puuchhin, “U admi ke baare meñ tum kaa bolta hei, jon tumhaar aañkhi achchha karis raha?” “U nabi hei.” u bolis.

¹⁸Lekin Yahuudi agua log biswaas nai kare maañgat rahin, ki u admi añdha raha. U log uske amma-bappa ke bulaain,

¹⁹aur puuchhin, “Kaa i tumhaar u laṛka hei jon añdha peida bhais raha? Ab u keise dekhe sake hei?”

²⁰U admi ke maiya-bappa bolin, “Ham janta hei ki i hamaar laṛka hei, aur i bhi janta hei ki i añdha peida bhais raha.

²¹Lekin ham i nai janta ki ab i keise dekhe sake hei, aur kon iske aañkhi kholis. Wahi se puuchho! U ab baṛa hoy gais hei aur aapan baare meñ apne bataay sake hei.”

²²Uske maiya-bappa i baat i kaaran bolin raha ki u Yahuudi log se ḍarat rahin. Kaahe ke agua log bol deen raha ki jon koi bhi Yeeshu Maseeh se kuchh sambandh rakkhi uske chech se nikaar dewa jaai.

²³Yahi kaaran ulog bolin raha, “U baṛa hoy gais hei, wahi se puuchho.”

²⁴Fir se ek dafe Yahuudi agua log u admi ke bolaay ke bolin, “Parmeshwar ke aage sachche bolo! Ham sab janta hei ki u admi ek paapi hei.”

²⁵U admi bolis, “Ham nai janta ki u paapi hei ki nai. Ham to bas etna janta ki ham añdha raha aur ab dekhe sakta hei!”

²⁶“U tumhaar sañghe kaa karis?” Yahuudi agua log bolin. “Keise tumhaar aañkhi achchha karis?”

²⁷U admi jawaab dees, “Ham to tum se ek dafe bataay dia hei. Tum to sune nai mañgta hei. Kaahe ke tum mañgta hei ki ham fir se bataai? Kaa tum bhi uske chela bane mañgta hei?”

²⁸Ispe Yahuudi agua log uspe gussaay ke bolin, “Tum uske chela hoyga! Ham to Maozas ke chela hei!

²⁹Ham sab janta hei ki Parmeshwar Maozas se baat karis raha, lekin ham i nai janta ki Yeeshu kahañ se aais hei.”

³⁰U admi jawaab dees, “Ham chakit hei! U hamaar aañkhi achchha karis, fir bhi tum nai janta ki u kahañ se aais hei?

³¹Ham janta hei ki Parmeshwar khali wahi ke sune hei, jon usse prem kare hei aur uske baat maane hei. Parmeshwar paapi ke nai sune hei.

³²Hisṭri meñ i pahila dafe dekha gais hei ki koi janam ke añdha ke aañkhi kholis hei.

³³Yeeshu i nai kare sakta agar u Parmeshwar ke lage se nai aata.”

³⁴Agua log u admi se bolin, “Tum jab se janam lia tab se paapi raha! Kaa tum hamme kuchh sikhaay sakta hei?” Fir ulog bolin, “Tum ab hamaar chech meñ kabhi nai aana!”

³⁵Jab Yeeshu sunis ki kaa bhais hei, tab u admi ke lage gais, aur puuchhis, “Kaa Manush ke laṛka meñ tum biswaas karta hei?”

³⁶U jawaab dees, “He Prabhu, agar tum bataayga ki u kon hei, tab ham uspe biswaas karega.”

³⁷Yeeshu jawaab dees, “Tum to uske dekh lia hei aur u wahi hei jon se tum baat karta hei.”

³⁸U admi bolis, “Prabhu, ham puura biswaas karta hei!” aur Yeeshu ke aage ghuṭna ṭek lees.

³⁹Yeeshu tab usse bolis, “Ham dunia meñ nyaay ke waaste aaya hei, ki jon nai dekhe hei, u dekhe lage aur jon dekhe hei u añdha hoy jaay.”

⁴⁰Jab Farisi log i baat sunin to bolin, “Kaa ham añdha hei?”

⁴¹Yeeshu jawaab dees, “Agar tum añdha hota to paapi nai hota, lekin tum bolta hei ki tumme dekhaay hei, aur yahi kaaran tum paapi bhaya.”