Read Hindi, Fiji Prerito ke Kaam 21 Bible Online

Prerito ke Kaam 21 - Hindi, Fiji bible

Prerito ke Kaam 21

¹Ulog se bida lewe ke baad, ham log jahaaj se seedha Kos gaya. Dusra din ham log Rudus pahuñcha aur huañ se ham log jahaaj se Patra gaya.

²Ham log ke pata laga ki ek jahaaj Finiki jaay hei aur usman beiṭh ke ham log chal dia.

³Ham log ke jab Saaypras dekhaai dees, tab uske saauth bagal se nikar ke Siria pahuñcha aur huañ Taaya (Tyre) meñ utar gaya jahañ pe jahaaj se maal utaare ke raha.

⁴Huañ hamlog Prabhu ke chela log se bheñṭ kara aur wahi log ke saathe ek hapta tak raha. Pawitr Aatma ulog ke bataais ki Pol ke samjhaay deo ki u Yarushalam nai jaay.

⁵Lekin ek hapta ke baad, ham log fir se huañ se chal paṛa. Sab admi log, aapan aapan aurat aur laṛkan ke sañghe, ham log ke saathe ṭaaun se samundar ke kinaare tak aain. Ham log huañ ghuṭna ṭek ke preya kara.

⁶Tab ek dusra se bida leke, ham log jahaaj meñ beiṭh gaya aur ulog aapan ghare lauṭ gain.

⁷Ham log Taaya (Tyre) se samundar ke rasta Patulimais pahuñcha aur huañ biswaasi log se bheñṭ mulaakaat bhay, aur ek din ulog ke sañghe raha.

⁸Dusra din ham log Kaisaria gaya, aur Filip ke ghare jaay ke raha. Filip ek parchaarak raha. U saato meñ se ek raha jon prerit log ke kaam meñ madat karat raha,

⁹aur uske lage chaar laṛki rahin jon ke saadi nai bhais raha, jon aay waala din ke baare meñ bataat rahin.

¹⁰Ham log Kaisaria meñ kuchh din raha, jab Agbus naam ke ek nabi Juḍia se aais.

¹¹U Pol ke peṭi leke aapan haath aur goṛ baañdh lees. Tab u hamlog se bolis, “Pawitr Aatma bole hei ki i jiske peṭi hei, uske Yahuudi ke kuchh agua log Yarushalam meñ baañdh dei aur geir Yahuudi log ke haath meñ bhi de dia jaai.’

¹²Jab Agbus i bataay dees, tab ham log aur huañ ke biswaasi log Pol se chirauri kara ki u Yarushalam nai jaay.

¹³Lekin Pol jawaab dees, “Tum log roy roy ke hamaar dil kaahe tuuṛta hei? Prabhu Yeeshu ke khaatir naa to ham khali jel meñ jaay ke waaste lekin uske waaste ham Yarushalam meñ mare ke bhi taiyaar hei!”

¹⁴Jabki hamlog Pol ke nai manaay paaya, tab haar maan ke ham log preya kara, “Prabhu, ham log wahi kari jon tum mañgta hei.”

¹⁵Tab ham log Yarushalam jaay ke waaste taiyaar hoy gaya.

¹⁶Prabhu ke kuchh biswaasi log Kaisaria se ham log ke sañghe aain aur Manason ke ghare rahe ke waaste le gain. Manason, Saaypras ke rahe waala raha aur suru se ek biswaasi raha.

¹⁷Jab ham Yarushalam pahuñcha, to Prabhu ke biswaasi log ham log se mil ke khusi se welkam karin.

¹⁸Dusra roj Pol ham log ke sañghe Jeims se mile gais, aur huañ pe chech ke agua log baṭurin raha.

¹⁹Pol ulog se prem se milis aur bataais ki keise Parmeshwar uske iyuz karis aur u geir Yahuudi log ke madat karis raha.

²⁰Jon sab log i baat sunin, Parmeshwar ke baṛaai karin aur Pol se bolin, Hamaar dost, tum to dekhta hei ki kai das hajaar Yahuudi log Prabhu ke biswaasi ban gain hei! Aur u sab Maozas ke kaanuun ke maane hei.

²¹Lekin ulog ke bataawa gay hei ki tum geir Yahuudi ke beech meñ rahewaala Yahuudi log ke sikhaata hei ki kaanuun ke nai maano. Ulog bole hei ki tum ulog ke bataaya hei ki aapan laṛka log ke khatna nai karaao aur Yahuudi log ke reeti riwaaj pe nai chalo.

²²Ab ham log kaa kari ki sab log ke to pata lag gais hei ki tum hiañ hei?

