Read Hindi, Fiji Prerito ke Kaam 27 Bible Online

Prerito ke Kaam 27 - Hindi, Fiji bible

Prerito ke Kaam 27

¹Jab ham log ke samundar ke rasta Raom jaay ke ṭaaim aais, tab Pol aur jehli log ke Kepṭan Julias, jon Maharaaja ke ek khaas jhunḍ ke raha, uske haath meñ saup deen.

²Adramyttum meñ ham log u jahaaj pe beiṭha, jon ke Eshia ke kinaare jagha jagha pe ruk ke jaay ke raha. Mekaḍonia ke Thisluneeka ke ek admi jiske naam Aristarchus raha, ham log ke sañghe jahaaj meñ beiṭhis.

³Dusra din ham log Seida meñ pahuñch ke enka giraaya. Kepṭan Julias Pol pe daya kar ke mauka dees ke u jaay ke aapan frenḍs se mile ki jisse ulog ke jaruurat ke cheej ulog ke de sake.

⁴Jab ham log Seida chhoṛa, tab ulṭa hawa baṛa jor se chalat raha. U tej hawa se bache ke waaste, ham log Kurpus aaylenḍ ke kinaare se gaya.

⁵Fir ham log huañ se saauth Sisilia aur Pamfuulia ke kinaare se Luusia ke Muura pahuñcha.

⁶Huañ aami kepṭan ke pata laga ki Elekszenḍria se ek jahaaj Itaalia jaay hei, to ham log ke hukum dees ki wahi jahaaj pe beiṭh jaai.

⁷Kaafi roj tak dheere dheere aur bahut mushkil se Kanidus pahuñcha. Hawa etna jor se chalat raha ki aage jaay ke mushkil raha, tab ham log Kaip Salmone ke saamne se nikar ke Kreeṭ aaylenḍ ke aaṛh meñ chala gaya.

⁸Aur uske kinaare kinaare, dheere dheere, ham log Feya Havens, naam ke ek jagha pahuñcha, jahañ se Lasea ṭaaun nagichche raha.

⁹Ab tak ham log kaafi ṭaaim eisehiyeñ gawaay dia, aur jahaaj se jaay meñ, khatra se khali nai raha. Hiañ tak ki Maaf Kare Waala Baṛa din bhi beet gais.

¹⁰Tab Pol, jahaaj pe kaam kare waala log se bolis, “Bhaiya log, suno! Agar ham abhi chalega to hamaar jahaaj aur usman ke sab cheej kharaab se naas hoy jaai, aur bahut log bhi mar jaai.”

¹¹Lekin Julias, Pol ke sune ke badle, jahaaj ke kepṭan aur maalik ke baat sunis.

¹²Feya Havens ke wof meñ winṭa bitaay ke waaste achchha jagha nai raha. Yahi ke kaaran sab koi bichaar karin ki Kreeṭ ke kinaare kinaare koi rakam se Finike pahuñche ke chaahi. Huañ pe noth eesṭ aur saauth eesṭ ke bagal ek achchha wof hei, aur wahiñ pe sab koi winṭa bitaai.

¹³Jab saauth ke bagal se dheere dheere hawa chale ke suru karis, tab admi log sochin ki ulog ke plen ke waaste ab achchha mauka hei. Ulog enka gheechin aur hamlog Kreeṭ ke kinaare kinaare jaay laga.

¹⁴Lekin thoṛa deri meñ bahut jor ke hawa jiske naam raha “Notheesṭa” ulog ke agaiñsṭ chale ke suru bhais.

¹⁵Hawa, jahaaj ke dhakka maaris, aur ham log aage nai baṛhe saka. To ham log hawa ke aasre aapan jahaaj ke chhoṛ dia.

¹⁶Ham log bahte bahte Kauda naam ke ek aaylenḍ ke aaṛh meñ pahuñcha. Baṛa mushkil se ham log laaif bauṭ ke pakaṛ ke aapan jagha pe rakkha,

¹⁷lekin aakhiri meñ huañ pahuñcha jahañ jaay ke raha. Tab jahaaj pe kaam kare waala log jahaaj ke rassi se ghumaay ghumaay ke baañdh deen. Tab ulog jahaaj ke sail utaar deen aur jahaaj ke bahe deen, kaahe ke ulog ke dil meñ ḍar raha ki jahaaj Surtis ke senḍbenks se kahiñ ṭakraay ke dhakka nai maar de.

¹⁸Tufaan etna tagṛa raha ki dusra din ulog ke jahaaj se kuchh cheej ke nikaar ke samundar meñ feke ke paṛa.

¹⁹Tab tisra din, ulog aapan khali haath se jahaaj ke aur cheej samundar meñ fekin.

²⁰Kuchh din tak naa suuraj dekhaan aur naa to taara. Tej hawa chalte raha, aur ham log bache ke sab aasra chhoṛ dia.

