Read Hindi, Fiji Prerito ke Kaam 5 Bible Online

Prerito ke Kaam 5 - Hindi, Fiji bible

Prerito ke Kaam 5

¹Ananias naam ke ek admi aur uske aurat Safeera kuchh jameen bechin.

²Lekin ulog chalaaki kare ke raaji bhain aur kuchh peisa aapan waaste rakh leen. To jab Ananias bacha peisa le jaay ke prerit log ke dees,

³Peeṭa bolis, “Kaahe ke saitaan tumhaar man meñ i baat laais ki tum Pawitr Aatma se jhuuṭ bolo aur jameen ke kuchh peisa aapan lage rakh lo?

⁴Jameen beche se pahile tumhaar raha, aur beche ke baad jon peisa usse mila u bhi tumhaar raha, to eisan bichaar aapan man meñ kaahe laaya? Tum admi log se nai lekin Parmeshwar se jhuuṭ bola hei.”

⁵I baat jeise Ananias sunis, u wahiñ gir ke mar gais, aur jetna log i baat sunin, sab ḍar gain.

⁶Kuchh naojawaan aay ke u laash lapeṭ ke siṭi se bahire le jaay ke maṭṭi de deen.

⁷Lagbhag teen ghanṭa ke baad Safeera aais. U nai jaanat rahi ki uske admi ke kon cheej bhay.

⁸Peeṭa usse puuchhis, “Hamse bataao, kaa tum aapan jameen etna peisa meñ becha hei?” “Haañ, itne meñ to becha hei,” aurat jawaab dees.

⁹Tab Peeṭa bolis, “Tum duuno mil ke kaahe ke Prabhu ke Aatma ke parkhe mañgta hei? Tumhaar admi ke maṭṭi dewe waala log lauṭ aain hei aur wahi log tumme bhi le jaaiyeñ.”

¹⁰Jurte aurat Peeṭa ke goṛ pe giris aur mar gais. Jab naojawaan log bheetar aay ke dekhin ki Safeera mari paṛi hei to ulog uske bahire le jaay ke uske admi ke bagal meñ maṭṭi de deen.

¹¹Sab chech ke memba log aur jetna log i baat sunin sab ḍar gain.

¹²Prerit log bahut chamatkaar aur chakit kaam sab log ke beech meñ karke dekhaain. Sab biswaasi log hardam Soloman ke poch meñ milat rahin.

¹³Dusra log ulog se mile ke himmat nai karat rahin jab ki sab log ulog ke baṛaai karat rahin.

¹⁴Bahut se aurat aur admi log Parmeshwar pe biswaas kare lagin.

¹⁵Tab bimaar log ke, khaṭia aur chaṭaai pe leṭaay ke rasta pe rakh dewat rahin, ki jab Peeṭa aawe to uske parchhaaiñ ulog meñ se koi ke uppar paṛ jaay aur ulog achchha hoy jaay.

¹⁶Yarushalam ke agal bagal ke ṭaaun meñ rahewaala bimaar log ke aur saitaan se jakaṛa log ke leke aate rahin aur sab changaai paawat rahin.

¹⁷Baṛa paadri aur Saduuki log jon uske sañghe rahin jaran kare lagin.

¹⁸Ulog prerit log ke pakaṛ ke siṭi ke jel meñ band kar deen.

¹⁹Lekin Prabhu ke ek duut wahi raat meñ jel ke palla khol dees, aur prerit log ke bahire le jaay ke bolis,

²⁰“Jaao, Mandir meñ khaṛa hoy ke sab log se i nawa laaif ke baare meñ bataao.”

²¹I baat sunke ulog ekdam sabere Mandir meñ chala gain aur huañ updes dewe lagin. Baṛa paadri aur uske saathi log Israayel ke log ke agua ke sañghe ek sabha karin. Tab hukum dewa gay ki prerit log ke jel meñ se nikaar ke saamne leke aao.

²²Mandir ke pulis log jab jel meñ pahuñchin to dekhin ki prerit log huañ nai hei. Ulog lauṭ ke bolin.

