Read Hindi, Fiji Prerito ke Kaam 17 Bible Online

Prerito ke Kaam 17 - Hindi, Fiji bible

Prerito ke Kaam 17

¹Pol aur uske saathi Amfipulis aur Apullonia se hoy ke Thisluneeka meñ pahuñchin jahañ Yahuudi log ke mile waala jagha raha.

²Hardam ke rakam, Pol preya kare ke waaste Mandir gais. Teen sabat ke din u parchaar karis.

³U Parmeshwar ke vachan khol khol ke samjhaais ki Maseeh ke dukh uṭhaawe ke raha, lekin u fir se mara se jinda hoy gais. Pol, aur aage bataais ki yahi Yeeshu jiske baare meñ u bataay hei, wahi Maseeha hei.

⁴Kuchh kuchh log Pol ke baat maan leen aur ulog Pol aur Saaylas ke sañghe hoy leen. Kuchh geir Yahuudi aur kuchh khaas aurat log bhi uske baat maanin raha.

⁵Yahuudi agua log jaran kare lagin aur ulog kuchh badmaas ke leke shahar meñ bhagdaṛ (riot) machaay deen. Ulog maañgat rahin ki Pol aur Saaylas ke badmaas log ke beech meñ kar de ki ulog ke khuub maara jaay, aur ulog Jaysan ke ghare seedha chala gain.

⁶Lekin jab ulog Pol aur Saaylas ke huañ nai paain tab Jaysan aur kuchh Prabhu ke biswaasi log ke kheech le gain. Shahar ke ofisa log ke lage laay ke chillaay ke bolin, “Pol aur Saaylas sab jagha pe ulṭa pulṭa kaam karin, aur ab hiañ bhi aain hei,

⁷aur Jaysan ilog ke aapan ghar meñ rakkhis hei. I sab i bol ke ki Yeeshu raaja hei, Romi raaj ke kaanuun tuuṛe hei.”

⁸Ofisa aur huañ ke log i baat sun ke bahut ghabraay gain.

⁹Tab ulog Jaysan aur uske saathi log se jamaanat jama karwaain aur fir ulog ke chhoṛ deen.

¹⁰Wahi raat, Prabhu ke biswaasi log, Pol aur Saaylas ke Bireea bhej deen aur jeise hee huañ pahuñchin, ulog Yahuudi ke mile waala jagha pe gain.

¹¹Bireea ke log, Thisluneeka ke log se bahut achchha rahin, aur ulog khusi se sandes apnaay leen. Roj roj ilog Baaibal paṛhin ki jisse jaane sake ki i sab cheej sach hei.

¹²Bahut se log Prabhu ke biswaasi ban gain, jisman kuchh khaas Greek aurat log aur kaafi admi bhi rahin.

¹³Jab Thisluneeka ke Yahuudi agua log sunin ki Pol Bireea meñ Prabhu ke vachan sunaay hei, tab ulog huañ jaay ke Pol ke agaiñsṭ bheeṛ ke bhaṛkaay ke museebat khaṛa kar deen.

¹⁴Wahi lage uske saathi log Pol ke samundar ke kinaare bhej deen, lekin Saaylas aur Ṭimathi Bireea meñ rahe gain.

¹⁵Kuchh log Pol ke pahuñchaawe Athens tak gain, aur huañ se lauṭ ke Saaylas aur Ṭimathi ke bataain ki jetna jaldi hoy sake uske lage chala jaay.

¹⁶Jab Pol Athens meñ ulog ke agorat raha, tab huañ ke shahar ke sab muurti dekh ke bahut dukhi bhais.

¹⁷U huañ ke Yahuudi log ke mile waala jagha pe jaay ke, Yahuudi log aur jon koi huañ weship karat rahin, u sab se baat karis. Roj roj bajaar meñ jon koi se mile, u sab se baat karis.

