Read Hindi, Fiji Prerito ke Kaam 11 Bible Online

Prerito ke Kaam 11 - Hindi, Fiji bible

Prerito ke Kaam 11

¹Juḍia meñ prerit log aur baaki biswaasi log sunin ki geir Yahuudi log Parmeshwar ke sandes maane lagin hei.

²To jab Peeṭa Yarushalam aais tab Yahuudi biswaasi log Peeṭa se baad-bibaad kare lagin. Ulog maañgat rahin ki geir Yahuudi log ke khatna hoy aur ulog bolin,

³“Tum geir Yahuudi log ke ghare raha, aur ulog ke saathe khaaya-piya bhi!”

⁴Tab Peeṭa puura baat bataais jon ulog ke sañghe beeta.

⁵Ham Joppa ṭaaun meñ raha aur preya karat raha. Ham gahira neeñd meñ soy gaya aur hamme darshan mila. Ham dekha ki swarag khula aur chaaro kona se bañdha ek bhaari chaddar ke rakam koi cheej hamaar taraf aais.

⁶Jab ham dhyaan se dekha tab ham usman jaanwar, aur jañgli jaanwar, saañp aur chiṛia dekha.

⁷Hamme i awaaj sunaan, “Peeṭa uṭho, i sab ke maaro aur khaao.”

⁸Lekin ham bola, “Nai, Prabhu, aaj tak koi eisan cheej ham nai khaaya jon safa nai hei ya khaawe laayk nai hei.

⁹Swarag se dusra dafe awaaj aais, “Jab Parmeshwar bole hei ki jon kuchh khaana ke khaatir iyuz kare ke ṭheek hei, to nai bolo ki u khaay laayk nai hei.”

¹⁰Teen dafe eise bhay aur fir sab kuchh uppar swarag meñ uṭha lewa gay.

¹¹Achaanak, Kaisaria se teen admi ghar ke saamne aay ke khaṛa hoy gain jahañ ham rahat raha.

¹²Pawitr Aatma hamme bataais ki bina koi chinta kare ulog ke sañghe chala jaao. Tab Prabhu meñ biswaasi chhe (6) log hamaar sañghe ek admi ke ghare gain

¹³jon ham log ke bataais ki uske ghare ek ainjal aais raha. Ainjal uske hukum dees ki Joppa meñ Saayman Peeṭa naam ke admi hei, uske bulwaao.

¹⁴Tab Saayman Peeṭa aay ke ulog ke bataai ki keise u aur uske palwaar bache saki.

¹⁵Jeise ham sandes dewe ke suru kara weisaiyeñ Pawitr Aatma ulog ke uppar aay gay ṭheek wahi rakam jeise suru meñ ham log ke mila raha.

¹⁶Tab hamme Prabhu ke baat yaad aais jab u bolis raha, “Yuhanna to paani se baptisma dees raha lekin tumhaar baptisma Pawitr Aatma se hoi.”

¹⁷Parmeshwar geir Yahuudi log ke wahi daan dees jon ham log ke dees raha jab ham log Prabhu Yeeshu Maseeh pe biswaas kara raha. To fir ham keise Parmeshwar ke agaiñsṭ jaay sakta hei?

¹⁸Peeṭa ke sab baat sunke sab chup hoy gain aur Parmeshwar ke baṛaai kare lagin. Ulog bolin, “Parmeshwar geir Yahuudi log ke aapan bagal aawe dees aur ulog ke jeewan dees hei!”.

¹⁹Sṭeevan ke hatya ke ṭaaim se jon atyaachaar suru bhay raha, wahi ṭaaim se Prabhu ke biswaasi log idhar udhar chhitraay gain. Ulog Finiki, Saaypras, aur Antaakia tak gain, lekin khali Yahuudi log ke Parmeshwar ke sandes sunaain.

²⁰Kuchh Saaypras aur Cyrene ke rahewaala log jab Antaakia gain tab ulog Greek log ke bhi Prabhu Yeeshu ke susamaachaar sunaain.

²¹Prabhu ke sakti ulog ke uppar raha aur bahut se log Prabhu ke apnaain aur uspe biswaas karin.

²²Jab iske baare meñ Yarushalam ke chech sunin tab ulog Baranbaas ke Antaakia bhejin.

²³Jab Baranbaas huañ pahuñcha tab u Parmeshwar ke daya dekh ke bahut khusi bhay. Tan man se Parmeshwar ke sewa kare ke waaste u sab ke himmat baṛhaais.

²⁴Baranbaas ek achchha admi raha jiske biswaas baṛa majbuut raha aur u Pawitr Aatma se bhara raha. Yahi kaaran se bahut log Prabhu ke biswaasi ban gain.

²⁵Baranbaas Sol ke khoj meñ Tarsus gais.

²⁶Huañ uske bheñṭ Sol se bhay aur u uske Antaakia leke aais. Hiañ duuno chech ke sañghe mil ke ek saal tak updes dete rahin. Hiañ Antaakia meñ Prabhu ke biswaasi log ke sab se pahile Maseehi naam se bulaawa jaat raha.

²⁷I ṭaaim Yarushalam ke kuchh nabi log Antaakia aain.

²⁸Ulog meñ se Agbus naam ke nabi Pawitr Aatma ke sakti se i bataais ki dunia bhar meñ baṛa bhaari akaal paṛe waala hei. I u ṭaaim ke baat hei jab raaja Kloḍias raaj karat raha.

²⁹Antaakia ke biswaasi log bichaar karin ki sab koi mil ke Juḍia ke biswaasi log ke kuchh madat bheji.

³⁰Tab ulog Baranbaas aur Sol ke haath huañ ke agua log ke lage kuchh gifṭs bhejin.