Read Hindi, Fiji Prerito ke Kaam 1 Bible Online

Prerito ke Kaam 1 - Hindi, Fiji bible

Prerito ke Kaam 1

¹Theofilus, ham tumhaar lage pahile u sab baat likha hei jon Yeeshu karis aur sikhaais hei, jab talak u swarag meñ uppar nai uṭhaay lewa gais. Lekin uppar jaay se pahile Yeeshu Pawitr Aatma ke madat se prerit log ke chun ke hukum dees.

³Yeeshu chaalis din tak dukh uṭhaay ke aur mare ke baad bahut rakam se saabit karis ki u fir se jinda hoy gais hei. U aapan prerit log ke saamne aais aur Parmeshwar ke raaj ke baare meñ ulog se baat karis.

⁴Jab ki u chela log ke sañghe hee raha, u bolis,“Yarushalam se bahire abhi nai jaana aur Pita ke promis puura hoy ke khaatir agorna jeise ham tumse bataay raha.”

⁵Yuhanna to paani se baptisma dees raha lekin thoṛa din meñ tumme Pawitr Aatma se baptisma mili.

⁶Jab tak chela log Yeeshu ke sañghe rahin, ulog usse puuchhin, “Prabhu, kaa yahi ṭaaim Israayel ke aapan raaja fir se dega?”

⁷Yeeshu ulog se bolis, “Kon ṭaaim kon cheej hoi, i baat tumme jaane ke koi kaam nai hei, sab hamaar Pita ke haath meñ hei.

⁸Lekin tumhaar uppar Pawitr Aatma aai aur tumme taagat mili aur tum hamaar baare meñ Yarushalam meñ, puura Juḍia meñ, Samaaria meñ aur dunia bhar meñ parchaar karega.”

⁹I sab bole ke baad jab sab log Yeeshu ke dekhte rahin, tab uske uppar uṭhaay lewa gais aur u baadar ke beech meñ gaayab hoy gais. Ulog uske dekhe nai sakin,

¹⁰lekin jeise u uppar gais sab log asmaan ke bagal dekhte rahe gain. Achaanak wahi ṭaaim dui admi ujjar kapṛa pahine ulog ke bagal meñ aay ke khaṛa hoy gain.

¹¹Ulog bolin, “Tum Galeel ke log, kaahe khaṛa hoy ke asmaan ke taraf dekhta hei? Yahi Yeeshu jon tumhaar lage se swarag meñ uṭhaay lewa gay hei, yahi rakam aai jeise tum log uske swarag meñ uppar jaate dekha hei.”

¹²Jaituun Pahaaṛ Yarushalam se lagbhag ek kilomeeṭa duur raha. Jon prerit log huañ gay rahin ulog ke naam i rakam hei, Peeṭa, Yuhanna, Jeims, Andriyaas, Filip, Thomas, Bartimaais, Methiu, Halfai ke laṛka Jeims, Saayman Jelotel aur Jeims ke laṛka Juḍas. Lauṭe ke baad sab uppar ke ruum meñ chala gain jahañ ulog rahat rahin.

¹⁴Ulog hardam ek sañghe mil ke preya karat rahin. Kuchh aurat log, Yeeshu ke amma Meri aur Yeeshu ke bhaiya log bhi ek sañghe mil ke preya karat rahin.

¹⁵Ek din lagbhag ek sao bees (120) Maseehi log ke sabha meñ, Peeṭa khaṛa hoy ke ulog ke beech meñ bolis.

¹⁶Hamaar dost log, Baaibal ke baat ekdam sachche nikra. Pawitr Aatma ke taagat se Ḍeiviḍ jon cheej Juḍas Iskariyoti ke baare meñ bolis raha u aaj sachche bhais. Juḍas, Yeeshu ke pakaṛwaais raha. Uske ham log ke kaam meñ haath baṭaay ke waaste chuna gay raha.

¹⁸U aapan paap ke peisa se ek chhoṭa jameen khareedis, jahañ u muh ke bal gira, peṭ faṭ gais aur uske atṛi bahire nikar gais.

¹⁹Yarushalam ke sab log i baat jaan gain aur i kaaran se ulog aapan bhaasha meñ u jagha ke naam “Hakaldama” yaane “Khuun ke khet rakkhin.”

²⁰Bhajan Sañhita ke buk meñ eise likhaan hei, “Uske ghar khaali rakkho, usman koi ke rahe nai deo.” Aur i bhi likhaan hei, “Uske kaam koi aur ke kare ke waaste de deo.”

²¹Ham log mañgta hei ki koi aur admi ham log ke sañghe hoy jaay jon Yeeshu Maseeh ke baare meñ gawaahi de sake ki u mar ke jinda hoy gay. Aur u admi eisan hoy jon ham log ke sañghe suru se raha. U ham log ke sañghe u ṭaaim se raha hoy jab se Yeeshu Maseeh ke Yuhanna se baptisma se leke u din tak jab tak u swarag meñ uppar uṭhaay lewa gais raha.

²³Ulog dui naam chunaao ke waaste rakkhin. Ek raha Josaf jon ke Barsaba Yustus bhi bolat rahin, aur dusra Methiaas raha.

²⁴Tab log preya karin, “Prabhu ji, tum janta hei ki sab log keisan hei, ham log ke dekhaao ki tum kiske chuna hei

²⁵jon Juḍas ke jagha prerit ban ke sewa kare sake. Juḍas jeise karis weise bharis.”

²⁶Tab chune ke waaste ulog vauṭ karin. Methiaas ke naam nikra aur u gyaara prerit log ke sañghe kaam kare laga.