¹⁸Usman se kuchh Ipikuuri aur kuchh Iskoiki ke guru log aay ke Pol se baad bibaad kare ke suru kar deen. Log puuchhe lagin, “I jon sab jaane waala hei, kaa bak bak kare hei?” Kuchh log to i bhi bolin, “Pol dusra deota log ke baare meñ parchaar kare hei! Iske matlab yahi rahe ki jab i Yeeshu aur ulog jon mara se jinda hoy hei, uske baare meñ baat kare hei.”

¹⁹Tab ulog Pol ke Ariyugus ke sabha meñ le gain aur bolin, “Hamme bataao, i tumhaar nawa ṭeeching kon cheej ke baare meñ hei.

²⁰Ham log tumme ajeeb ajeeb cheej bolte suna hei, aur ham log iske matlab jaane mañgta hei.”

²¹Athens ke aur dusra des ke log jon huañ aay ke bas gain raha, ulog ke nawa nawa baat sune aur kare meñ bahut maja aat raha.

²²Tab Pol kaaunsal ke aage khaṛa hoy ke bolis, Athens ke log, ham dekhta hei ki tum bahut dharmi log hei

²³Jab ham tumhaar shahar meñ ghuumat raha, tab u sab muurti ke dekha jon ke tum sab puuja karta hei. Wahi ṭaaim ham ek thaan bhi dekha jis pe likhaan raha, “Anjaan Ishwar ke Waaste.” Tumlog i bhagwaan ke puuja karta hei lekin tumlog uske nai janta hei. To ham wahi ke baare meñ bataay mañgta hei.

²⁴Yahi Parmeshwar dunia aur usman jon sab cheej hei u sab banaais hei. Yahi swarag aur dharti ke Prabhu hei, aur u admi ke banaawal Mandir meñ nai rahe hei.

²⁵Uske koi madat ke jaruuri nai hei. U jeewan dewe hei, saañs, aur baaki sab kuchh sab koi ke dewe hei.

²⁶Parmeshwar khali ek admi se puura sansaar meñ sab jaat ke log ke rahe ke waaste banaay dees hei. Aur i bhi soch lees hei ki kon log kahañ aur kab rahi.

²⁷Parmeshwar i sab eise karis, ki ham log uske khoji, aur jab ham haath baṛhaai tab u hamme mil jaay. U ham log meñ se koi se duur nai hei,

²⁸aur ham log ke sakti dewe hei ki ham log jee, chali firi, aur jeise hei weise hee rahi. “Ham log uske bachchan hei,” jeise ki kuchh kavi ya poeṭ log bolin raha.

²⁹Jab ki ham Parmeshwar ke laṛkan hei, to ham log ke nai soche ke hei ki hamaar Parmeshwar, sona, chaañdi ya patthar ke banaawal muurti ke rakam hei. U usman se u rakam nai hei jon ek insaan soch ke banaais hei.

³⁰Pichhle jamaane meñ, Parmeshwar i sab ke maaf kar dees raha, kaahe ke ulog nai jaanat rahin ki ulog kaa kare hei. Lekin ab u bataay hei ki sab koi ke sab jagha se uske bagal ghuume ke hei.

³¹U ek roj alag rakkhis hei, jab u dunia ke log ke sachchaai se nyaay kari. Aur u nyaay kare ke waaste Yeeshu ke chunis hei. Parmeshwar, Yeeshu ke jinda kar ke ham sab log se i baat saabit kar dees hei.

³²Jeise sab log sunin ki Pol bolis ki ek admi mar ke jinda hoy gais hei, to kuchh log hase lagin. Kuchh bolin, “Ham log tumhaar i baat sune ke waaste koi aur ṭaaim dega.”

³³Jab Pol kaaunsal ke sabha se chala gais,

³⁴tab kuchh log Prabhu pe biswaas karke Pol ke sañghe chal paṛin. Usman se ek Diyunusiyus raha aur ek aurat jiske naam Damris raha, aur kuchh aur log rahin, jon Prabhu pe biswaas kare lagin.