Read Hindi, Fiji Prerito ke Kaam 26 Bible Online

Prerito ke Kaam 26 - Hindi, Fiji bible

Prerito ke Kaam 26

¹Agrippa Pol se bolis, “Ab tum aapan bachaao meñ bole sakta hei.” Pol aapan haath aage kar ke bolis,

²“Raaja Agrippa, ham bahut khusi hei ki hamme mauka mila hei ki aap ke saamne ham aapan bachaao meñ jon dos hamaar aapan log ham pe lagaain hei uspe kuchh boli.

³Aap to ham log ke dharam ke reeti riwaaj aur biswaas jon ham log ke alag kare hei uske baare meñ, bahut janta hei. Yahi kaaran ham mañgta hei ki aap hamaar baat dheeraj se suno.

⁴“Sab Yahuudi log hamme bachpan se jaane hei. Ulog i bhi jaane hei ki hamaar aapan des aur Yarushalam meñ, hamaar jeewan keise raha. Aur agar ulog maañge, to bataay sake hei ki ham ek Farisi raha, u grup ke memba raha jon baaki sab grup se kaṛa raha.

⁶Ab hamaar uppar mukadma chale hei, kaahe ke ham uspe biswaas karta hei jon promis Parmeshwar ham log ke baap-daada se bahut pahile karis raha.

⁷Raat din ham log ke baarah ṭraaib dil lagaay ke Parmeshwar ke sewa karte rahin aur uske promis karal aasheesh ke agorat rahin. Raaja Agrippa, yahi aasha ke waaste, kuchh agua log ham pe mukadma chalaain.

⁸Jab ki Parmeshwar mara ke jinda kare hei, to kaahe ke log biswaas nai kare hei?

⁹“Ek dafe ham socha raha ki ham u sab kuchh kari ki ham Yeeshu Naasri ke agaiñsṭ meñ jaay saki.

¹⁰Sab se pahile ham i Yarushalam meñ kara raha, aur baṛa paadri log ke adhikaar se ham bahut se Parmeshwar ke log ke jel meñ bhi band karaaya. Etna bhi nai, ham ulog ke marwaay ke bhi kosis karwaaya.

¹¹Etna dafe to ham ulog ke Mandir meñ saja dewaat raha, aur kosis karta raha ki jisse ulog aapan biswaas chhoṛ dewe. Asal meñ ham ulog se etna gussa raha ki agal bagal ke ṭaaun meñ se ulog ke khoj nikaarat raha.

¹²“Raaja Agrippa, ek roj baṛa paadri log se adhikaar leke ham Damaskas jaat raha.

¹³Lagbhag baarah baje din meñ ham suuraj se bhi jaada tej roshni dekha. Asmaan se u hamaar aur hamaar sañghe jetna log rahin, sab ke uppar chamka.

¹⁴Ham log sab jameen pe gir paṛa. Tab Aramik meñ ek awaaj ham se bolis, 'Sol, Sol! tum hamme kaahe ke sataata hei? Ham se laṛaai kar ke tumhaar beokuufi hei!’

¹⁵'Tum kon hei?’ ham puuchha. Tab Prabhu jawaab dees, “Ham Yeeshu hei! Hamahi hei jiske tum sataata hei.

¹⁶Ab khaṛa hoy jaao. Ham tumhaar saamne aaya hei kaahe ke ham tumme chuna ki tum hamaar sewak bane sako. Tumme dusra se i sab bataay ke hei jon tum hamaar baare meñ seekha aur jon cheej ham tumme baad meñ dekhaayga.”

¹⁷Prabhu i bhi bolis, “Ham tumme Yahuudi aur geir Yahuudi se bachaayga, jon ke lage ham tumme bhejta hei.

¹⁸Ham mañgta hei ki tum ulog ke aañkhi kholo, ki jisse ulog añdhera chhoṛ ke roshni ke bagal ghuum jaay aur saitaan ke sakti chhoṛ ke Parmeshwar ke lage aay jaay. Tab ulog ke paap maaf hoy jaai, aur ham meñ biswaas karke ulog Parmeshwar ke pawitr jan ban jaai.”

¹⁹Raaja Agrippa, ham swarag ke i darshan ke maana.

²⁰Pahile ham Damaskas ke log ke parchaar kara, tab ham Yarushalam gaya aur Juḍia ke sab des meñ gaya. Aakhri meñ ham geir Yahuudi log ke paas jaay ke bola, “Paap kare ke band karo aur Parmeshwar ke bagal ghuum jaao! Tab eise jio ki dekhe meñ lage ki sachche meñ tum badal gaya hei.”

²¹Yahi kaaran kuchh log Mandir meñ hamme pakaṛ ke jaan se maare maañgat rahin.

²²Lekin i sab ṭaaim Parmeshwar hamme madat karis, aur ham duuno gareeb aur dhani ke parchaar kara. Ham ulog ke khali wahi bataaya jon nabi log aur Maozas bataay rahin ki hoi.

²³Ham ulog se bataaya ke keise Maseeh dukh uṭhaai, aur wahi sab se pahile mar ke jinda hoi, ki jisse ham log aur dusra jaati ke log ke beech meñ bhi ek uñjera laay saki.

²⁴Pol aapan bachaao kare ke khalaas nai karis raha, ki Festus chillaay ke bolis, “Pol, tum pagla hei! Bahut jaada paṛhaai tumhaar dimaag kharaab kar dees hei.”

²⁵Lekin Pol jawaab dees, “Onrabal Festus, ham pagla nai hei. Jon cheej ham bola hei, u sab sach hei, aur i sab matlab ke baat hei.

²⁶Isman se koi bhi cheej koi kona meñ nai bhais hei. Hamme puura biswaas hei ki Raaja Agrippa jaane hei ki ham kaa bolta hei. Yahi kaaran ham safa safa usse bolta hei.”

²⁷Tab Pol Agrippa se bolis, “Kaa tum biswaas karta hei, u sab jon kuchh nabi log bolin raha? Ham janta hei ki tum karta hei.”

²⁸Agrippa Pol se puuchhis, “Etna kamti ṭaaim meñ kaa tum hamme ek Maseehi banaay sakta hei?”

²⁹Pol jawaab dees, “Chaahe kamti ṭaaim lage ya jaada, ham yahi aasha karta hei ki jon sab hamme aaj sunis hei, u sab hamaar rakam ban jaai! Haañ khali i chain ke chhoṛ ke.”

³⁰Tab, Raaja Agrippa, Gavna Festus, Benees, aur jon sab huañ rahin, uṭh ke khaṛa hoy gain.

³¹Jaay se pahile ulog bolin, “I admi bekasuur hei. I admi koi eisan kaam nai karis hei jiske kaaran iske jaan se maara jaay ya jel meñ rakkha jaay.”

³²Agrippa, Festus se bolis, “Pol ke chhoṛ dewa jaay sakat raha agar u Maharaaja se feisla sune ke maañg nai karta.”