Read Hindi, Fiji Prerito ke Kaam 7 Bible Online

Prerito ke Kaam 7 - Hindi, Fiji bible

Prerito ke Kaam 7

¹Baṛa paadri Sṭeevan se puuchhis, “Jon cheej ilog bole hei, kaa sach hei?”

²Sṭeevan ulog ke jawaab dees, “Dost log hamaar baat suno. Ham log ke ensesṭas Abraham, Haaraan jaay se pahile jab Mesopotaamia meñ raha, tab ham log ke mahaan Parmeshwar apne aap ke uske dekhaais raha.

³Parmeshwar uske bataais, 'Tum aapan des aur aapan palwaar ke chhoṛ ke dusra des meñ jaao jon ham tumme dekhaayga.’

⁴Tab Abraham Kasḍi jaat ke des chhoṛ ke Haaraan meñ jaay ke bas gay. Uske pita ke mare ke baad, Abraham i des meñ aay ke bas gay jahañ tum log abhi rahta hei.

⁵Parmeshwar uske kuchh bhi jameen nai dees, ek bitta tak nai. Lekin Parmeshwar promis karis raha ki i des, uske aur uske palwaar ke hardam ke waaste de dei, jab ki Abraham ke lage ekko laṛkan nai rahin.

⁶Parmeshwar bolis raha ki Abraham ke descendants kuchh din ke liye dusra des meñ rahi. Huañ ke log ilog ke gulaam banaay ke rakkhi aur chaar sao saal tak khuub sataai.

⁷Lekin Parmeshwar i bhi bolis, “Jon log ilog ke gulaam banaay ke rakkhi ulog ke ham saja dega. Tab baad meñ ulog huañ se bahire nikar ke i jagha aai aur hamaar weship kari.”

⁸Parmeshwar Abraham se bolis, “Sab palwaar ke sab laṛka log ke khatna karna i dekhaay ke waaste ki tum aapan vaacha hamaar sañghe puura karta hei.” Aur i rakam Abraham ke santaan Aayzak ke khatna aṭhwa din pe kara gay. Yahi rakam Aayzak aapan laṛka Jaykab ke, aur Jaykab aapan baarah laṛkan ke khatna karis.

⁹Yahi log ham log ke ensesṭas ke log rahin. Josaf ham log ke ek khaas ensesṭas meñ se raha. Uske bhaai log usse jaran karat rahin aur yahi waaste ulog uske gulaam ke rakam bech deen ki Ijipt le jaay sake. Lekin Parmeshwar uske sañghe raha,

¹⁰aur sab dukh takleef se bachaay ke rakkhis. Parmeshwar Josaf ke eisan buddhi dees ki Ijipt ke raaja Fero uske bahut maan-sammaan dees. Raaja, Josaf ke Ijipt ke gavna banaais aur aapan puura raaj ke adhikaar uske saup dees.

¹¹Jab Ijipt aur Kanaan des meñ akaal paṛa, to log baṛa dukh uṭhaain, aur ensesṭas log ke khaay ke kuchh nai mila.

¹²Jab Jaykab sunis ki Ijipt meñ khaay ke cheej mile hei, to u hamaar baap-daada ke huañ pahila ṭaaim bhejis.

¹³Dusra ṭaaim ulog jab khaana ke cheej lewe aain tab Josaf aapan bhaiya log ke bataais ki u kon hei. Fero ke bhi pata lag gay ki Josaf kon palwaar ke hei.

¹⁴Josaf aapan pita ke aur puura palwaar ke bulaais. Sab milaay ke pachhattar (75) log huañ rahin.

¹⁵Uske pita Ijipt gais. Huañ u mar gais jeise ham log ke ensesṭas marin raha.

¹⁶Ulog ke laash Shekem siṭi meñ laay ke kabar meñ rakh deen jon Abraham peisa deke Hamor ke laṛkan se khareedis raha.

¹⁷Aakhri meñ, ṭaaim aay gais ki Parmeshwar u kare jon u Abraham se promis karis raha. Aur idhar Ijipt meñ ham log ke namba baṛh gais.

¹⁸Ijipt meñ ek aur raaja raaj karat raha jon Josaf ke nai jaanat raha.

¹⁹U ham log ke ensesṭas ke sañghe chalaaki aur atyaachaar kare laga. Hiañ tak ki chhoṭa bachcha log ke bahire chhoṛwaay dewat raha ki ulog mar jaay.

