Read Hindi, Fiji Raom 16 Bible Online

Raom 16 - Hindi, Fiji bible

Raom 16

¹Ham tum se Feebe ke baare meñ achchha baat kare mañgta hei, jon Kinkhria chech ke agua rahi.

²Tum uske i rakam welkam karo, jeise Parmeshwar ke biswaasi aur Parmeshwar ke aapan log ke karta hei. Jeise bhi hoy sake hei, uske weise hee madat karo. Kaahe ke i maan lewa gais hei ki u hamaar aur dusra log ke ijjatdaar agua rahis.

³Prisila aur Aquila ke hamaar namaste dena. Ilog khali hamaar sañghe Yeeshu Maseeh ke sewa nai karis raha,

⁴lekin hamaar waaste aapan jaan bhi daaoñ pe lagaay deen raha. Yahi kaaran geir Yahuudi ke chech aur ham i duuno ke dhanbaad deta hei.

⁵Jon jon chech ulog ke ghar meñ mile hei, ulog ke bhi hamaar namaste dena. Eshia meñ jon sab se pahila Yeeshu ke biswaasi bana, u hamaar pyaara dost Ipeinitus hei, uske hamaar namaste pahuñchaana.

⁶Meri ke, jon tumhaar khaatir bahut mehnat karis raha, uske bhi hamaar namaste.

⁷Hamaar palwaar, Andranikus aur Junias jon hamaar sañghe jel meñ rahin, ulog ke chela log meñ baṛa naam hei, aur ham se pahile, Maseeh ke biswaasi rahin, ulog ke bhi namaste.

⁸Ampliyatus, hamaar pyaara dost, jiske biswaas Parmeshwar meñ hei, uske namaste.

⁹Urbaanus, jon hamaar sañghe Maseeh ke sewa karis raha, uske bhi namaste. Hamaar pyaara dost, Istakhus ke hamaar namaste.

¹⁰Apilles, jon Maseeh ke sachcha sewak hei, uske hamaar namaste. Aristubulus aur uske palwaar ke hamaar namaste.

¹¹Herodion, jon hamaar palwaar hei, uske hamaar namaste. Narsissus aur uske palwaar, jon Parmeshwar ke biswaasi hei, ulog ke hamaar namaste.

¹²Trufena aur Trufosa, jon Parmeshwar ke khaatir mehnat aur kaṛa kaam karin raha, ulog ke hamaar namaste. Hamaar pyaara dost, Persis bhi, jon Parmeshwar ke waaste kaṛa kaam karis raha, ulog ke hamaar namaste.

¹³Rufus, Parmeshwar ke khaas sewak, aur uske amma ke, jon hamaar khaatir amma ke rakam hei, uske hamaar namaste.

¹⁴Asinkritus, Fligon, Hemes, Patrobas, Hermas, aur ilog ke sañghe hamaar aur dost log ke bhi hamaar namaste.

¹⁵Filulugus, Julia, Nereus aur uske bahini, Olimpas aur uske sañghe sab Parmeshwar ke log ke hamaar namaste.

¹⁶Yaad kar ke ek dusra ke haardik namaste dena. Maseeh ke sab chech tumme namaste kare hei.

¹⁷Hamaar dost log, ham tum se chirauri karta hei ki jon log ṭrabal laay hei aur chech ke baaṭ de hei, aur jon tum seekha hei, uske nai maane hei, ulog se duur raho.

¹⁸Kaahe ke ilog, Prabhu Yeeshu Maseeh ke nai, lekin apne aap ke sewa kare hei. Ilog ke chikni chupṛi baat, seedha saada log ke bahkaay de hei.

¹⁹Ham bahut khusi hei ki sab log jaane hei ki tum kon rakam Parmeshwar ke hukum ke maanta hei. Fir bhi, ham mañgta hei ki tum samajh lo ki kon cheej achchha hei, aur buraai se kuchh waasta nai rakkho.

²⁰Tab Parmeshwar, jon saanti dewe hei, jaldi hee saitaan ke tumhaar goṛ ke nichche kuchar dei. Ham binti karta hei ki Prabhu Yeeshu Maseeh tum pe daya kari.

²¹Ṭimathi, jon hamaar sañghe kaam kare hei, aur Lusias, Jaysan, aur Sosiptrus, tum sab ke namaste bheje hei.

²²I chiṭṭhi ke likhe waala ham, Tirtiyus, bhi aapan Maseehi namaste tum sab ke bhejta hei. Ham Prabhu ke pichchhe chale waala hei.

²³Gayus bhi, jon hamme aur puura chech ke aapan ghar meñ welkam karis raha, aapan namaste bheje hei. Erastus, siṭi ke khajaanchi, aur hamaar pyaara dost, Kwaartus bhi aapan namaste bheje hei. Hamaar Prabhu Yeeshu Maseeh ke anugrah tumhaar sañghe rahe. Aameen.

²⁵Parmeshwar ke jay! U tumme hamaar susamaachaar ya Yeeshu Maseeh ke sandes ke mutaabik taagatwar banaay sake hei. Janam janam se i sandes seekraṭ rakkha gais raha,

²⁶lekin ab aakhri meñ i bataawa gais hei. Anant Parmeshwar, nabi log ke hukum dees ki susamaachaar ke baare meñ likho, ki jisse sab jaat ke log hukum maane aur biswaas kare.

²⁷Aur ab, Yeeshu Maseeh ke kaaran, ham khali wahi ek buddhimaan Parmeshwar ke sada baṛaai kare sakta hei. Aameen.