Read Hindi, Fiji Prerito ke Kaam 16 Bible Online

Prerito ke Kaam 16 - Hindi, Fiji bible

Prerito ke Kaam 16

¹Pol aur Saaylas Dirbe aur Lystra gain jahañ pe Ṭimathi naam ke ek Prabhu ke biswaasi raha. Uske amma ek biswaasi Yahuudi rahi aur uske bappa ek Greek raha.

²Lystra aur Ikoniyum ke biswaasi log Ṭimathi ke ek bahut achchha admi maanat rahin,

³aur Pol maañgat raha ki Ṭimathi uske sañghe jaay. Pol, Ṭimathi ke khatna karwaay lees kaahe ke huañ ke Yahuudi log jaanat rahin ki Ṭimathi ke pita ek Greek raha.

⁴Pol aur uske saathi log ek shahar se dusra shahar jaay ke ṭaaim biswaasi log ke bataain ki u sab hukum ke maane ke hei jon Yarushalam meñ prerit aur agua log bichaar karin hei.

⁵Chech biswaas meñ majbuut hote aur ginti meñ baṛhte gain

⁶Pol, Fruugia aur Galeshia meñ se hoy ke gais, lekin Eshia meñ Pawitr Aatma uske parchaar kare ke waaste rok dees.

⁷Mysia pahuñch ke Bithynia jaay ke kosis karin lekin Yeeshu ke Aatma huañ nai jaay dees.

⁸Mysia se hoy ke ulog Troaas meñ aay gain.

⁹Raat ke ṭaaim, Pol ke ek darshan aais ki ek Makiduni admi khaṛa hei aur chirauri kare hei, “Mekaḍonia aay jaao aur ham log ke madat karo!”

¹⁰Pol ke darshan dekhe ke baad ham log Mekaḍonia jaay maañgat raha. Ham log samajh gay raha ki Parmeshwar maañge hei ki ham log huañ jaay ke parchaar kari.

¹¹Samundar ke rasta Troaas se seedha Samothrace aur dusra din Niapulis aain.

¹²Huañ se ham Filippi pahuñcha jon Mekaḍonia ke naami shahar hei jahañ bahut Romi log rahe hei. Ham log kuchh din Filippi meñ bitaaya.

¹³Tab sabat ke din ham shahar ke gaiṭ ke bahire gaya jon nadi ke kinaare raha. Ham log sochat raha ki huañ preya kare ke waaste ek Yahuudi ke mile waala jagha rahi. Ham log beiṭh ke aurat log se baat kare laga jon huañ aay rahin.

¹⁴Huañ pe ek aurat Thuaateera shahar ke rahi jiske naam Liḍia raha. I aurat mahañga baijni (purple) kapṛa bechat rahi. I Prabhu Parmeshwar ke weshipa rahi. Prabhu uske Pol ke baat manwaais.

¹⁵Aur jab u aur uske puura palwaar baptisma le leen tab ham log se binti karte rahi, “Agar tum log sochta hei ki Prabhu meñ hamaar biswaas hei to chalke hamaar ghar pe raho.” Aakhri meñ ham log uske baat maan lia.

¹⁶Ek din ham log preya karewaala jagha jaawat raha to rasta meñ ek daasi milis. Uske paas bhawish bataay waala Aatma ke sakti raha. Bhawish bataay ke aapan maalik ke waaste khuub peisa kamaawat rahi.

¹⁷I laṛki Pol aur hamaar log ke pichchhe aayke jor se chillaay ke bole lagis, “I admi log Param Pita Parmeshwar ke daas hei, ilog tumme bataay hei ki keise bacha jaay sake hei.”

¹⁸Kuchh din tak eise hote raha. Aakhri meñ Pol ke gussa laga aur ghuum ke Aatma se bolis, “Ham tumme Yeeshu Maseeh ke naam se hukum deta hei ki tum i laṛki meñ se nikar jaao.” Aur wahi lage dusṭ aatma nikar ke chala gais.

¹⁹Jab laṛki ke maalik log dekhin ki ulog ke peisa kamaawe ke rasta band hoy gay, tab ulog Pol aur Saaylas ke pakaṛ ke koṭ meñ kheech le gain.

