Read Hindi, Fiji Raom 14 Bible Online

Raom 14 - Hindi, Fiji bible

Raom 14

¹Swaagat hei sab ke jon jon Parmeshwar ke pichchhe chale hei, ulog ke bhi jon ke biswaas kamjor hei. Ulog pe dos nai lagaao, jon ke biswaas tumhaar biswaas se alge hei.

²Kuchh log samjhe hei ki i ṭheek rahi ki ulog sab kuchh khaay hei, lekin jon ke biswaas kamjor hei, ulog khali vegitarian khaana khaay hei.

³Lekin tum log kaahe dos nikaarta hei chaahe ulog khaay ya nai khaay. Kaahe ke Parmeshwar sab ke welkam kare hei.

⁴Tumhaar lage kaa hak hei ki tum dusra log ke naukar pe dos lagaata hei? Khali uske maalik bataay sake hei ki kaa ṭheek kare hei, kaahe ke khali Prabhu bataay sake hei ki kaa raaiṭ hei.

⁵Prabhu pe biswaas kare waala kuchh log i soche hei ki ek roj dusra roj se kahiñ jaada achchha hei. Baaki log soche hei ki sab roj ek baraabar hei. Lekin har ek admi ke aapan aapan bichaar apne tay kare ke chaahi.

⁶U biswaasi jon ek din ke dusra din se baṛh ke maane hei, u Prabhu ke sammaan meñ kare hei. Aur u jon gos maas khaay hei, u Parmeshwar ke dhanbaad de hei, ṭheek wahi rakam jon gos maas nai khaay hei.

⁷Ham chaahe jee ya mari, i khali Parmeshwar ke waaste rahe, aapan waaste nai.

⁸Agar ham jie ya mare, i khali Parmeshwar ke khaatir hoy. Yahi khaatir, jinda ya murda, ham Parmeshwar ke hei.

⁹Yahi kaaran hei, kaahe ke Krisṭ mar gais raha aur fir jinda hoy gais, Ki jisse u jinda log aur murda duuno ke Prabhu rahe.

¹⁰Prabhu ke dusra biswaasi pe kaahe tum dos lagaata hei? Kaahe tum ulog ke neecha samajhta hei? U roj aay hei jab Parmeshwar hamaar nyaay kari.

¹¹Baaibal meñ Parmeshwar bole hei, “Ham aapan jeewan ke kasam khaata hei ki sab koi ghuṭna ṭek ke hamaar naam ke baṛaai kari!”

¹²Yahi khaatir ham sab ke Parmeshwar ke saamne dekhaay ke hei ki ham sab kaa kara.

¹³Hamme dusra log ke jaj nai kare ke chaahi. Hamme i bhi dekhe ke chaahi ki ham dusra log ke biswaas ke choṭ nai pahuñchaai.

¹⁴Prabhu Yeeshu Maseeh i baat safa kar dees hei ki Parmeshwar ke bagal se sab khaay waala cheej ṭheek hei. Lekin, agar tum sochta hei ki kuchh khaay waala cheej nai achchha hei, to u tumhaar waaste nai achchha hei.

¹⁵Agar tum koi ke dil dukhaay ke khaana khaata hei, tab tum prem se nai chalta hei. Tum aapan khaana se ulog ke naas nai karo, jon log ke khaatir Krisṭ aapan praan dees raha.

¹⁶Aapan khaay ke hak ke, Krisṭ ke saramnaak nai banaao.

¹⁷Parmeshwar ke raaj khaay piye ke nai hei, lekin Parmeshwar ke khusi rakkhe ke hei, saanti se rahe ke hei, aur sachcha aanand ke hei. I sab Pawitr Aatma ke bagal se aay hei.

¹⁸Agar tum Yeeshu ke sewa yahi rakam karega, to tum Parmeshwar ke khusi rakkhega aur log tumhaar ijjat kari.

¹⁹Hamme chaahi ki ham, apne saanti se rahe aur dusra log ke madat kare, ki jisse hamaar aur ulog ke biswaas aur bhi majbuut hoy jaay.

²⁰Khaana ke khaatir, u kaam jon Parmeshwar karis hei, uske naas nai karo. Sab khaana khaay ke waaste ṭheek hei, lekin jon tum khaata hei uske khaatir dusra log ke museebat meñ nai ḍaaro.

²¹Yahi meñ bhalaai hei ki tum gos maas nai khaao, aur waain nai pio, ya kuchh eisan kaam nai karo jisse Prabhu ke biswaasi pe museebat aay jaai.

²²Jon kuchh tum biswaas karta hei, u Parmeshwar aur tumhaar beech meñ rakkho. Tum khush kismat hei agar tumhaar kaam se tumhaar man meñ kuchh ḍaauṭ nai hoi.

²³Lekin agar jon cheej tum khaata hei, uspe tumme kuchh ḍaauṭ hei, to tum aapan biswaas ke agaiñsṭ jaata hei. Aur tum janta hei ki u roñg hei, kaahe ke agar tum aapan biswaas ke agaiñsṭ kuchh karta hei, to u paap hei.