Read Hindi, Fiji Prerito ke Kaam 14 Bible Online

Prerito ke Kaam 14 - Hindi, Fiji bible

Prerito ke Kaam 14

¹Jeise Enṭiok meñ bhais raha wahi rakam Ikoniyum meñ bhi bhay, Pol aur Baranbaas Yahuudi ke mile waala jagha meñ i rakam sandes sunaain ki tamaam Yahuudi aur geir Yahuudi log Prabhu ke biswaasi ban gain.

²Lekin jon Yahuudi log Prabhu pe biswaas nai karin, ulog geir Yahuudi log ke gussa karaais ki biswaasi log ke agaiñsṭ kaam kare.

³Thoṛa din tak Pol aur Baranbaas huañ rahe ke Prabhu meñ biswaas aur himmat se parchaar karte rahin. Prabhu ke sakti se ulog chakit aur chamatkaari kaam dekhaay ke yahi saabit karin ki ulog ke bhalaai karewaala sandes sachcha hei.

⁴Ikoniyum shahar ke log soche aur samjhe nai sakin. Kuchh log Yahuudi grup ke sañghe hoy gain aur baaki log prerit log meñ biswaas karin.

⁵Yahuudi aur geir Yahuudi log aapan agua log ke sañghe mil ke Pol aur Baranbaas ke badnaam karin aur patthar se maare ke waaste kosis karin.

⁶Ulog samajh gain ki kaa hoy waala hei, aapan jaan bachaawe ke waaste Likaaunia des bhaag gain. Huañ ulog Lystra aur Dirbe shahar meñ aur agal bagal ke gaaoñ meñ Yeeshu ke subh sandes sunaawe lagin.

⁸Lystra meñ ek admi janam se langṛa raha aur chal fir nai paawat raha.

⁹Jab i admi Pol ke parchaar karte sunat raha, tab Pol dekhis ki i admi ke Yeeshu pe biswaas hei aur achchha hoy sake hei. Tab u admi ke bagal seedha taakis

¹⁰aur chillaais, “Khaṛa hoy jaao.” Admi kuud paṛa aur chale fire laga.

¹¹Pol ke i kaam dekh ke log Likaaunia bhaasha meñ chillaay uṭhin, “Ham log ke beech meñ admi ke ruup meñ deota utar aais hei.”

¹²Huañ ke log Baranbaas ke Zeas deota ke naam deen aur Pol ke Hirmes deota, kaahe ki wahi baat karat raha.

¹³Zeas ke Mandir, shahar ke saamne raha. Huañ ke log aur pujaari Baranbaas aur Pol ke waaste bali chaṛhaawe maañgat rahin. Zeas ke pujaari beil aur fuul le ke Mandir ke gaiṭ pe pahuñch gain.

¹⁴Jab Pol aur Baranbaas ke iske baare meñ pata chala tab gussa meñ aay ke ulog aapan kapṛa faaṛ deen aur bheeṛ meñ dauṛ ke jor se chillaay ke bolin,

¹⁵“Tum log i kaahe ke karta hei? Ham log bhi tum log ke rakam insaan hei. Chhoṛo i sab paglaapan. Ham log tum log se yahi bataay aaya hei ki ek jinda Parmeshwar pe biswaas karo, jon asmaan, dharti, samundar aur jetna cheej usman hei, sab banaais hei.

¹⁶Bahut pahile ke ṭaaim meñ Parmeshwar ek ek log ke aapan aapan rasta chale ke mauka dees raha.

¹⁷Fir bhi u bhalaai ke kaam kar ke janaawat raha ki u huañ hei. Parmeshwar asmaan se paani barsaay ke khet ke khaay-piye waala cheej jamaawe hei. U tumme khaana deke tumhaar man ke khusi rakkhe hei.

¹⁸Pol aur Baranbaas ke etna bole pe bhi ulog ke bali chaṛhaawe se nai roke paain.

¹⁹Kuchh Antaakia aur Ikoniyum ke Yahuudi log aay ke sab log ke aapan taraf kar leen aur Pol ke patthar se marwaain. Jab ulog sochin ki u mar gay hei tab uske shahar se bahire kheech le gain.

²⁰Prabhu ke biswaasi log aay ke Pol ke chaaro taraf gher leen. Pol uṭhis aur fir shahar chala gay. Dusra din u Baranbaas ke sañghe Dirbe chala gais.

²¹Pol aur Baranbaas Dirbe meñ subh sandes sunaain aur bahut log Prabhu ke biswaasi ban gain. Huañ se ulog Lystra, Ikoniyum aur Antaakia fir lauṭ gain.

²²Ulog biswaasi log ke himmat baṛhaate rahin aur biswaas meñ bana rahe ke waaste samjhaate rahin. Ulog se i bhi bataain, “Ham log ke Parmeshwar ke raaj meñ jaay ke waaste kaafi dukh uṭhaawe ke paṛi.”

²³Pol aur Baranbaas sab chech ke waaste ek ek agua chunin. Tab ulog bina khaay-piye preya karin ki Parmeshwar u agua log ke achchha se dekh bhaal kare.

²⁴Tab Pol aur Baranbaas Pisidia ke rasta Pamfuulis pahuñchin,

²⁵jahañ Pirga meñ parchaar kare ke baad Attalia pahuñchin.

²⁶Huañ se ulog paani ke rasta Siria meñ Antaakia pahuñchin, jahañ ke kaam ke waaste Parmeshwar ulog ke bachaay ke rakkhis raha, aur ab sab kaam puura kar dees hei.

²⁷Antaakia pahuñch ke Pol aur Baranbaas chech ke sab log ke ek jagha bulaain. Ulog se bataain ki keise Parmeshwar ulog ke kaam kare meñ madat karis aur keise geir Yahuudi log ke biswaasi bane ke rasta khol dees.

²⁸Pol aur Baranbaas Antaakia meñ biswaasi log ke sañghe bahut din tak rahin.