Read Hindi, Fiji Raom 10 Bible Online

Raom 10 - Hindi, Fiji bible

Raom 10

¹Pyaare dosto, Parmeshwar se hamaar bahut aasha aur preya hei, ki Israayel ke log ke waaste binti kari, ki ulog bachaawa jaay.

²Ham janta hei ki ulog Parmeshwar se prem kare hei, lekin ulog samjhe nai hei,

³ki keise ulog ke apnaawa jaai. Yahi kaaran ulog Parmeshwar pe biswaas nai kare hei, aur kaanuun ke paalan kar ke maañge hei ki Parmeshwar ulog ke apnaay.

⁴Lekin Krisṭ u kaanuun ke ant kar dees, ki jisse jon koi bhi Parmeshwar pe biswaas kare hei, uske u apnaai.

⁵Maozas bolis raha ki ek admi ke Parmeshwar apnaai jab u kaanuun ke maani. U i kaam tab karis, jab u likhis raha, “Agar tum jie mañgta hei, to tum u sab karo jon kaanuun hukum de hei.”

⁶Lekin jon log ke biswaas se Parmeshwar ulog ke apnaay hei, ulog kabhi nai puuchhi, “Kon swarag jaay ke Yeeshu ke nichche laai?”

⁷Ulog i bhi nai puuchhi, “Kon narak meñ jaay ke uske mara log meñ se jinda kara jaai ?”

⁸Jon koi ke ulog ke biswaas ke khaatir apnaawa gais hei, ulog bole hei, “I vachan tumhaar otna nagichche hei, jetna tumhaar muh ya dil hei.” Aur i wahi biswaas ke sandes hei, jiske ham parchaar karta hei.

⁹Agar tum biswaas se bolega, “Yeeshu, Prabhu hei,” aur agar tum aapan puura dil se biswaas karta hei ki Parmeshwar uske mara meñ se jiaais hei, to tum bachaawa jaayga.

¹⁰Parmeshwar tumme apnaai aur bachaai, agar tum uske sachche ke biswaas karta hei aur dusra ke bhi bataata hei.

¹¹Baaibal bole hei ki jon ke lage biswaas hei, u niraas nai hoi,

¹²chaahe u Yahuudi hei ya geir Yahuudi, kaahe ke Prabhu to ekke hei, aur jon uske bolaay hei, ulog ke waaste bahut dayaalu hei.

¹³Jon koi bhi Prabhu ke pukaari, u bach jaai.

¹⁴Keise Parmeshwar meñ log ke biswaas baṛhi, aur ulog usse boli ki ulog ke bachaao, agar ulog Parmeshwar ke baare meñ kabhi nai sunis?

¹⁵Aur keise koi ulog se bataai agar Parmeshwar ulog ke nai bhejta? Baaibal bole hei ki agar koi parchaar kare aay, to khali uske goṛ dekhe meñ ketna sundar lage hei.

¹⁶Fir bhi sab log vachan pe biswaas nai karin, jeise ki, Aayzaaya nabi puuchhis raha, “Prabhu, kaa koi biswaas karis, jon ham bola hei?”

¹⁷Koi bhi bina Yeeshu ke vachan sune, biswaas nai paay sake hei.

¹⁸Lekin, kaa ham bolta hei ki Israayel ke log nai sunin? Nai, i ham nai bolta! Baaibal bole hei, “Sab dunia meñ sandes bataawa gais. Aur dunia ke kona kona meñ iske baare meñ feilaawa gais hei.”

¹⁹Kaa Israayel ke log nai samjhin? Maozas iske jawaab dees raha jab u bataais raha ki Parmeshwar kaa bolis raha, “Ham Israayel ke log meñ ulog ke waaste jaran peida karega jon ek jaat ke nai hei. Ham ulog meñ ulog ke khaatir gussa karwaayga jon ek baat bhi nai samjhe hei.”

²⁰Aayzaaya, bole ke ḍarat nai raha, ki Prabhu kaa bolis raha, “Ham ulog ke mila jon hamme nai khojat rahin. Ham ulog ke saamne aaya jon hamaar baare meñ nai puuchhat rahin.”

²¹Aur Aayzaaya Israayel ke log ke baare meñ i bolis, “Din bhar Prabhu ulog ke lage pahuñche hei jon jiddi hei aur hukum nai maane maañge hei.”