Read Hindi, Fiji Raom 11 Bible Online

Raom 11 - Hindi, Fiji bible

Raom 11

¹Kaa ham bolta hei ki, Parmeshwar aapan log se muh moṛ lees hei? Bilkul nai! Kaahe ke ham bhi Israayeli hei, aur Abraham ke khaandaan ke hei jon Benjameen ke palwaar hei.

²Parmeshwar jon ke chunis hei usse muh nai moṛis. Kaa tum nai janta ki Baaibal, Ilaayja ke baare meñ bole hei ki u Israayel ke log ke baare meñ chugli kare hei?

³U bolis raha, ‘E Prabhu, ilog tumhaar nabi log ke maarin raha aur tumhaar bedi ke naas karin raha. Khali hamahi bacha hei, aur ilog hamme bhi maare maañge hei.”

⁴Lekin Prabhu, Ilaayja se bolis, “Hamaar lage abhi bhi saat hajaar log hei, jon Baal ke aage weship nai karis hei.”

⁵Abhi bhi wahi rakam hei. Parmeshwar Israayel ke log pe daya karis, aur kuchh abhi bhi uske pichchhe chale hei.

⁶I Parmeshwar ke aaseem daya ke kaaran bhais, naa ki ulog ke kaaran jon kuchh karin raha. I nai hoy sakta agar Parmeshwar ke daya nai rahta.

⁷Iske matlab i hei ki Israayel ke khali kuchh log ke u mila, jon u khojat rahin. Baaki sab jiddi rahin.

⁸Jeise vachan meñ likhaan hei, “Parmeshwar ulog ke beokuuf banaais ki ulog ke aañkhi añdha hei, aur ulog ke kaan abhi tak bahira hei.”

⁹Tab Ḍeiviḍ bolis, “Ulog ke khaana, ulog ke khaatir jaal meñ fasaay deo, ki jisse ulog gir paṛi aur ulog ke wahi mili jon ulog ke mile ke chaahi.

¹⁰Ulog ke aañkhi pe paṭṭi baañdh deo! Ulog ke dekhe nai deo ulog ke peeṭhi baṛa bojha ke nichche jhukaay deo.”

¹¹Ham puuchhta hei ki kaa Israayel ke log i kaaran girin ki kabhi nai uṭhe saki? Bilkul nai! Kaahe ke ulog paap karin raha, wahi kaaran geir Yahuudi log ke mukti mila ki Israayel ke log meñ jaran peida hoy.

¹²Lekin Israayel log ke paap aur bhuul dunia ke log ke madat karis, aur yahi kaaran geir Yahuudi log ke bhi aasheesh mili agar ulog Parmeshwar ke bagal puura ghuum jaai.

¹³Ham, tum geir Yahuudi se baat karta hei, aur jab tak tumhaar waaste ham ek parchaarak hei, ham aapan kaam dil lagaay ke karega.

¹⁴Saait yahi rakam ham aapan log meñ etna jaran bhaao peida kar dega, ki ulog bach jaai.

¹⁵Jab Israayel Parmeshwar ke chhoṛ dees, tab aur log Parmeshwar ke dusman se dost meñ badal gain. Aur tab kaa hoi jab, ulog ke apnaawa jaai? I murda ke jinda hoy ke sawaal hoi!

¹⁶Agar aaṭa ke pahila hissa Parmeshwar ke dewe se pawitr hoy hei, tab sab aaṭa pawitr hei. Agar ek peṛ ke jaṛ pawitr hei, to puura peṛ pawitr hei.

¹⁷Tum geir Yahuudi, u jañgli oliv ke ḍaar ke rakam hei, jon ke usman joṛa gais jon oliv ke peṛ bowaan raha. Tum u ḍaar ke jagha le lia, jon peṛ se kaaṭ ke feñk dewa gais raha. Aur yahi kaaran tum aasheesh ke maja leta hei, jon bowaan peṛ ke khaatir raha.

