Read Hindi, Fiji Prerito ke Kaam 19 Bible Online

Prerito ke Kaam 19 - Hindi, Fiji bible

Prerito ke Kaam 19

¹Jab Apullos, Kurinth meñ raha, tab Pol pahaaṛi rasta se Ifisus aais aur Prabhu ke biswaasi log se milis.

²Ulog se u puuchhis, “Jab tum log aapan biswaas Yeeshu meñ rakkha, kaa tum log ke Pawitr Aatma mila?” “Nai!” ulog jawaab deen. “Ham log Pawitr Aatma ke baare meñ kabhi suna tak nai.”

³“Tab kaahe ke baptisma lia?” Pol puuchhis. Ulog jawaab deen, “Kaahe ke yahi Yuhanna sikhaais raha.”

⁴Pol jawaab dees, “Yuhanna, log ke baptisma i kaaran dewat raha ki ulog Parmeshwar ke bagal ghuum jaay. Lekin ulog ke u i bhi bataais ki koi aur aawe hei, aur ulog ke biswaas usman kare ke hei. Yeeshu hee raha jiske baare meñ Yuhanna baat karat raha.”

⁵Jab log Pol ke i baat sunin, tab ulog Prabhu Yeeshu ke naam ke baptisma leen.

⁶Tab Pol aapan haath ulog ke uppar rakkhis, aur Pawitr Aatma ulog ke dewa gais, aur ulog bahut rakam ke bhaasha meñ bole lagin aur aage hoy waala baat bataay lagin.

⁷I grup meñ lagbhag baarah admi log rahin.

⁸Teen mahina tak Pol Yahuudi log ke mile waala jagha jaay ke bina ḍar ke Parmeshwar ke raaj ke baare meñ baat karis. U ulog ke kosis karke jeete maañgat raha,

⁹lekin usman se kuchh log jiddi rahin aur uske baat nai maanin. Sab ke saamne ulog Parmeshwar ke rasta ke baare meñ kharaab baat bole lagin. Pol aapan chela log ke huañ se leke chala gais. U Turannus ke lekcha hol meñ parchaar kare laga. U huañ pe dui saal tak

¹⁰sab roj parchaar karis, jab tak Eshia meñ har ek Yahuudi aur geir Yahuudi Prabhu ke sandes sun nai lees.

¹¹Parmeshwar, Pol ke sakti dees ki u baṛa chamatkaari kaam kare sake.

¹²Hiañ tak ki jon rumaal aur oṛhni Pol ke deñhi se chhuaay jaat raha, ulog uske leke u sab log ke lage le jaay jon bimaar rahin. Sab bimaar log achchha hoy jaawat rahin, aur dushṭaatma bhi nikar jaawat raha.

¹³Kuchh Yahuudi log dushṭaatma ke nikaare ke waaste Prabhu Yeeshu ke naam leke bhagaawe lagin. Ulog dushṭaatma se bolin, “Bahire nikro, wahi Yeeshu ke naam se jiske baare meñ Pol parchaar kare hei!”

¹⁴Sikva naam ke ek Yahuudi baṛa paadri ke saat laṛkan i kaam karat rahin,

¹⁵jab dushṭaatma ulog se bolis, “Ham Yeeshu ke janta hei! Aur ham Pol ke naam bhi suna hei. Lekin tum kon hei?”

¹⁶Tab u admi jisman dushṭaatma raha, ulog ke uppar kuud paṛa aur khuub maaris aur peeṭis. Ulog choṭaay ke ghar se bahire nañge bhaag paṛin.

¹⁷Ifisus ke rahe waala Yahuudi aur geir Yahuudi jab i baat sunin tab ulog ekdam ḍar gain aur Prabhu Yeeshu ke naam ke baṛaai kare lagin.

¹⁸Bahut biswaasi log aapan baare meñ sab se bataay lagin ki ulog kon kon kharaab kaam karin raha.

¹⁹Kuchh log jon jaadu ṭona karat rahin, ulog aapan sab buks baṭor ke sab ke saamne jaraay deen. I sab buks ke daam koi lagbhag pachaas (50) hajaar chaañdi ke sikka raha.

²⁰To Prabhu ke vachan feilte gais aur jaada majbuut hote gais.

²¹I sab hoy ke baad, Pol aapan man meñ sochis ki u Mekaḍonia aur Akhaaya se hoy ke Yarushalam jaai. Pol bolis raha, “Huañ jaay ke baad ham Raom bhi jaayga.”