²⁰Yahi ṭaaim Maozas peida bhay. U baṛa sundar laṛka raha aur uske dekh-bhaal teen mahina tak uske maata-pita ke ghare bhay.

²¹Jab uske ghar se nikaare ke paṛa, tab Fero ke laṛki uske paais aur aapan laṛka maan ke paale lagi.

²²Maozas ke, Ijipt meñ sab se achchha paṛhaai mila. U ek tagṛa admi raha aur baatcheet meñ aage raha.

²³Jab Maozas chaalis (40) saal ke bhay tab uske dil meñ aais ki u aapan Israayel ke log ke madat kare kaahe ke ulog wahi ke log rahin.

²⁴Ek din u dekhis ki ek Ijipt ke rahewaala ek Israayel ke rahewaala ke sataawe hei. To Maozas Israayel ke admi ke bachaawe ke waaste Ijipt ke rahewaala ke maar ḍaalis.

²⁵Maozas sochat raha ki uske log jaan jahiyeñ ki u Parmeshwar ke madat se ulog ke chhuṭkaara dewaay saki. Lekin Israayel ke log i baat nai samajhe paain.

²⁶Dusra roj Maozas dekhis ki uske aapan dui log apne meñ laṛe hei, to u roke ke kosis karis. U bolis, “Tum duuno Israayel ke rahewaala log hei to kaahe apne meñ laṛta hei?”

²⁷Jon admi laṛaai suru karis raha u Maozas ke ek taraf ḍhakel ke puuchhis, “Tumme kon ham log ke boss aur jaj banaais hei?

²⁸Kaa tum hamme bhi maarega jeise tum u Ijipt ke rahewaala ke kal maar dia raha?”

²⁹Jab Maozas i baat sunis, tab u Ijipt chhoṛ ke bhaag gais aur jaay ke Middhaan des meñ bas gay. Yahiñ uske dui laṛkan peida bhain.

³⁰Chaalis (40) saal ke baad, Saaynaai Pahaaṛ ke suunsaan jagha meñ ek jañgal jarte dekhaai dees, jisman se Maozas ke saamne ek ainjal aais.

³¹Jon cheej Maozas dekhis usse u bahut ghabraais. U aur nagichche gay ki achchha se dekhe ki kaa hoy hei aur Prabhu usse bolis,

³²“Ham tumhaar baap-daada ke Parmeshwar hei, Abraham ke, Aayzak ke, aur Jaykab ke Parmeshwar.” Maozas kaape laga aur u bagal dekhe ke himmat nai karis.

³³Prabhu usse bolis, “Aapan juuta nikaaro. Jahañ tum khaṛa hei u pawitr jagha hei.

³⁴Ham aapan aañkhi se aapan log ke Ijipt meñ dukh kaaṭte dekha hei. Ham ulog ke kahare ke awaaj suna hei, aur yahi waaste ham madat kare aaya hei. Ab ham tumme fir se Ijipt bhejega.”

³⁵I wahi Maozas hei jiske Israayel ke log sune ke taiyaar nai rahin aur bolat rahin, “Tum kon hei ham log ke bataay waala?” Parmeshwar ke ainjals Maozas se jhaaṛi meñ se baat karis raha. Aur Maozas ke madat ke waaste Parmeshwar ek swaragduut ke bhejis ki log ke bachaawe aur ulog ke agua bane.

³⁶U Ijipt meñ Laal samundar (Red Sea) meñ aur ḍezaṭ meñ chaalis saal tak chakit aur chamatkaari kaam dekhaay ke Israayel ke log ke nikaar laais.

³⁷I wahi Maozas hei jon Israayel ke log se bataais raha, “Parmeshwar tum log meñ se tumhaar waaste ek nabi chuni jeise u hamme chunis hei.”

³⁸Maozas ham log ke ḍezaṭ meñ ek jagha laais jahañ ainjal se usse Saaynaai Pahaaṛ pe baat bhay. Yahiñ pe usse jeewan dewe waala vachan mila jon ham log ke waaste raha.

³⁹Lekin ham log ke ensesṭas Maozas ke baat nai maane ke taiyaar rahin. Ulog uske rijekṭ kar deen aur fir se Ijipt lauṭe maañgin.

⁴⁰I log Eran se bolin, “Ham log ke waaste kuchh deota banaao jon ham log ke rasta dekhaay sake. Maozas ham log ke Ijipt se hiañ tak laais, lekin ab uske kaa bhais ham log nai janta hei.”

