Read Hindi, Fiji Prerito ke Kaam 9 Bible Online

Prerito ke Kaam 9 - Hindi, Fiji bible

Prerito ke Kaam 9

¹Sol Prabhu ke chela log ke jaan lewe ke dhamki dete raha. Hiañ tak ki u ek baṛa paadri ke lage gais.

²Aur u Damaskas ke agua log ke waaste chiṭṭhi maañgat raha, ki uske i adhikaar mil jaay ki u sab biswaasi log ke pakaṛ ke Yarushalam le jaay, chaahe aurat hoy ya admi.

³Sol, Damaskas pahuñche waala raha jab asmaan se baṛa jor se uske uppar roshni chamka.

⁴U jameen pe gir paṛa aur ek awaaj sunis, jon usse bolis, “Sol Sol, tum hamme kaahe sataata hei?”

⁵Sol puuchhis, “Tum kon hei?” Prabhu jawaab dees. “Ham Yeeshu hei, jiske tum sataata hei.

⁶Uṭho aur siṭi meñ jaao. Huañ tumme bataawa jaai ki kaa kare ke hei.”

⁷Jetna log Sol ke sañghe rahin sab chakit rahe gain. Ulog awaaj to sunin lekin koi ke dekhin nai.

⁸Sol jameen pe se uṭhis, lekin aañkhi khole pe kuchh dekhe nai paais. Log haath pakaṛ ke uske Damaskas le gain.

⁹Uske kuchh dekhaai nai dees aur teen din tak u kuchh khaais pees bhi nai.

¹⁰Ananias naam ke Yeeshu ke ek chela Damaskas meñ rahat raha. Prabhu Yeeshu uske darshan deke bolis, “Ananias!” U jawaab dees, “Prabhu, ham hiañ hei?”

¹¹Prabhu usse bataais, “Seedhi Rasta naam ke ek jagha hei huañ jaay ke waaste taiyaar hoy jaao. Huañ jab tum pahuñchega to Juḍas ke ghare Tarsus ke rahewaala Sol mili. U preya kare meñ juṭa hei.

¹²Uske darshan mila hei ki Ananias naam ke ek admi uske ghar meñ ghus ke uske uppar aapan haath rakkhe hei aur u fir se dekhe lagi.”

¹³Ananias jawaab dees, “Prabhu, i admi ke baare meñ ham bahut log se suna hei ki Yarushalam meñ tumhaar biswaasi log ke bahut sataais hei.

¹⁴Baṛa baṛa paadri log uske adhikaar deen hei ki hiañ Damaskas meñ ulog ke pakṛe hei jon tumhaar naam lewe hei.”

¹⁵Prabhu Ananias se bolis, “Jaao, ham uske chuna hei ki u jaay ke hamaar baare meñ aur sab log ke, raaja log ke aur Israayel ke log ke bataay.

¹⁶Aur ham uske dekhaayga ki hamaar naam ke waaste uske ketna dukh uṭhaay ke paṛi.

¹⁷Tab Ananias chala gais aur u ghar ke bhittar gais jahañ Sol rahat raha. Ananias Sol ke uppar aapan haath rakh ke bolis, “Sol, hamme Prabhu Yeeshu tumhaar lage bhejis hei. I wahi hei jon tumme rasta meñ dekhaais raha. U maañge hei ki tum fir se dekhe lago aur tum Pawitr Aatma se bhar jaao.”

¹⁸Wahi lage Sol ke aañkhi meñ se machhri ke cheuñṭa ke rakam koi cheej gira aur u fir se dekhe laga. U uṭha aur baptisma lees.

¹⁹Tab u khaana khaais aur uske taagat aais. Kuchh din tak Sol Prabhu ke biswaasi log ke sañghe Damaskas meñ raha.

²⁰Jurte u Yahuudi log ke mile waala jagha pe jaay ke bataay laga ki Yeeshu Parmeshwar ke laṛka hei.

²¹Sab sunewaala sun ke chakit rahe gain aur bolin, “Kaa i wahi admi nai hei jon Yarushalam meñ Yeeshu ke biswaasi log ke uppar museebat pahuñchaat raha? Kaa u i kaaran se hiañ nai aais raha ki ulog ke pakaṛ ke baṛa paadri log ke de dei?”

²²Sol etna sakti se parchaar karis ki Damaskas meñ rahewaala Yahuudi log ke konfius kar dees jeise u dekhaay maañgat raha ki Yeeshu hee Maseeha hei.

