Read Hindi, Fiji Prerito ke Kaam 13 Bible Online

Prerito ke Kaam 13 - Hindi, Fiji bible

Prerito ke Kaam 13

¹Antaakia ke chech meñ bahut nabi aur ṭeecha log rahin, jeise Baranbaas, Saayman jiske ‘Kalua’ (Niger) bolat rahin, Cyrene ke rahewaala Luusias, Raaja Heraḍ ke sañgati Manaen aur Sol.

²Jab ulog preya aur upwaas karat rahin tab Pawitr Aatma ulog se bolis, “Hamaar waaste Baranbaas aur Sol ke u kaam kare ke waaste lagaay deo jon kaam ke waaste ham ulog ke chuna hei.”

³Ulog aur kuchh deri tak upwaas aur preya karin. Fir, ulog aapan aapan haath Baranbaas aur Sol pe rakkhin aur kaam kare ke waaste bhej deen.

⁴Jab Pawitr Aatma, Baranbaas aur Sol ke bhej dees, tab ulog Silukia ghaaṭ pahuñchin aur huañ se bauṭ meñ beiṭh ke Saaypras aaylenḍ chala gain.

⁵Salmees pahuñch ke ulog Yahuudi ke mile waala jagha meñ Parmeshwar ke sandes sunaawe lagin. Yuhanna bhi ulog ke madat karat raha.

⁶Puura aaylenḍ ghuumte ghuumte Baranbaas aur Sol, Paafus shahar pahuñchin. Huañ ulog se Baar-Yeeshu naam ke ek jaadugar se bheñṭ bhay. I ek Yahuudi raha aur jhuuṭa nabi raha.

⁷U Segias Pol ke waaste bhi kaam karat raha. U i aaylenḍ ke gavna raha aur bahut samajhdaar admi raha. U Baranbaas aur Sol ke bulwaay ke Parmeshwar ke sandes sune maañgat raha.

⁸Lekin jaadugar Baar-Yeeshu jiske dusra naam Elimaas raha, i log ke agaiñsṭ raha. U gavna ke, Prabhu ke biswaasi bane se roke maañgat raha.

⁹Tab Sol jiske dusra naam Pol raha, Pawitr Aatma se bhar gay aur Elimaas ke seedha dekh ke bolis,

¹⁰“Tum saitaan ke laṛka hei, tum jhuṭṭa aur beimaan hei, aur jon sab cheej raaiṭ hei uske dusman hei. Tum kab aapan muh Prabhu ke sachcha rasta ke agaiñsṭ bole ke band karega?

¹¹Prabhu tumme saja dei, tum añdha hoy jaayga aur thoṛa ṭaaim tak dekhe nai paayga.” Achaanak uske aañkhi meñ dhuañ ke rakam kuchh chhaay gay aur u añdha hoy gay. U idhar udhar jaay ke maañgat raha ki koi uske haath pakaṛ ke chalaay.

¹²Jab gavna dekhis jon cheej bhay tab chakit rahe gay aur u Prabhu pe aur biswaas karis.

¹³Pol aur uske saathi log paani ke rasta Paafus Pamfuulia ke Perga meñ aain. Lekin Yuhanna jiske dusra naam Maak raha, ulog ke chhoṛ ke Yarushalam lauṭ gay.

¹⁴Aur baaki log Perga se chalke Pisidia ke Antaakia rejan meñ aain aur sabat ke roj Yahuudi ke mile waala jagha meñ jaay ke beiṭh gain.

¹⁵Kaanuun aur nabi ke buk paṛhe ke baad Mandir ke kuchh agua log koi ke bhejin ki Baranbaas aur Pol se bole, “Dost log, agar tum log ham log ke himmat baṛhaawe ke waaste kuchh bole mañgta hei to bolo.”

¹⁶Pol khaṛa hoy gay aur aapan haath uṭhaais aur bolis, “Israayeli log aur baaki Parmeshwar ke biswaasi log, suno!

¹⁷Israayel ke Parmeshwar, ham log ke baap-daada ke chunis aur Ijipt meñ ham log ke khuub baṛhanti bhay. U aapan sakti se ham log ke huañ se nikaar laais,

¹⁸aur chaalis (40) saal tak i ḍezaṭ meñ ulog ke dekh-bhaal karis.

¹⁹U Kanaan ke saat des naas karke hamaar des ke log ke de dees.

²⁰I sab cheej chaar sao pachaas (450) saal ke beech meñ bhay. Tab iske baad Samuel nabi ke ṭaaim tak Parmeshwar i des ke chalaawe ke waaste jaj log ke de dees.

²¹Lekin Israayeli log Parmeshwar se raaja ke maañg karin. Parmeshwar ulog ke Sol naam ke raaja dees jon chaalis saal tak ulog ke raaja raha. Sol, Kish ke laṛka raha. Kish, Benjameen kul ke raha.

²²Fir Parmeshwar uske haṭaay ke Ḍeiviḍ ke raaja banaais aur uske baare meñ bolis, “I admi, Jesse ke laṛka Ḍeiviḍ hei jon hamme khusi rakkhe hei! I wahi kare hei jon ham mañgta hei.”

²³Parmeshwar promis karis raha ki Israayel ke log ke bachaawe ke waaste u Ḍeiviḍ ke gharaana meñ se koi ke bheji, aur u hei Yeeshu.

²⁴Lekin Yeeshu ke aawe se pahile Yuhanna Israayel ke sab log ke bataais ki aapan dil Parmeshwar meñ lagaao aur baptisma leo.

²⁵Jab Yuhanna ke kaam khalaas hoy waala raha tab u bolis, “Tum log kaa sochta hei ki ham kon hei? Kaa tum sochta hei jon ke promis kara gay hei, ham wahi hei? Jon hamaar peechhe aay waala hei, uske goṛ ke juuta khole laayk bhi ham nai hei.”

