Read Hindi, Fiji Raom 15 Bible Online

Raom 15 - Hindi, Fiji bible

Raom 15

¹Agar hamaar biswaas majbuut hei, to hamme Prabhu ke ulog pe dheeraj rakkhe ke chaahi jon ke biswaas kamjor hei. Hamme ulog ke khusi rakkhe ke chaahi, apne aap ke nai.

²Hamme ulog ke bhalaai ke baare meñ soche ke chaahi, aur jon cheej se u khusi rahe hei, wahi kaam kar ke ulog ke madat kare ke chaahi.

³Krisṭ bhi apne aap ke khusi nai karis. Lekin jeise Baaibal bole hei, “Jon tumhaar ninda karis hei, wahi log hamaar bhi ninda karin.”

⁴Baaibal meñ jon kuchh likha hei, hamme sikhaay ke aur dheeraj baṛhaay ke khaatir hei, aur hamme aasha dewe hei.

⁵Khali Parmeshwar hei jon hamme khusi rakkhe sake hei, aur dheeraj bhi dewe hei. Ham binti karta hei ki u tumme madat kare ki tum Maseeh ke mutaabik, saanti se ek dusra ke sañghe chalte raho.

⁶Tab tum sab ek sañghe Parmeshwar, hamaar Prabhu Yeeshu Maseeh ke Pita ke baṛaai karega.

⁷Parmeshwar ke mahima ke waaste ek dusra ke apnaao, jeise Yeeshu Maseeh tumme apnaais hei.

⁸Ham bataata hei ki Maseeh, Yahuudi log ke sewak ban ke aais raha ki u dekhaay sake ke Parmeshwar aapan waada, jon u hamaar baap daada se karis raha, puura karis. Krisṭ i kaaran aais,

⁹ki jisse geir Yahuudi bhi Parmeshwar ke daya ke baṛaai kare. I wahi hei jon rakam Baaibal meñ likhaan hei, “Ham tumhaar baare meñ sab jaati ke log ke bataayga, aur ham tumhaar naam ke baṛaai gaayga.”

¹⁰Baaibal i bhi geir Yahuudi se bole hei, “Aao aur Parmeshwar ke log ke sañghe khusi manaao.”

¹¹Fir se Baaibal bole hei, “Parmeshwar ke baṛaai karo, tum sab jon geir Yahuudi hei. Sab jaati ke log, aao aur uske weship karo.”

¹²Aayzaaya bole hei, “Ḍeiviḍ ke palwaar se koi taagat paai. U puura jagat pe raaj kari, aur u aapan aasha wahi meñ rakkhi.”

¹³Ham binti karta hei ki Parmeshwar, jon tumme aasha dewe hei, u tumhaar biswaas ke kaaran tumme aasheesh dei ki tumme puura saanti mile. Aur Pawitr Aatma ke taagat se tumhaar aasha puura hoy.

¹⁴Hamaar dost log, ham janta hei ki tum sab bahut achchha log hei aur tumhaar lage puura gyaan hei ki tum ek dusra ke sikhaay sako.

¹⁵Lekin ham tum se safa safa bola hei aur kuchh cheej ke yaad karaay ke kosis bhi kara hei. Parmeshwar ham pe daya karis!

¹⁶U hamme chunis ki ham geir Yahuudi ke khaatir Yeeshu Maseeh ke sewak bani, aur Parmeshwar ke susamaachaar ke sewa ek paadri ke rakam kari. Parmeshwar i kaaran iske karis, ki Pawitr Aatma, Yahuudi log ke ek pawitr daan dei ki jisse Parmeshwar ke ulog pasand aay.

¹⁷Yeeshu Maseeh ke kaaran, ham Parmeshwar ke sewa ghamanḍ se karta hei.

¹⁸Hiañ tak ki, ham khali wahi bolega ki kon rakam Yeeshu hamme bole aur kaam kare ke dees hei, ki jisse geir Yahuudi uske hukum maane.

¹⁹Aur haañ, ham i bhi bolega ki kon rakam Yeeshu Maseeh, Pawitr Aatma ke taagat se chamatkaar aur adbhut kaam karis hei. Ham Yarushalam se leke chaaro bagal Illurikum tak Maseeh ke susamaachaar ke puura puura parchaar kara.

²⁰Lekin ham sab ṭaaim yahi kosis kara ki jahañ Maseeh ke naam nai lewa gais hei, huañ parchaar kari. Ham ek kaapenṭa ke rakam hei, jon dusra ke faaunḍeishan pe ghar nai banaay hei.

²¹I wahi rakam hei, jeise Baaibal meñ likhaan hei, “Jon ke uske baare meñ nai bataawa gais ulog uske dekhi, aur jon jon uske baare meñ nai sunis ulog samajh lei.”

²²Hamaar kaam ke kaaran abhi tak ham tumme dekhe nai aay saka.

²³Ab idhar ke dunia meñ hamaar waaste aur kuchh kare ke nai bacha hei, aur saalo saal ham tumhaar lage aay mañgta raha.

²⁴To Spain jaate ṭaaim, rasta meñ ham rukega. Tab thoṛa deri ke waaste tumhaar lage araam karega, ham aasha karta hei ki tum hamme jaldi se aage jaay dega.

²⁵Abhi to ham Yarushalam peisa de ke waaste jaata hei, jon Mesiḍonia aur Akhya ke Parmeshwar ke biswaasi log Parmeshwar ke jaruurat mand log ke waaste baṭorin hei, aur baṭoral peisa ulog ke dewe ke hei.

²⁷Yahi ulog sachmuch meñ kare maañge hei. Lekin Yahuudi log meñ peisa baaṭe ke matlab i bhais ki ulog ke karja lauṭaawa jaay hei, kaahe ke Yahuudi log aapan aatmik aasheesh geir Yahuudi se baaṭe rahin.

²⁸Jab ham peisa ulog ke sahi salaamat de dega, tab ham tumhaar lage aayga, aur fir Spain jaagya.

²⁹Aur jab ham Raom meñ pahuñchega, aur ham janta hei ki i Maseeh ke aasheesh se bhara hoi.

³⁰Hamaar dost log, Prabhu Yeeshu Maseeh ke taagat aur u prem se jon Pawitr Aatma se aay hei, ham chirauri karta hei ki hamaar sañghe Parmeshwar se preya kare meñ madat karo.

³¹Preya karo ki Parmeshwar hamme Juḍia ke abiswaasi log se bachaay rakkhe, aur Yarushalam meñ ulog khusi rahe i dekh ke ki ham kaa karta hei.

³²Parmeshwar se maañgo ki ham khusi se tumhaar lage aai aur tumhaar sañghe araam kari.

³³Ham preya karta hei ki Parmeshwar, jon saanti de hei, tumhaar sañghe hardam rahe. Aameen.