Read Hindi, Fiji Prerito ke Kaam 20 Bible Online

Prerito ke Kaam 20 - Hindi, Fiji bible

Prerito ke Kaam 20

¹Jab upadrao (riot) khalaas hoy gais, tab Pol sab chela log ke bolaay ke hausla baṛhaais. Tab Pol ulog se bida leke Mekaḍonia chala gais.

²U ek jagha se dusra jagha ghuumat raha, aur u aapan biswaasi log ke sandes de ke hausla baṛhaate raha. Fir huañ se u Grees chala gais

³aur huañ teen mahina tak rahis. Huañ se Pol jahaaj se Siria jaay waala raha, jab uske pata lagis ki kuchh Yahuudi agua log uske jaal meñ fasaawe maañge hei, to u Mekaḍonia ke rasta se lauṭ gais.

⁴Uske sañghe, Firrus ke laṛka Soptrus jon Bireea ke raha, aur Thisluneeka se Sikundus aur Aristarkhus rahin. Dirbe se Gayus aur Ṭimathi aur dui Eshians Tukhikus aur Trufimus bhi Pol ke sañghe gain.

⁵Ulog aage jaay ke Troaas meñ ham log ke agorat rahin.

⁶Akhmeeri roṭi ke teohaar ke baad ham Filippi se jahaaj pe chal paṛa aur paañch roj baad ulog se Troaas meñ mila aur ek hapta huañ raha.

⁷Hapta ke pahila din raha aur ham log roṭi tuuṛe ke waaste ek jagha baṭura raha. Pol ke dusra roj sabere jaay ke raha, to u sab log se aadha raat tak baat karat raha.

⁸Uppar ke ruum meñ jahañ ham log baṭura raha, huañ bahut jaada batti raha.

⁹Yutukhus naam ke ek jawaan admi khiṛki pe beiṭha raha. Jab Pol baat karte raha, tab Yutukhus ke bahut jor neeñd laga. Aakhri meñ u soy gais aur teen sṭori ghar se u graauñḍ pe gir paṛa. Jab ulog uske uṭhaais, to u mar gais raha.

¹⁰Pol jaay ke Yutukhus ke uppar jhuka. U uske aapan haath meñ uṭhaay ke bolis, “Wari nai karo! I jinda hei.”

¹¹Jab Pol fir se uppar gais, u roti tuuṛis, aur ham log ke sañghe khaais. Fir u sabere tak ham log se baat karis aur chala gais.

¹²Tab biswaasi log u jawaan admi ke jinda ghare laain aur bahut khusi bhain.

¹³Pol, Asos tak paidar chale ke sochis. Ham baaki log jahaaj meñ chaṛh ke aage chala gaya, aur wahiñ pe ham log ke uske jahaaj pe lewe ke raha.

¹⁴Jab u hamlog ke Asos meñ mila, u jahaaj pe aais, aur ham log sab Mitileen chala gaya.

¹⁵Dusra din hamlog ek jagha pahuñcha jon Khiyus ke nagichche raha, aur uske dusra din ham log Saamus pahuñcha. Uske ek roj baad ham log sab jahaaj meñ Miletus chala gaya.

¹⁶Pol Eshia meñ bahut ṭaaim nai bitaay maañgat raha, to yahi kaaran u sochis ki Efisus ke bagal se nikar jaay. U jaldi meñ raha, aur uske dil meñ raha ki u Penṭikosṭ ke din Yarushalam meñ rahe.

¹⁷Miletus se Pol Efisus ke chech ke agua log ke lage khabar bhejis ki ulog aay ke usse mile.

¹⁸Jab ulog huañ aain, u bolis, “Tum log sab kuchh janta hei jon ham kara, jab ham sab se pahile Eshia aay ke tum log ke saathe raha.

¹⁹Kuchh Yahuudi log hamaar agaiñsṭ kaam karin aur hamme bawaal meñ fasaay deen aur sataain. Lekin ham chhoṭa ban ke aur Prabhu ke sewa karte raha.

²⁰Jab ham sab ke saamne parchaar kara ya ghar ghar jaay ke sikhaaya to koi bhi baat jon tumme madat kari, uske bole se ham ruka nai.

²¹Ham Yahuudi aur geir Yahuudi log ke bataaya ki Parmeshwar ke uppar aapan man lagaao aur Prabhu Yeeshu Maseeh pe biswaas karo.

²²Ham nai janta hei ki Yarushalam meñ hamaar uppar kaa beeti, lekin Parmeshwar ke Aatma ke baat maan ke ham huañ jaata hei.

²³Jon jon shahar meñ ham jaata hei, Pawitr Aatma hamme yahi bataay hei ki hamme jel meñ rakkha jaai, aur Yarushalam meñ dukh aur museebat aai.

²⁴Lekin hamme parwaah nai ki hamaar uppar kaa hoi, jab tak ham u kaam puura nai kari jon Prabhu Yeeshu hamme dees hei. Aur u kaam i hei ki Parmeshwar ke mahaan daya ke baare meñ susamaachaar bataawa jaay.

²⁵“Ham ek jagha se dusra jagha ghuum ghuum ke Parmeshwar ke raaj ke baare meñ parchaar kara, lekin ab ham janta hei ki tum log hamme fir se kabhi nai dekhega.

²⁶Ham aaj tumme bataata hei ki ab ham, tum log koi ke jimmewaar nai hei!

²⁷Ham tum log se sab kuchh bataay dia hei jon Parmeshwar maañgat raha ki tum log jaano.

²⁸Apne aap ke dekhbhaal karo aur u sab log ke bhi jon log ke Pawitr Aatma tumme sambhaale ke dees hei. Parmeshwar ke chech ke shepaḍ ke rakam raho. I wahi jhunḍ hei jon ke Parmeshwar aapan laṛka ke khuun se khareedis hei.

²⁹Ham janta hei ki hamaar jaay ke baad, baaki sab log tum pe jañgli bheṛiya ke rakam hamla kari.

³⁰Tum log ke aapan log ke beech se kuchh eisan log jhuuṭ bol ke Prabhu ke log ke aapan taraf kar lei.

³¹Yahi kaaran husiaar raho! Yaad rakhna keise teen saal se ham roy roy ke raat aur din tum log ke chetaaoni det raha.

³²“Ab ham tum log ke Parmeshwar ke haath meñ saup deta hei. Parmeshwar ke mahaan daya ke sandes ke hardam yaad rakhna! I sandes tumme madat kari aur u sab cheej tumme dei jon Parmeshwar ke biswaasi log ke waaste hei.

³³Ham kabhi bhi koi se peisa ya kapṛa latta nai maañga.

³⁴Tum log to janta hei ki keise ham aapan haath se kaam kar ke aapan aur aapan saathi log ke peṭ bhara.

³⁵Lekin jon kuchh bhi ham kara, ham tumme dekhaaya ki tum sab ke ulog ke waaste kaam kare ke hei jon kamjor hei. Yaad rakhna jon ham log ke Prabhu Yeeshu Maseeh bolis raha, 'Lewe se jaada dewe meñ aasheesh mile hei.’ ”

³⁶I sab baat kare ke baad, Pol sab ke sañghe ghuṭna ṭek ke preya karis.

³⁷Sab koi rowe lagin, uske gale milin aur chumma leen.

³⁸Ulog soch karin kaahe ke Pol ulog se bolis raha, “Tum log hamme ab kabhi nai dekhega.” Tab ulog sab uske sañghe jahaaj tak gain.