²⁰Ulog ofisa log ke bataain, “I Yahuudi log shahar meñ baṛa halchal machaawe hei!

²¹I log ham log ke eisan cheej kare ke bataay hei jon cheej ham Romi log ke kare ke hukum nai hei.”

²²Bheeṛ ke log Pol aur Saaylas pe jhuuṭ ke hamla kar deen. Ofisa log u duuno ke kapṛa faaṛ deen aur chaabuk maare ke hukum deen.

²³Khuub chaabuk marwaay ke baad, jel meñ band karwaay deen, aur jaila ke hukum deen ki ulog ke husiaari se dekh bhaal kare.

²⁴Jaila weisaiyeñ karis jeise uske bataawa gay raha. Ulog ke ek bheetar sell meñ rakkhis aur ulog ke goṛ ek lakṛi ke khamba meñ chain se baañdh deen.

²⁵Aadha raat ke ṭaaim Pol aur Saaylas preya karat rahin aur Parmeshwar ke bhajan gaawat rahin aur jehli log ulog ke sunat rahin.

²⁶Achaanak ek baṛa erthquaik aais aur jel nichche se uppar hil gais. Sab palla khul gay aur sab jehli log ke chain khul ke neeche gir gais.

²⁷Jaila jag gay aur tab u dekhis ki palla khula paṛa hei. U sochis ki jehli log bhaag gain hei. U aapan talwaar nikaaris aur apne aap ke maar ḍaale maañgat raha.

²⁸Tab Pol jor se chillaais, “Apne aap ke kuchh haani nai pahuñchaana, koi bhi hiañ se bhaagis nai hei.”

²⁹Tab jaila ek batti mañgwaay ke bheetar gais. U kaapte kaapte Pol aur Saaylas ke aage jaay ke ghuṭna ṭekis.

³⁰Tab ulog ke bahire laay ke bolis, “Bache ke waaste ham kaa kari?”

³¹Ulog jawaab deen, “Prabhu Yeeshu Maseeh pe biswaas karo, to tum aur tumhaar puura palwaar bach jaai.”

³²Tab Pol aur Saaylas uske aur uske ghar meñ jetna log rahat rahin, u sab ke Prabhu ke baare meñ bataain.

³³Raato raat, jaila ulog ke le jaay ke ghaao dhois. Tab u aur ghar ke sab log baptisma leen.

³⁴Ulog Parmeshwar ke biswaasi ban ke bahut khusi bhain. Iske baad, u jaila Pol aur Saaylas ke aapan ghare le gais aur kuchh khaay ke waaste dees.

³⁵Dusra roj sabere, ofisa log jaila ke ghare pulis bhejin aur bolin ki Pol aur Saaylas ke chhoṛ deo.

³⁶Jaila Pol ke bataais, “Ofisa log hamme hukum deen hei ki ham tum log ke chhoṛ dei. Ab tum log saanti se jaay sakta hei.”

³⁷Lekin tab Pol pulis se bolis, “Ham log Raom ke rahewaala hei, aur Romi saulja log sab ke saamne ham log ke bina kasuur ke aur bina mukadma ke maarin aur peeṭin. Ulog hamlog ke jel meñ feñk deen. Aur ab kaa ulog soche hei ki bina koi ke jaane ham log ke chuppe se bhej dehiyeñ? Nai, eise nai hoy sake hei. Ulog ke apne aap aay ke ham log ke bahire nikaare ke hei.”

³⁸Jab pulis jaay ke i baat ofisa log se bataais ki Pol aur Saaylas Romi hei, to ofisa log bahut ḍar gain.

³⁹Tab ulog aay ke maafi maañgin. Ulog ilog ke jel ke bahire laay ke chirauri binti karin ki ṭaaun chhoṛ ke chala jaay.

⁴⁰Lekin Pol aur Saaylas seedha Liḍia ke ghare gain, jahañ ulog kuchh biswaasi log se milin aur ulog ke hausla baṛhaain. Aur tab huañ se chala gain.