²³Kuchh roj ke baad Yahuudi log Sol ke maare ke waaste plen banaain.

²⁴Lekin Sol ke sab baat pata lag gay. Yahuudi log uske maare ke waaste raat-din nagar ke gaiṭ pe pahra dewat rahin.

²⁵Tab ek raat Sol ke chela log uske ek baṛa baaskeṭ meñ beiṭhaay ke raat meñ siṭi ke diwaar se nichche utaar deen.

²⁶Jab Sol Yarushalam pahuñcha tab u kosis karis ki biswaasi log ke sañghe mil jaay. Lekin sab log usse ḍarat rahin aur sochat rahin ki i ek sachcha biswaasi nai hei.

²⁷Tab Baranbaas madat karis aur Prerit log ke lage le gais. U bataais ki Sol keise rasta meñ Prabhu ke dekhis aur Prabhu usse baat karis. Baranbaas ulog se i bhi bataais ki Sol Damaskas meñ keise himmat se Yeeshu ke naam ke parchaar karat raha.

²⁸Ab Sol prerit log ke sañghe Yarushalam meñ aawe jaay laga aur sab se Prabhu ke baare meñ bataay laga.

²⁹U hardam Greek-bhaasha bolewaala Yahuudi log se baad-bibaad karat raha aur yahi kaaran ulog uske maare maañgat rahin.

³⁰Jab saathi log ke i baat ke pata chala to Sol ke Kaisaria le gain aur huañ se uske Tarsus shahar bhej deen.

³¹I ṭaaim Juḍia, Galeel aur Samaaria ke chech meñ baṛa saanti raha aur ulog Prabhu ke weship karte rahin. Chech majbuut hote gais aur Pawitr Aatma ke madat se baṛhte gais.

³²Peeṭa jagha jagha ghuumte firte ek Prabhu ke biswaasi ke ghare Liḍḍa ṭaaun meñ pahuñcha.

³³Huañ uske Aniyaas naam ke ek admi mila jon lakwa bimaari ke kaaran aaṭh saal se khaṭia pe paṛa raha aur chalat firat nai raha.

³⁴Peeṭa usse bolis, “Aniyaas, Yeeshu Maseeh tumme achchha kar dees hei. Uṭho, aur aapan khaṭia lagaao. Wahi lage u khaṛa hoy gay.

³⁵Liḍḍa aur Sheron shahar meñ rahewaale sab log jab Aniyaas ke dekhin tab ulog bhi Prabhu ke biswaasi ban gain.

³⁶Yeeshu ke ek biswaasi Tabeeta naam ke Joppa siṭi meñ rahat rahi. Uske Greek naam Ḍokas jiske matlab hiran (deer) raha. U sab din achchha kaam karat rahi aur gareeb log ke daan dewat rahi.

³⁷Lekin ek din u bimaar paṛis aur mar gais. Log uske nauhaay ke uppar ruum meñ rakh deen.

³⁸Joppa, Liḍḍa se bahut duur nai raha, aur jab chela log ke pata laga ki Peeṭa huañ hei tab ulog dui admi ke bhej ke bataain, “Jaldi se jaldi ham log ke lage aay jaao.”

³⁹Jurte Peeṭa ulog ke sañghe chal paṛa. Admi log Peeṭa ke uppar ruum meñ le gain. Huañ pe bidhwa log rowat rahin. Ulog Peeṭa ke u sab kapṛa latta dekhaawe lagin jon Ḍokas banaais raha jab u jinda rahi.

⁴⁰Jab Peeṭa sab ke ruum se bahire bhej dees, u ghuṭna ṭek ke preya karis. Tab u Ḍokas ke mara shareer ke taraf dekh ke bolis, “Tabeeta, uṭho.” Aurat aañkhi khol dees aur Peeṭa ke dekh ke uṭh ke beiṭh gais.

⁴¹Peeṭa uske haath pakaṛ ke uske goṛ pe khaṛa hoy ke madat karis. Peeṭa bidhwa aur baaki biswaasi log ke bulaay ke dekhaais ki Ḍokas mara se jinda hoy gais hei.

⁴²I baat puura Joppa meñ feil gay ki huañ kaa bhay raha aur bahut log Prabhu Yeeshu pe biswaas kare lagin.

⁴³Peeṭa Joppa meñ Saayman naam ke ek admi ke ghare kuchh din tak raha. U chamṛa ke kaam karat raha.