Read Hindi, Fiji Prerito ke Kaam 2 Bible Online

Prerito ke Kaam 2 - Hindi, Fiji bible

Prerito ke Kaam 2

¹Penṭikosṭ ke din sab Maseeh bhaai ek jagha jama bhain.

²Achaanak asmaan se baṛa jor se hawa ke jhoka ke awaaj aais. Awaaj se puura ghar jahañ ulog beiṭha rahin bhar gais.

³Tab ulog kuchh dekhin jon dekhe meñ aagi ke rakam jeebh chaaro taraf ghuumat raha aur ek jeebh aay ke sab ke uppar utar gais.

⁴Sab log Pawitr Aatma se bhar gain aur Pawitr Aatma ke taagat se bole ke suru kar deen. Ulog rakam rakam ke bhaasha bole lagin.

⁵Dunia ke sab des ke Yahuudi dharam premi log Yarushalam meñ rahat rahin.

⁶Aur jab ulog i awaaj sunin, ek bheeṛ baṭur gais. Lekin ulog chakit bhain, kaahe ke ulog sab kuchh apne bhaasha meñ sunat rahin.

⁷Ulog achambha karin aur chakit bhain, aur bolin, Kaa i sab jon baat kare hei, Galeel se nai aain hei?

⁸Tab kaahe ke ham ilog ke aapan bhaasha meñ bolte sunta hei?

⁹Ham meñ se kuchh log Paarthi, Media, Yelaam ke hei. Aur log Mesopotaamia, Juḍia, Kappduukia, Pontus, Eshia,

¹⁰Frugia, Pamfuulia, Ijipt, aur Cyrenee ke nagichche Leebia ke kuchh bhaag, Raom,

¹¹Kreeṭ aur Arebia ke rahin. Ham meñ se kuchh Yahuudi peida bhay raha, aur kuchh chunin ki Yahuudi rahe. Fir bhi ham ulog ke sunta hei ki ham log ke bhaasha meñ achchha achchha baat sunaay hei jon cheej Parmeshwar karis raha.

¹²Sab chakit rahe gain aur ghabraay ke ek dusra se bole lagin, “Iske kaa matlab hei?”

¹³Lekin aur log i baat bol ke chela log ke hasi uṛaawe lagin, “I log nasa meñ hei.”

¹⁴Tab Peeṭa gyaara (11) chela log ke sañghe khaṛa hoy ke jor se aur safa se bolis: Dost log aur Yarushalam ke rahe waala log, hamaar baat ke achchha se suno!

¹⁵I baat samajh lo, ki i log nasa meñ nai hei jeise tum log sochta hei, kaahe ki abhi saber hei aur khali nao baja hei.

¹⁶Lekin baat yahi hei ki jon Parmeshwar nabi Joyel se bolwaais raha,

¹⁷“Aakhri din jab aai, ham aapan Aatma sab ke dega. Tumhaar beṭa, beṭi aay waala ṭaaim ke baare meñ bataai. Tumhaar naojawaan ke nawa khayaal dega, aur tumhaar buḍḍha log sapna dekhiyeñ.

¹⁸Aur u ṭaaim ham aapan sewak, duuno aurat aur admi ke aapan Aatma dega jon bhawish ke baare meñ bataai.

¹⁹Ham uppar asmaan meñ chamatkaari kaam aur neeche dharti pe adbhut cheenha jeise ki khuun, aagi aur dhuañ ke baadar dekhaayga.

²⁰Prabhu ke mahaan din aawe se pahile, suuraj añdhera hoy jaai, aur chaañd khuun ke rakam laal rahi.

²¹Lekin jon koi Prabhu ke naam lei, uske bachaay lewa jaai.

²²Ab suno, Naasrat ke rahewaala Yeeshu ke baare meñ ham kaa bolta hei. Uske Parmeshwar sakti dees raha ki aapan chamatkaari kaam se saabit kar de, aur i sab kaam Yeeshu tumhaar saamne karis, jon tum sab log janta hei.

²³Ishwar pahile se plen banaay lees raha ki keise Yeeshu ke tum log ke saup dewa jaai. Aur tum log uske dushṭ log ke haath meñ deke kros pe chaṛhaay ke maar ḍaala.

²⁴Lekin Parmeshwar uske maut ke bandhan se bachaay lees aur fir jinda kar dees. Eise hoy nai sakat raha ki maut uske aapan sakti se roke rahe.