⁴¹Tab ulog gaai ke bachcha ke rakam meñ ek muurti banaain. Haath ke banaawal muurti ke aage bali chaṛhaain aur khusiaali manaawe lagin.

⁴²Parmeshwar muh moṛ ke ulog ke chhoṛ ke chala gais. Tab ulog asmaan ke taara ke puuja kare lagin jeise ki nabi ke buk meñ likhaan hei, “Israayel ke log, tum log chaalis saal tak i ḍezaṭ meñ hamme naa to bali ya bheñṭ (offering) chaṛhaaya.

⁴³Iske badle meñ tum log to Molok deota ke ṭenṭ aur Rifaan deota ke taara aapan sañghe rakh ke chalta hei. Tum haath ke banaawal muurti ke puuja karta hei. Ab ham tumme Baibilon ke u paar bhejega”

⁴⁴U ṭenṭ jahañ ham log ke baap-daada Parmeshwar ke weship karat rahin, ulog ke sañghe ḍezaṭ meñ raha. I wahi ṭenṭ raha jon Parmeshwar Maozas ke banaawe ke waaste hukum dees raha. Aur ṭheek wahi rakam banaawal raha jeisan Maozas dekhis raha.

⁴⁵Baad meñ i ham log ke ensesṭas ke dewa gay raha jon ulog leke Joshua ke sañghe chala gain. Ulog ṭenṭ ke leke chalte gain, aur ulog ke jameen apnaate gain jon log ke Parmeshwar jameen se nikaar dees raha. Raaja Ḍeiviḍ ke ṭaaim tak ham log ke baap-daada ṭenṭ ke kaam meñ laawat rahin.

⁴⁶U Parmeshwar ke khusi karis aur Israayeli log ke waaste ek weship kare ke ghar banaawe ke maañg karis.

⁴⁷Fir ant meñ Raaja Soloman Parmeshwar ke waaste ek ghar banaais.

⁴⁸Lekin etna mahaan Parmeshwar admi ke haath ke banaawal ghar meñ nai rahe hei. Jeise nabi bolis hei, jab u Prabhu ke waaste baat karis,

⁴⁹“Swarag hamaar beiṭhe ke jagha hei, aur jameen hamaar goṛ rakkhe ke waaste hei. Tum hamaar waaste keisan ghar banaayga? Aur kon jagha ham sustaayga?

⁵⁰Ham sab kuchh banaaya hei.”

⁵¹Jiddi aur kaṛa dil waala log! Aapan baap-daada ke rakam tum bhi sab ṭaaim Pawitr Aatma ke agaiñsṭ laṛte rahta hei.

⁵²Koi eisan nabi hei jiske tumhaar ensesṭas nai sataain? Ulog nabi log ke maar ḍaalin jon Maseeha ke aawe ke baare meñ sandes det rahin. Aur ab tum uske agaiñsṭ hoy gaya aur uske maar ḍaala.

⁵³Ainjals log tum log ke Parmeshwar ke ruuls deen lekin tum log uske maana nai.

⁵⁴Kaaunsal ke memba log Sṭeevan ke baat sun ke gussaay gain aur daañt peese lagin.

⁵⁵Lekin Sṭeevan Pawitr Aatma se bhara raha. U uppar asmaan ke bagal dekhis jahañ u Parmeshwar ke mahima aur Yeeshu ke raaiṭ saaiḍ khaṛa dekhis.

⁵⁶Tab Sṭeevan bolis, “Ham swarag ke khula dekhta hei aur Yeeshu Parmeshwar ke raaiṭ saaiḍ khaṛa hei.”

⁵⁷Kaaunsal ke memba log baṛa jor se chillaain aur aapan kaan band kar leen. Sab koi ek sañghe Sṭeevan pe ṭuuṭ paṛin.

⁵⁸Uske kheech ke siṭi se bahire le gain aur patthar se maare ke suru karin. Jon log Sṭeevan pe dos lagaay rahin ulog aapan kapṛa nikaar ke Sol naam ke ek naojawaan admi ke goṛ ke lage rakh deen.

⁵⁹Jeise Sṭeevan ke patthar se maara jaat raha, u jor se bolis, “Prabhu Yeeshu, hamme aapan paas bulaay lo!”

⁶⁰U ghuṭna ṭek ke jor se chillaais, “I log ke dos nai dena.” I baat bol ke u mar gay.