²²Tab u aapan dui madadgaar Ṭimathi aur Iraastus ke Mekaḍonia bhejis. Lekin u apne Eshia meñ kuchh din aur ruk gais.

²³U ṭaaim huañ Prabhu ke rasta pe chale ke waaste, bhaari bhaari ṭrabal howat raha.

²⁴Demetriyus naam ke ek sonaar, jis ke paas ek biznes raha jon chaañdi ke Armetis goḍas ke Mandir ke models banaat raha. Uske khaatir jon jon kaam karat rahin, ulog bahut peisa kamaat rahin.

²⁵Jon jon i biznes karat rahin ulog ke Demetriyus bolaay ke bolis, Dost log, tum log to janta hei ki yahi se ham log ke roji roṭi chale hei.

²⁶Lekin tum log to dekha aur suna hei ki keise i admi Pol bahut log ke dukh pahuñchaais hei, khali Ifisus meñ nai lekin puura Eshia meñ, sab jagha i baat ke jor deke bataay hei ki haath ke banaawal cheej, Parmeshwar bilkul nai hoy sake hei.

²⁷Sab koi ham log ke kaam ke baare meñ ulṭa seedha baat kari. U sab i mahaan Devi Artimis ke Mandir, jiske puura Eshia aur dunia puuja kare hei, uske naam maṭṭi meñ milaay dei. Aur sab iske bhuul jaai!

²⁸Jab kaam kare waala log i sab sunin, tab gussa se bhar gain aur chillaay chillaay ke bole lagin, “Ifisus ke Devi, Artimis, mahaan hei!”

²⁹Jaldi se puura ṭaaun meñ halchal mach gais, aur kuchh log Gayus aur Aristarkhus ke pakaṛ le gain. I duuno Mekaḍonia se Pol ke sañghe aain raha. Tab sab koi udhar bhaagin, jahañ ṭaaun meñ meeṭing howat raha.

³⁰Pol maañgat raha ki u jaay ke sab log se baat kare, lekin Prabhu ke chela log uske jaay nai deen.

³¹Huañ ke kuchh ofisa log Pol ke frenḍs rahin, aur ulog bhi Pol ke lage khabar bhejin ki huañ u nai jaay.

³²Sabha meñ kuchh log ek baat bol bol ke chillaat rahin aur baaki log kuchh aur bolat rahin. Sab koi ekdam konfius rahin, aur kaafi log i nai jaanat rahin ki ulog huañ kaahe aain hei.

³³Kuchh Yahuudi agua log, Elekszenḍa naam ke ek admi ke aage khaṛa kar deen aur uske bataay lagin ki kaa bole ke hei. U haath se ishaara kar ke samjhaawe laga ki kon cheej howe hei.

³⁴Lekin jab bheeṛ dekhis ki u ek Yahuudi hei, tab sab koi dui ghanṭa tak chillaain, “Ifisus ke Devi, Armitis mahaan hei!”

³⁵Aakhri meñ, ṭaaun ke ek ofisa sab ke chuppe karaais. Tab u bolis, “Ifisus ke log, dunia meñ kon nai jaane hei ki ham log ke ṭaaun meñ Devi Armitis ke puuja kara jaay hei? Kon nai jaane hei ki uske muurti jon swarag se gira raha, hiañ ham log ke lage hei?

³⁶Sab log i baat maane hei, to ham log ke saanti hoy jaay ke chaahi aur kuchh beokuufi nai kare ke chaahi.

³⁷Tum eisan admi log ke hiañ laaya hei jon hamlog ke Mandir ke naa to luuṭis hei aur naa hee ham log ke Devi ke bura bhala bole hei.

³⁸Agar Demetriyus aur uske kaam kare waala log khusi nai hei, to ham log ke lage koṭ aur jaj bhi hei. Ulog ke huañ jaay ke komplain kare ke hei.

³⁹Lekin agar tum log isse jaada kare mañgta hei, to siṭi kaaunsal ke lage i baat laay sakta hei.

⁴⁰Ham log pe asaani se iljaam lage sake hei ki ham log aaj hiañ upadrao karwaaya hei. Iske koi kaaran (excuse) nai hei! Ham log to i upadrao ke koi kaaran bhi nai dewe sakta hei.”

⁴¹Etna sab bol ke ulog ke bataais ki sab koi huañ se chala jaay.