²⁶Sab koi suno. Abraham ke santaan, suno. Aur sab geir Yahuudi log jon Parmeshwar ke weship kare hei, tum bhi suno! Uddhaar paawe ke waaste i sandes suno, kaahe ke i sab ke waaste hei.

²⁷Yarushalam ke log aur huañ ke agua log nai samajh paain ki Yeeshu kon hei. Sabat ke din nabi ke buk meñ se jon cheej paṛhat rahin u bhi nai samajh paain. Aur Yeeshu ke kasuurwaar banaay deen jeise nabi log bole rahin.

²⁸Yeeshu ke marwaay ke waaste koi kasuur ulog ke nai mila fir bhi ulog Paaylaṭ se maañg karin ki uske marwaay de. Baaibal meñ jon cheej likhaan raha ulog sab puura karin. Yeeshu ke maare ke baad kros se utaar ke kabar meñ rakh deen.

²⁹

³⁰Lekin Parmeshwar uske fir jinda kar dees.

³¹Jon log uske sañghe Galeel se Yarushalam aay rahin Yeeshu ulog ke aapan darshan bahut din tak dete raha. Yahi log ab sab log se Yeeshu ke baare meñ bataay hei.

³²Ham log i susamaachaar tum log ke sunaata hei ki Parmeshwar Yeeshu ke jinda kar dees

³³aur jon promis ham log ke baap-daada ke sañghe karis raha u ham log ke sañghe aaj puura bhay. Jeise ki Bhajan Sañhita ke buk ke dusra chapṭa meñ Yeeshu ke baare meñ likhaan hei, “Tum hamaar laṛka hei, kaahe ke aaj ham tumhaar Pita ban gaya hei.”

³⁴Parmeshwar, Yeeshu ke mare ke baad uske jinda kar dees taaki uske deñhi nai saṛe. Iske baare meñ jeise Parmeshwar bolis raha, “Ham wahi pawitr promis tumse karega jon ham Ḍeiviḍ se kara raha.”

³⁵Bhajan Sañhita meñ dusra jagha i likha hei, “Parmeshwar aapan Pawitr jan ke deñhi saṛe nai dei.”

³⁶Ḍeiviḍ jab jinda raha, Parmeshwar ke sab baat sunis. Jab u mara tab uske palwaar ke kabar meñ gaaṛa gay, aur uske deñhi saṛ gay.

³⁷Lekin Parmeshwar Yeeshu ke jinda kar dees aur uske deñhi nai saṛa.

³⁸Bhaai log, hamaar sandes yahi hei ki Yeeshu paap ke maafi kare sake hei! Maozas ke kaanuun tumme sab paap se chhuṭkaara nai dewe sake hei.

³⁹Lekin jon Yeeshu pe biswaas kare hei ulog ke chhuṭkaara mil jaay hei.

⁴⁰I kaaran se husiaar rahna, nabi log jon baat bole rahin kahiñ sachche ke tumhaar sañghe nai hoy jaay. Ulog bolin raha,

⁴¹“Dekho, tum log jon Parmeshwar se khelwaaṛ karta hei! Ghabraao aur naas hoy jaao. Aaj ham kuchh karega jon tum biswaas nai karega, hiañ tak ki agar koi aay ke tumme uske baare meñ bataai bhi!”

⁴²Pol aur Baranbaas jeise bahire nikrin, log ilog se chirauri karin ki agle sabat ke din aay ke wahi baat fir se sunaawe.

⁴³Jab meeṭing khalaas bhay tab Yahuudi log aur baaki geir Yahuudi log jon Parmeshwar ke weship karat rahin, ulog ke sañghe chala gain. Pol aur Baranbaas ulog se chirauri karis ki Parmeshwar jon ulog pe etna daya karis, usman bane raho.

⁴⁴Dusra sabat ke din Prabhu ke sandes sune ke waaste ṭaaun ke lagbhag sab log aay gain.

⁴⁵Bheeṛ dekh ke Yahuudi log ke baṛa jaran laga. Ulog Pol ke beijjati karin aur sandes ke agaiñsṭ bole lagin.

⁴⁶Lekin Pol aur Baranbaas himmat se bolin, “Parmeshwar ke subh sandes aur koi ke bataay se pahile tumme sunaawe ke raha. Lekin tum log sandes ke nai apnaaya. Is se yahi pata lage hei ki tumme anant jeewan nai mile ke chaahi. Aur ab ham dusra jaati ke log ke sandes sunaawe jaata hei.

⁴⁷Prabhu ham log ke i hukum dees hei, “Geir Yahuudi ke beech meñ tumme roshni banaawa gay hei, ki puura dunia meñ sab log ke beech uddhaar paawe ke sandes tum le jaao.”

⁴⁸I baat sun ke geir Yahuudi log baṛa khusi bhain aur Prabhu ke sandes ke baṛaai kare lagin. Aur jon log ke anant jeewan ke waaste chuna gay ulog Prabhu pe biswaas karin.

⁴⁹Prabhu ke subh sandes puura rejan meñ feil gay.

⁵⁰Lekin Yahuudi log ke agua kuchh maane-jaane admi aur ijjatdaar dhaarmik aurat log ke Pol aur Baranbaas ke agaiñsṭ kar deen aur ṭrabal kare ke suru karin. Hiañ tak ki ulog ke huañ se khader deen.

⁵¹Pol aur Baranbaas aapan goṛ ke dhuul jhaaṛ ke Ikoniyum shahar chala gain.

⁵²Lekin Prabhu ke biswaasi log Antaakia meñ bahut khusi rahin aur Pawitr Aatma se bhara rahin.