Read Hindi, Fiji Prerito ke Kaam 18 Bible Online

Prerito ke Kaam 18 - Hindi, Fiji bible

Prerito ke Kaam 18

¹Pol Athens chhoṛ ke Kurinth gais,

²huañ pe uske Akbila naam ke ek Yahuudi mila, jon Puntus meñ peida bhais raha. Thoṛa din pahile u aapan aurat Prisila ke sañghe Itaalia se aais raha. Huañ ke raaja Kloḍias hukum dees raha ki sab Yahuudi log ke Raom se nikaar deo. Pol Akbila aur Prisila ke ghare gais,

³aur dekhis ki ulog ṭenṭ banaay waala kaam kare hei. Pol bhi ṭenṭ banaat raha. Tab u wahiñ ruk gais, aur sañghe mil ke kaam kare lagin.

⁴Sab sabat ke din Pol, Yahuudi ke mile waala jagha jaawat raha. Huañ pe u Yahuudi aur geir Yahuudi log se baat cheet karat raha, aur ulog ke jeete maañgat raha.

⁵Lekin jab Saaylas aur Ṭimathi, Mekaḍonia se aain, tab Pol parchaar kare meñ ṭaaim bitaais aur Yahuudi log se bataat raha ki Yeeshu hee Maseeha hei.

⁶Aakhri meñ ulog Pol ke agaiñsṭ hoy gain aur uske beijjati karin. Tab u aapan kapṛa se garda jhaaṛ ke bolis, “Jon kuchh bhi tumhaar sañghe hoi, uske jimmewaar tum khud hoyga! Hamaar koi kasuur nai hei. Ab se ham geir Yahuudi log ke parchaar karega.”

⁷Pol huañ se Titius Yustus naam ke ek admi ke ghare gais. U Parmeshwar ke weship karat raha aur wahiñ Yahuudi chech ke bagle meñ rahat raha.

⁸Krispus u Yahuudi ke mile waala jagha ke agua raha. Uske puura palwaar aur u Prabhu ke biswaasi ban gain. Kurinth ke aur log bhi sandes sunin, aur u sab log jon Prabhu meñ biswaas karin, baptisma leen.

⁹Ek raat Prabhu, Pol ke darshan deke bolis, “Ḍarna nai, parchaar karte rahna. Rukna nai!

¹⁰Ham tumhaar sañghe hei, aur tumhaar koi kuchh bigaaṛe nai saki. I shahar meñ bahut se hamaar aapan log hei.”

¹¹Pol wahiñ Kurinth meñ ek aur aadha saal ruk ke, Parmeshwar ke vachan log ke sikhaat raha.

¹²Jab Gallio, Akhaaya ke gavna raha, tab kuchh Yahuudi agua log bichaar karke uspe mukadma chalaawe ke khaatir koṭ meñ kheech laain,

¹³aur bolin, “I admi ham log ke Parmeshwar se preya kare ke eise sikhaawe hei jon ham log ke kaanuun se alag hei!”

¹⁴Aur Pol ke bole se pahile, Gallio bol paṛis, “Agar i admi koi kasuur ya koi galti kare hota, tab ham tum log ke baat sunta.

¹⁵Lekin tum log ke chinta, khali shabd, naam aur tumhaar aapan kaanuun ke baat hei, tum log khud suljhaay leo. Eisan baat ke ham mukadma nai karta.”

¹⁶Tab Gallio ulog ke koṭ meñ se bahire bhej dees.

¹⁷Bheeṛ mil ke Yahuudi ke agua Sosthines ke koṭ ke saamne khuub peeṭin. Lekin Gallio ke i sab baat ke kuchh parwaah nai raha.

¹⁸Pol kuchh din Prabhu ke biswaasi log ke sañghe Kurinth meñ rahe ke samundar ke rasta Siria chala gay. Uske sañghe Akbila aur Prisila bhi gain. Lekin Pol lauṭe se pahile Kinkhria meñ jaay ke aapan muuṛ munḍa karaay lees kaahe ke u Parmeshwar se eise promis karis raha.

¹⁹U teeno Ifisus pahuñchin, jahañ Pol Prisila aur Akbila ke chhoṛ dees aur tab u apne Yahuudi ke mile waala jagha jaay ke huañ sab log se baat cheet karis.

²⁰Huañ ke log usse chirauri karin ki kuchh din aur ruk jaay lekin Pol nai maanis.

²¹Pol ulog se bida leke bolis, “Agar Parmeshwar chaahi, to ham fir se tum log ke lage lauṭ ke aayga.”

²²Pol jahaaj meñ beiṭh ke Kaisaria pahuñchis, aur huañ ke chech ke log se bheñṭ karis. Fir u Antaakia chala gais.

²³Kuchh din huañ rahe ke baad, u kaafi jagha Galeshia aur Fruugia meñ ghuumis. U chela log ke madat karis ki ulog aapan biswaas meñ majbuut rahe.

²⁴Ek Yahuudi admi jiske naam Apullos raha, Ifisus aais. Apullos Elekszenḍria meñ peida bhais raha. U baat kare meñ bahut aage raha aur Baaibal ke baare meñ bahut kuchh jaanat raha.

²⁵U Prabhu ke baare meñ bhi bahut kuchh jaanat raha, aur baṛa jor tor se man lagaay ke Yeeshu ke baare meñ sahi sahi baat sunaawat raha. Jon kuchh u Yeeshu ke baare meñ sikhaat raha, u raaiṭ raha, lekin baptisma ke baare meñ, khali wahi jaanat raha jon Yuhanna se sunis raha.

²⁶Apullos bina ḍar ke, mile waala jagha pe bole laga lekin Prisila aur Akbila uske baat sun ke uske aapan ghare laain aur Parmeshwar ke rasta jaane meñ aur madat karin.

²⁷Apullos, Akhaaya jaay ke waaste bichaar karis. Prabhu ke biswaasi log ek chiṭṭhi likh ke huañ ke biswaasi log se bataain ki Apullos ke achchha se welkam kare. Huañ pahuñch ke Parmeshwar ke daya se Prabhu Yeeshu meñ biswaasi log ke khuub madat karis.

²⁸Huañ u Yahuudi log se kaṛa baad-bibaad karis, aur sabha meñ Baaibal paṛh ke sabuut dees ki Yeeshu hee Maseeha hei.