²³Plees wahi karo jon ham tum se bolta hei, kaahe ke ham log meñ se chaar log Parmeshwar se khaas promis karin hei.

²⁴Ulog ke saathe hoy leo aur apne aap ke taiyaar karke ulog ke dharam ke kaam meñ jeise promis kara gais raha, usman bhaag leo. Ulog ke muuṛ muṛwaay ke waaste peisa deo. Tab sab koi jaan jaai ki jon baat tumhaar baare meñ suna gais hei, u sach nai hei. Ulog jaan jaai ki tum Maozas ke kaanuun ke maanta hei.

²⁵Kuchh din bhay ham log geir Yahuudi log se bataay raha ki ulog ke kaa kare ke chaahi. Ham log ulog ke sikhaaya ki muurti pe chaṛhaawal cheej nai khaay ke hei. Ulog ke aur bataawa gay raha ki jon gos meñ khuun laga rahe hei, ya u jaanwar ke gos, jiske gaṭai dabaay ke maara gais hei, uske nai khaana. Ulog ke aur bhi bataawa gay raha ki byabhichaar waala neech kaam bhi kabhi nai karna.

²⁶Dusra roj Pol u chaar admi log ke aapan sañghe le gais aur wahi ṭaaim apne bhi taiyaar hoy gais. Tab u Mandir meñ gais, aur bataais ki kab aakhri seremani hoi aur kab ulog ek ek ke waaste bali chaṛhaai.

²⁷Saat din baad, Eshia ke Yahuudi log Pol ke Mandir meñ dekhin. Ulog ek baṛa bheeṛ baṭor ke uspe hamla kare lagin.

²⁸Ulog chillaat rahin, “Dost log, hamme madat karo! I admi sab jagha jaay hei, aur ham log ke des aur Maozas ke kaanuun aur i Mandir ke baare meñ kharaab kharaab baat bole hei. Hiañ tak ki i geir Yahuudi log ke i Mandir meñ laay ke i pawitr jagha ke meila kare hei.”

²⁹Kuchh log sochin ki Pol Efisus ke rahewaala Trufimus ke Mandir meñ laais hei kaahe ke ulog Pol aur Trufimus ke shahar meñ sañghe dekhe rahin.

³⁰Puura siṭi meñ halchal mach gais, aur log apne meñ laṛe bhiṛe lagin. Ulog Pol ke pakaṛ ke, Mandir se ghaseeṭ ke bahire kar deen, aur achaanak palla bañd hoy gais.

³¹Ulog Pol ke jaan se maare jaat rahin, jab Romi saulja ke sardaar sunis ki puura Yarushalam meñ dañga fasaad suru hoy gais hei.

³²Jurte u kuchh saulja aur ofisa log ke leke, huañ dauṛ ke gais jahañ sab log baṭurin raha. Jeise ulog sardaar aur ofisa log ke dekhin, ulog Pol ke maare ke bañd kar deen.

³³Aami komaanḍa jaay ke Pol ke pakaṛ lees aur dui chain se uske bañdhwaay dees. Tab u jaane ke kosis karis ki Pol kon hei aur kaa karis raha.

³⁴Kuchh log chillaay ke ek cheej bolat rahin aur baaki log kuchh aur chillaat rahin. Lekin ulog etna halla karat rahin ki sardaar kuchh nai jaane paais. Tab sardaar Pol ke ek foṭres meñ le jaay ke hukum dees.

³⁵Jeise ulog seeṛhee tak pahuñchin, bheeṛ aur jor se chillaay lagin, ki saulja log Pol ke godi meñ uṭhaay ke bhittar le gain.

³⁶Bheeṛ pichchhe pichchhe chillaate aain, “Jaan se maar deo! Jaan se maar deo!”

³⁷Jab Pol ke foṭres meñ le jaawa jaat raha, tab u komaanḍa se bolis, “Kaa ham tumse kuchh bole sakta hei?” “Tum Greek bhaasha keise janta hei?” sardaar usse puuchhis.

³⁸“Kaa tum Ijipt des ke nai hei jon thoṛa deri pahile dañga fasaad suru karis raha, aur ḍezaṭ meñ chaar hajaar ṭerarisṭ ke le gay raha?”

³⁹“Nai!” Pol bolis. “Ham to Tarsus, jon ki Kilkia meñ ek khaas siṭi hei, huañ ke ek Yahuudi hei. Ham chirauri karta hei ki hamme ilog se baat kare ke mauka deo.”

⁴⁰Komaanḍa uske baat kare ke mauka dees, aur Pol seeṛhee pe khaṛa hoy ke ulog se ishaara karis. Jab sab chuppe hoy gain, tab u Aramik bhaasha meñ ulog se baat karis.