²⁵Jon Ḍeiviḍ bolis, u sachche ke Yeeshu ke vachan hei, “Ham hardam Prabhu ke aapan lage dekhta hei, u hamaar raaiṭ taraf hei ki ham kabhi bhi ḍarega nai.

²⁶Yahi ke waaste hamaar man khusi hei dil aanand se bhara hei, ab ham aasha meñ jeewan bitaayga

²⁷Prabhu hamme kabar meñ nai chhoṛi. Ham uske Pawitr jan hei aur u hamaar deñhi ke saṛe nai dei.

²⁸U hamme jeewan ke rasta dekhaais hei, aur u hamme aapan sañghe rakh ke hamme khusi kare hei.”

²⁹Hamaar dost log, ham tumse aapan ensesṭa Ḍeiviḍ ke baare meñ bataay mañgta hei. U mar gais, uske maṭṭi dewa gais aur uske kabar aaj bhi hei.

³⁰Lekin Ḍeiviḍ ek nabi raha, aur u jaanat raha ki Parmeshwar aapan promis puura kari. Parmeshwar uske bataais raha ki ek din uske palwaar meñ se ek jan ke raaja banaai.

³¹Ḍeiviḍ jaanat raha ki i hoi, aur u hamlog ke bataais ki Maseeh fir se jinda hoi. U bolis ki Parmeshwar uske kabar meñ nai rahan dei ya uske deñhi saṛan dei.

³²Ham log sab tumme bataay sakta hei ki Parmeshwar Yeeshu ke jinda kar dees!

³³Yeeshu ke uppar swarag meñ le gain jahañ Ishwar ke raaiṭ saaiḍ beiṭhi. Yeeshu ke Pawitr Aatma mila jeise Parmeshwar promis karis raha. Yeeshu ham log ke Pawitr Aatma dees jon ham log dekhta aur sunta hei.

³⁴Ḍeiviḍ uppar swarag meñ nai gais. U aapan baare meñ nai bolat raha jab u bolis,“Prabhu hamaar Prabhu se bolis hei, hamaar raaiṭ saaiḍ beiṭho,

³⁵jab tak u hamaar Prabhu ke dusman log ke aapan goṛ ke nichche nai kar dei.”

³⁶Israayel meñ sab ke i baat jaan jaay ke chaahi ki tum Yeeshu ke kros pe chaṛhaay ke maar ḍaala, lekin Parmeshwar, wahi ke Prabhu aur Maseeh duuno banaay dees.

³⁷I baat sunke sab log baṛa dukhi bhain. Ulog Peeṭa aur uske saathi log se puuchhin, “Bhaai log, ham kon cheej kari?”

³⁸Peeṭa bolis “Dil badlo! Aapan paap chhama kare ke waaste Yeeshu Maseeh ke naam se baptisma leo, tab tumme Pawitr Aatma mili.

³⁹I promis tumhaar aur tumhaar laṛkan ke waaste hei aur u sab ke waaste hei jiske Prabhu Parmeshwar chuni, chaahe ulog jahañ bhi rahi.”

⁴⁰Peeṭa aur bahut baat ulog ke bataais. Tab u bolis, “Ham chirauri karta hei ki apne aap ke bachaay ke rakkho u sab cheej se jon i bura log ke saathe hoi.”

⁴¹Jon log Peeṭa ke updes ke maan leen ulog baptisma le leen, aur u roj lagbhag teen hajaar log Maseeh ke biswaasi ban gain.

⁴²Ulog prerit log se shikte rahin, aur ek palwaar ke rakam ek dusra ke sañghe rahin, aur Prabhu bhoj meñ bhaag leen, aur ek saathe preya karin.

⁴³Chela log ke chamatkaari kaam dekh ke sab log chakit rahin.

⁴⁴Sab biswaasi log hardam milat rahin aur ek dusra ke cheej bina rukaawaṭ ke kaam meñ laawat rahin.

⁴⁵Ulog aapan cheej aur samaan bech ke peisa ulog ke de dewat rahin jiske jaruurat raha.

⁴⁶Sab roj Mandir meñ milat rahin, paari paari sab ke ghare Prabhu bhoj lewat rahin. Aur khusi khusi khaana baaṭ ke khaawat rahin,

⁴⁷aur Parmeshwar ke baṛaai karte rahin. Sab koi ulog ke laaik karin, aur har roj jon log bachaawa gain raha Prabhu ulog ke grup meñ joṛ dees.