Read Hindi, Fiji Prerito ke Kaam 24 Bible Online

Prerito ke Kaam 24 - Hindi, Fiji bible

Prerito ke Kaam 24

¹Paañch roj ke baad, baṛa paadri Ananias kuchh agua log ke leke aur Tirtullus naam ke ek wakeel ke sañghe, Gavna ke lage mukadma loj kare gain.

²Pol ke bolaawa gais aur Tirtullus, uske agaiñsṭ mukadma suru karis. “Onrabal Felix, etna din tak aap ham log ke beech meñ saanti banaay rakkha, aur aap hee ke kaaran abhi tak ham log ke des aage baṛhte gais.

³Ham log sab koi i sab ke waaste sab ṭaaim aap ke dhanbaad deta hei.

⁴Ham aap ke takleef nai pahuñchaay mañgta hei, lekin ham log pe daya karo, aur kuchh ṭaaim ke waaste hamaar baat sun leo.

⁵I admi ek ghun (pest) ke rakam hei, aur dunia bhar ke Yahuudi ke beech meñ ṭrabal karaay hei. I Nazreen grup ke agua bhi hei.

⁶Jab i Mandir ke badnaam kare laga tab ham log iske pakṛa. Agar aap isse puuchhega, to yahi paayga ki jon cheej ham log bola hei, u sab sachche hei.

⁹Yahuudi log bhi agri bhain ki Tirtullus jon cheej bhi bole hei, u sab sachche hei.”

¹⁰Gavna, Pol ke bole ke ishaara karis, aur u bole ke suru karis, “Ham i baat janta hei ki aap i des ke log ke bahut saal se nyaay kara hei, aur hamme khusi hei ki ham apne aap ke i koṭ meñ bachaao karta hei.

¹¹Lagbhag baarah din pahile ham Yarushalam weship kare gaya raha. Aap iske sahaj se pata lagaay sakta hei ki ham sachche bolta hei.

¹²Koi ek roj bhi Yahuudi log hamme Mandir meñ koi se baad-bibaad karte nai paain. Ham koi jagha, naa to Yahuudi ke mile waala ghar meñ ya ṭaaun meñ museebat khaṛa kara.

¹³I log koi rakam se i saabit nai kare sake hei ki ilog jon kuchh hamaar agaiñsṭ bole hei, u sachche hei.

¹⁴Ham i baat maanta hei ki ulog ke agua log soche hei ki jon Prabhu ke rasta pe ham chalta hei u roñg hei. Lekin ham wahi Parmeshwar ke weship karta hei jon ke hamaar baap daada karat rahin. Aur ham u sab maanta hei jon Maozas ke aur nabi log ke kaanuun meñ likha hei.

¹⁵Hamaar biswaas bhi ilog ke rakam hei ki Parmeshwar sab ke mare ke baad jinda kari chaahe u achchha hei ya kharaab.

¹⁶Aur jab ki hamme puura biswaas hei, ham kosis karta hei ki ham jon bhi kuchh kari, Parmeshwar ke ya log ke waaste, hamaar neeyat safa rahi.

¹⁷Bahut saal ke baad ham hiañ lauṭ ke aaya ki aapan des ke gareeb log ke ham kuchh dei aur bheñṭ chaṛhaai.

¹⁸Ham Mandir meñ yahi karat raha, jab ilog hamme huañ dekhin. Huañ naa to bheeṛ raha ya upadrao bhais raha.

¹⁹Eshia se kuchh Yahuudi log bhi huañ u ṭaaim rahin, aur agar ulog ke ham se kuchh komplain hei, to ulog ke abhi hiañ rahe ke chaahi.

²⁰Ya ulog se puuchho jon hiañ hei. I log bataai ki kaaunsal ke saamne hamaar kuchh galti nai mila.

²¹Khali ek kasuur hamaar uppar lagaay sake hei ki jab ham koṭ meñ raha, tab ham chillaay ke bola raha, 'Aaj hamaar mukadma hei kaahe ke ham bola raha ki ham biswaas karta hei ki log mare ke baad fir se jinda kara jaai.’ ”

²²Felix, Prabhu ke rasta ke baare meñ bahut kuchh jaanat raha, lekin u mukadma haṭaay dees aur bolis, “Ham aapan feisla tab sunaayga, jab komaanḍa Lusiyaas aay jaai.”

²³Tab u aami ofisa ke hukum dees ki Pol ke rakhwaali kare, lekin uske bandi nai banaawa jaay ya uske frenḍ log ke uske madat kare ke nai roka jaay.

²⁴Kuchh din baad Felix aur uske patni Drusila, jon ek Yahuudi rahi, huañ gain jahañ Pol ke pahra meñ rakha gais raha. Ulog Pol ke bolaain aur jab u Yeeshu Maseeh meñ biswaas ke baare meñ baat karat raha, tab i duuno uske sunat rahin.

²⁵Lekin jab Pol bole ke suru karis ki keise raaiṭ kaam kara jaay hei, keise aapan man ke aapan bas meñ rakkha jaay hei, aur nyaay ke din aay waala hei, tab Felix ḍar gais. To u Pol se bolis, “Abhi ke waaste etna bas hei. Tum jaay sakta hei. Lekin jab hamaar lage ṭaaim rahi, tab ham tumme bolaayga.”

²⁶Iske baad Felix bahut dafe Pol ke bolaay ke usse baat karis, kaahe ke u sochat raha ki Pol uske ghuus dei.

²⁷Dui saal ke baad Felix ke jagha Porcius Festus gavna bana. Lekin Felix, Yahuudi agua log ke faiva kare maañgat raha, u Pol ke jel meñ rakkhe raha.