²¹Jab ki ketna roj se ham log meñ se koi bhi kuchh khaais pees nai raha, Pol khaṛa hoy ke admi log se bolis, “Tum log ke hamaar baat sune ke chaahat raha! Agar tum log Kreeṭ meñ rahe gay hota, to tum log ke i barbaadi aur museebat nai sahe ke paṛta.

²²Lekin ab ham chirauri karta hei ki dukhi nai ho, kaahe ke tum log sab bach jaayga. Khali jahaaj barbaad hoy jaai.

²³Ham Parmeshwar ke hei, aur ham uske weship karta hei. Kal raat ke u hamaar lage ek ainjal ke i bataay ke waaste bhejis raha.

²⁴‘Pol ḍaro nai! Tum Maharaaja ke saamne aapan mukadma sunega. Aur tumhaar kaaran, Parmeshwar, jahaaj ke sab log ke jaan bachaay lei.’

²⁵Dheeraj rakkho! Hamme puura biswaas hei ki Parmeshwar wahi kari jon u promis karis hei.

²⁶Lekin ham log ke jahaaj koi aaylenḍ pe jaay ke shiprek hoy jaai.”

²⁷Chauda (14) raat aur din tak ham log Meḍiṭreinian See meñ idhar se udhar dhakka khaate raha. Lekin lagbhag baarah baje raat ke jahaaj pe kaam kare waala log ke pata laga ki ham log jameen ke lage aay laga hei.

²⁸Ulog paani ke naapin aur paain ki ek sao chaalis (140) meeṭa gahira hei. Thoṛa deri baad ulog fir se naapin aur dekhin ki khali tees (30) meeṭa gahira hei.

²⁹Jahaaj pe kaam kare waala ke dil meñ ḍar raha ki kahiñ jahaaj chaṭṭaan pe nai chaṛh jaay, aur ulog chaar enka jahaaj ke peechhe se giraay deen. Tab ulog sabere hoy ke waaste preya kare lagin.

³⁰Jahaaj pe kaam kare waala log jaan bachaay ke waaste jahaaj se bhaage maañgat rahin. To ulog i bahaana se ki ulog jahaaj ke aage se enka giraay hei, laaifbauṭ ke paani meñ giraain.

³¹Lekin Pol, Kepṭan Julias aur saulja log se bolis, “Agar kaam kare waala log jahaaj pe nai rahi, to tum log ke aapan jaan bachaay ke koi mauka nai rahi.”

³²Saulja log tab laaifbauṭ ke rassi kaaṭ ke paani meñ giraay deen.

³³Sabere hoy se pahile Pol sab ke chirauri karis ki kuchh khaay lewe. Pol ulog se bolis, “Chauda (14) roj tak tum sab etna soch meñ raha ki kuchh bhi khaaya nai.

³⁴Ham chirauri karta hei ki kuchh khaay leo. Tum log ke jaan yahi pe laga hei. Yahi karo aur tum meñ se koi ke bhi kuchh nai bigṛi.”

³⁵I sab bole ke baad Pol roṭi lees aur sab ke saamne Parmeshwar ke dhanbaad dees, aur ek ṭukṛa tuuṛ ke khaay lees.

³⁶Sab log ke himmat aais, aur sab koi thoṛa kuchh khaain.

³⁷Jahaaj pe kul milaay ke 276 log rahin,

³⁸aur jab sab koi kuchh khaay leen, tab bacha geñhu samundar meñ feñk ke jahaaj ke halka kara gay.

³⁹Sabere bhais, aur jahaaj pe kaam kare waala log samundar ke kinaara dekhin jiske ulog pahichaane nai sakin. Lekin ulog huañ ek beech ke saathe cove dekhin aur bichaar karin ki yahi baalu pe jahaaj ke chaṛhaay dewe ke chaahi.

⁴⁰Tab ulog enka khol ke uske paani meñ chhoṛ deen. Wahi lage ulog rassi jon patwaar (raḍḍa) sambhaale raha, uske bhi khol deen. Fir, jahaaj ke aage waala paal chaṛhaain ki jisse hawa ke madat se jahaaj kinaare pahuñch jaay.

⁴¹Lekin jahaaj baalu pe chaṛh gais. Jahaaj ke aage waala hissa baalu meñ dhañs gais, aur pichchhe waala hissa halkora ke dabaao se ṭuuṭ fuuṭ gais.

⁴²Saulja log sochin ki jehli log ke maar ḍaala jaay, ki jisse ulog pahuṛ ke bach nai jaay.

⁴³Lekin Kepṭan Julias Pol ke bachaay maañgat raha, aur u saulja log ke u sab nai karan dees jon ke ulog plen karin raha. Iske badle, u hukum dees ki jon koi bhi pahuṛe sake hei, ulog kinaare tak pahuṛ ke chala jaay.

⁴⁴Tab u baaki log se bolis ki lakṛi ke pleñk ya jahaaj ke paaṭ pakaṛ ke uspe se chala jaay. Aakhri meñ, sab koi bach ke jameen pe aay gain.