¹⁸Lekin tum i nai samajh lena ki tum u ḍaar jon ke kaaṭ ke feñk dewa gais hei, usse achchha hei. Yaad rakhna, tum u peṛ ke jaṛ ke nai sambhaala hei. U jaṛ hei jon tumme sambhaale hei.

¹⁹Saait tum samajhta hei ki u ḍaar ke kaaṭa gais raha ki jisse tumme uske jagha rakha jaay.

²⁰U raaiṭ baat hei. Lekin ulog ke kaaṭa gais raha kaahe ke ulog meñ biswaas nai raha, aur tum huañ hei kaahe ke tumme biswaas hei. To ghamanḍ nai karo, lekin ḍar ke raho.

²¹Agar Parmeshwar u sachcha ḍaar ke kaaṭ dees hei, to kaa u tumhaar sañghe bhi weisaiyeñ nai kare sake hei?

²²Ab tum dekhe sakta hei ki keise Parmeshwar dayaalu aur kaṛak duuno hoy sake hei. Ulog ke waaste ketna kaṛa baat hei, jon gira log hei, lekin tum pe to u daya karis. Aur u daya karte rahi, agar tum uspe bharosa karte rahega. Nai to tumme bhi kaaṭ dewa jaai.

²³Agar u ḍaar biswaas kare lagi to fir se peṛ meñ joṛ dewa jaai. Parmeshwar ke lage taagat hei ki ulog ke u fir se joṛ de.

²⁴I to naichral nai hei ki jañgli oliv ke ḍaar ke kaaṭ ke achchha oliv ke peṛ meñ lagaawa jaay. Lekin i naichral hei ki achchha oliv ke ḍaar ke apne hee oliv ke peṛ meñ lagaawa jaay.

²⁵Hamaar dost log, ham nai mañgta ki tum geir Yahuudi log apne uppar ghamanḍ karo. Yahi kaaran ham u gupt baat ke tumme samjhaata hei, ki Israayel ke log ke kaa bhais raha. Ulog meñ se kuchh jiddi hoy gain, aur ulog yahi rakam rahi jab tak ki tum geir Yahuudi, puura ke puura Parmeshwar ke lage nai aay jaao.

²⁶Yahi rakam puura Israayel bachaawa jaai, jeise Baaibal meñ likhaan hei, “Zion se hamme bachaay ke waaste koi aai. Tab Jaykab ke khaandaan kharaab kaam kare ke chhoṛ dei.

²⁷Yahi hei jon Prabhu kare ke waaste waada karis hei jab u ulog ke paap maaf kar dei.”

²⁸Israayel ke log ke sañghe dusmani kara jaay hei ki jisse susamaachaar tum geir Yahuudi tak pahuñche. Lekin ulog abhi bhi chuna gay log hei, aur Parmeshwar ulog ke baap daada ke kaaran abhi bhi ulog se prem kare hei.

²⁹Parmeshwar aapan daan waapas nai le hei, aur aapan chuna gay log ke bhi nai bhulaay hei.

³⁰Ek dafe tum geir Yahuudi, Parmeshwar ke chhoṛ dia raha. Lekin ab Israayel, Parmeshwar ke chhoṛis hei, aur tum pe daya bhais hei.

³¹Aur jab ki tum pe daya kara gais hei, tab ulog pe bhi daya kara jaai.

³²Sab log Parmeshwar ke baat nai maanin, aur yahi kaaran ulog ke sañghe jehli ke rakam byohaar kara jaay hei. Lekin u i sab i kaaran kare hei ki jisse uske daya sab pe hoy.

³³Kon Parmeshwar ke dhan, buddhi, aur gyaan naape sake hei? Kon uske nirnay ke samjhe sake hei, aur bataay sake hei ki u kaa kare hei?

³⁴“Kaa koi bhi Prabhu ke man ke baat jaane sakis hei ya uske sallaah dees hei?

³⁵Kaa koi Prabhu ke kuchh udhaar dees hei jon lauṭaawa jaay sake hei?”

³⁶Prabhu ke bagal se sab kuchh aay hei. Sab cheej wahi banaais hei, aur wahi ke lage lauṭ jaai. Parmeshwar ke baṛaai hardam karo! Aameen.