Read Hindi, Fiji Raom 13 Bible Online

Raom 13 - Hindi, Fiji bible

Raom 13

¹Ulog ke baat maano jon ke adhikaar tumpe hei. Khali Parmeshwar sab ke adhikaar dewe sake hei, aur u ulog ke adhikaar ke jagha pe beiṭhaawe hei.

²Yahi kaaran jon log adhikaari ke baat nai maane hei, ulog Parmeshwar ke baat bhi nai maane hei, aur ulog ke saja mili.

³Kaahe ke adhikaari log achchha log ke waaste nai lekin kharaab log ke waaste ḍaraay waala log hei. Adhikaari log se ḍare ke jaruurat nai hei. Khali wahi karo jon achchha hei, jisse adhikaari log tumhaar baṛaai kare.

⁴Kaahe ke, ulog Parmeshwar ke sewak hei, aur i ulog ke kaam hei ki tumme madat kare. Lekin agar tum kuchh kharaab kaam kara to tumme ḍare ke hei, kaahe ke adhikaari log ke adhikaar hei u tumme ḍanḍ dewe. Ilog Parmeshwar ke sewak hei, jon Parmeshwar ke gussa ke mutaabik kharaab kaam kare waala log ke saja dewe hei.

⁵Khali Parmeshwar ke gussa ke kaaran nai, lekin tum janta hei ki kon cheej raaiṭ hei, yahi kaaran kaanuun ke maane ke hei.

⁶Tumme aapan ṭeks bhi bhare ke hei. Adhikaari Parmeshwar ke sewak hei, aur i ulog ke kaam hei ki ulog i sab kaam meñ juṭa rahe.

⁷Aapan sab karja chukaay deo, chaahe u ṭeks hei ya renṭ, ya koi ke aadar sammaan kare ke hei.

⁸Khali prem ke tum karja rakkho! Agar tum dusra se prem karega, tab tum wahi karta hei jon kaanuun chaahe hei.

⁹Kaanuun meñ kaafi hukum hei, jeise ke, “Saadi meñ faitful raho. Hatya nai karo. Chori nai karo. Laalach nai karo.” Lekin i sab ekke hukum meñ paawa jaay hei, “Dusra log se aapan rakam prem karo.”

¹⁰Jon bhi koi dusra se prem kare hei, uske buraai nai maañgi. Yahi kaaran prem u sab hei jon kaanuun maañge hei.

¹¹Tum janta hei ki abhi keisan ṭaaim chale hei, aur tum wahi ke rakam raho. Ab neeñd se jage ke ṭaaim aay gais hei. Tum janta hei ki u roj aay gais hei, jab hamme bachaawa jaai, kaahe ke wahi ṭaaim ke waaste ham Parmeshwar pe biswaas kara raha.

¹²Raat beete waala hei, aur din jaldi nikar jaai. Hamme u kaam nai kare ke hei jon añdhera meñ log kare hei, aur roshni meñ rahe ke waaste taiyaar hoy ke chaahi.

¹³Yahi kaaran hamme achchha byohaar kare ke chaahi, jon rakam ulog kare hei jon ujera meñ rahe hei. U rakam ke paaṭi meñ nai jaao, jahañ log piye hei, aur hasi majaak kare hei, aur jahañ jaran bhaao, aur jhagṛa jhanjhaṭ hoy hei.

¹⁴Prabhu Yeeshu Maseeh ke aapan etna nagichche rakkho jetna ki tumhaar deñhi pe tumhaar kapṛa hei. Aur tab tum aapan selfish ichchha puura kare meñ nai laga rahega.