²³“Jab ham huañ gaya to dekha ki jel majbuut se band hei aur wachmen log sab duaari pe khaṛa hei. Lekin jab ham palla khol ke bheetar gaya to huañ koi nai dekhaan.

²⁴Mandir ke pulis ke agua aur baṛa paadri log i sab baat sunin lekin ulog soche nai sakin ki ulog ke kaa kare ke hei.

²⁵Etne meñ koi aay ke bolis, “Jon log ke tum log jel meñ band kar dia raha, ulog to Mandir meñ khaṛa hoy ke sab log ke updes dewe hei!”

²⁶Tab pulis log aapan agua ke sañghe Mandir meñ gain aur ulog ke bina jabarjasti kare leke aain, kaahe ke ulog aur log se ḍarat rahin ki kahiñ ulog pe patthar nai maare ke suru kar de.

²⁷Ulog prerit log ke sab ke saamne sabha meñ khaṛa kar deen. Baṛa paadri prerit log se puuchhis,

²⁸“Kaa ham log tumse nai bataay raha ki Yeeshu ke naam leke kuchh nai parchaar karna? Lekin dekho tum log kaa kara! Tum log Yarushalam meñ parchaar karat raha aur i admi ke mare ke baare meñ ham log pe dos lagaata hei.”

²⁹Peeṭa aur prerit log jawaab deen, I jaruuri hei ham Parmeshwar ke baat maani nai ki admi log ke.

³⁰Jon Yeeshu ke tum log kros pe chaṛhaay ke maar ḍaala hei, wahi ke hamaar baap daada ke Parmeshwar jinda kar dees.

³¹Fir wahi ke ham log ke waaste agua aur bachaay waala banaay dees. Aur Parmeshwar wahi ke aapan raaiṭ saaiḍ beiṭhaais ki jisse Israayel ke log kharaab kaam chhoṛ dewe aur aapan paap ke waaste chhama maañg lewe.

³²U sab cheej ke baare meñ bataay ke waaste ham log hiañ hei, aur Pawitr Aatma bhi hei, jon Parmeshwar ke daan u sab log ke waaste hei jon Parmeshwar ke baat maane hei.

³³Jab Kaaunsal ke memba log i baat sunin tab ulog etna gussa bhain ki prerit log ke maar dewe maañgin.

³⁴Huañ Gamliyel naam ke ek Farisi ṭeecha raha. Sab log uske bahut ijjat karat rahin. U hukum dees ki thoṛa deri ke waaste prerit log ke ruum se bahire le jaawa jaay.

³⁵Uske baad u sab se bolis: Israayel ke log husiaar rahna, ki ilog ke sañghe tum kaa karega.

³⁶Kuchh din pahile Thiudaas i klaim karis ki u bhi koi hei. Lagbhag chaar sao admi uske sañghe hoy gay rahin. Lekin u mar gais. Uske saathi log idhar udhar chhitraay gain, aur yahi uske ant raha.

³⁷Baad meñ sensas ke ṭaaim Juḍas jon ek Galeel ke rahewaala raha aais. Bahut log uske pichchhe hoy leen, lekin uske bhi maar dewa gais, aur uske sab saathi log chhitraay gain.

³⁸Ham tum log se yahi bole mañgta hei ki ilog se duur raho aur ilog ke chhoṛ deo. Agar jon cheej ilog kare hei aapan sakti se kari, to puura nai hoi.

³⁹Lekin agar Parmeshwar ke bagal se hei to koi kuchh nai kare saki. Tum apne aap ke Parmeshwar ke agaiñsṭ laṛte paayga. Kaaunsal ke memba log Gamliyel ke baat maan leen.

⁴⁰Ulog prerit log ke bhittar bulaay ke piṭwaain aur chhoṛe se pahile dhamki deen ki Yeeshu ke naam muh pe nai laana.

⁴¹Prerit log huañ se khusi manaate chala gain kaahe ki Parmeshwar ulog ke i laayk samjhis ki Yeeshu ke waaste ulog kuchh dukh uṭhaawe.

⁴²Sab roj Mandir meñ aur ghar ghar jaay ke susamaachaar parchaar karat rahin ki Yeeshu hee Maseeh hei.