Read Hindi, Fiji Raom 2 Bible Online

Raom 2 - Hindi, Fiji bible

Raom 2

¹Tum meñ se koi koi dusra pe dos lagaay hei ki u ulṭa kaam kare hei. Lekin iske tumme koi bahaana nai hei. Jab tum dusra pe dos lagaata hei, tab tum khud apne aap ke dosi banaata hei, kaahe ki tum apne aap wahi kaam karta hei.

²Ham sab janta hei ki Parmeshwar raaiṭ hei jab u i rakam kaam kare waala pe nyaay kare hei.

³Kaa tum sachche ke sochta hei ki Parmeshwar tumme saja nai dei, jab tum wahi log ke rakam kaam karta hei jiske tum dosi maanta hei?

⁴Tum Parmeshwar ke achchhaai aur uske sahe ke taagat ke kuchh nai samajhta, aur i bhi nai janta ki u ketna maañge hei ki u tumhaar sañghe rahe. Kaa tum nai janta ki Parmeshwar i kaaran tumme sahe hei ki u maañge hei ki tum uske bagal ghuum jaao?

⁵Lekin tum jiddi hei aur uske bagal jaay nai mañgta hei. Yahi kaaran tum aapan waaste achchha nai karta hei, u din jab u dekhaai ki u ketna gussa hei, aur dunia ke sañghe nyaay kari.

⁶Parmeshwar sab log ke uske kaam ke mutaabik inaam dei.

⁷Parmeshwar ulog ke anant jeewan dei, jon dheeraj se achchha kaam karis hei ki jisse u sab ke mahima, aadar aur hardam ke waaste laaif mile.

⁸Lekin Parmeshwar i bhi dekhaai, ki jon khali aapan baare meñ soche hei, aur sachchaai ke nai maane hei, aur kharaab kaam kare hei, ulog ke sañghe u ketna naraaj aur gussa hei.

⁹Jon sab kharaab admi hei, ulog ke museebat aur dukh se saja mili, chaahe u Yahuudi hei ya geir Yahuudi.

¹⁰Lekin jon koi bhi achchha kaam karis hei u sab ke, mahima aur aadar sammaan aur saanti ke inaam mili, chaahe u Yahuudi hoy ya geir Yahuudi.

¹¹Parmeshwar koi ke pach nai lewe hei!

¹²Ulog jon Parmeshwar ke kaanuun nai jaane hei, aur kharaab kaam karin hei, ulog ke bhi uske waaste saja mili.

¹³Parmeshwar ulog ke apnaay hei jon uske kaanuun ke maane hei, ulog ke nai jon khali sune hei.

¹⁴Koi koi to apne se kaanuun ke aagya ke maan le hei, chaahe ulog ke paas kaanuun hoy ya nai.

¹⁵I yahi dekhaay hei ki bura bhala ke gyaan, ulog ke khaatir ulog ke dil meñ likhaan kaanuun ke rakam hei. Aur i hamme yahi dekhaai ki hamme maafi mila hei ki saja mila hei.

¹⁶Jab Parmeshwar, Yeeshu Maseeh ke chunis hei ki, sab ke dimaag ke chhupa baat ke parkhe, jeise hamaar sandes bataay hei.

¹⁷Koi koi apne aap ke Yahuudi bolaay hei. Tum kaanuun pe bharosa karta hei aur Parmeshwar meñ ghamanḍ karta hei.

¹⁸Baaibal paṛhe se tum seekhta hei ki tumme keise rahe ke hei, aur tum i jaan leta hei ki kon cheej raaiṭ hei.

¹⁹Tum apne aap pe bharosa kar leta hei ki tum añdha ke rasta dekhaay waala hei, aur ulog ke waaste laaiṭ hei jon añdhiyaar meñ hei.

²⁰Aur jab ke Parmeshwar ke kaanuun meñ buddhi aur sachchaai hei, tab tum sochta hei ki tum beokuuf ke samjhaay lega aur laṛkan ke bhi sikhaay lega.

²¹Lekin keise tum dusra ke sikhaayga, jab tum apne nai seekhe saka? Tum to sikhaata hei ki chori ṭheek nai hei. Kaa tum apne chori nai karta?

²²Tum bolta hei ki saadi byaah ke sachchaai se nibhaao. Lekin kaa tum khud aapan saadi ke achchha se nibhaaya? Tum muurti se ghinn rakhta hei, fir bhi tum Mandir ke luuṭta hei.

²³Tum Parmeshwar ke kaanuun pe ghamanḍ karta hei, lekin uspe chalta nai hei aur Parmeshwar ke kaanuun pe saram laata hei.

²⁴Baaibal hamme bataay hei, “Tumhaar kaaran, aur jaati ke log Parmeshwar ke naam ke ninda kare hei.”

²⁵Agar tum kaanuun ke rasta pe chalta hei to khatna ṭheek hei. Lekin, jab tum kaanuun ke nai maanta, to tum usse bhi kharaab hei jiske khatna nai bhais hei.

²⁶Yahi kaaran, agar tum kaanuun ke maanega, to otna achchha hei jetna ulog hei jon ke khatna bhais hei.

²⁷To jon koi bhi kaanuun ke maane hei, chaahe uske khatna bhais hei ya nai, u kasuurwaar hei, kaahe ke tumhaar khatna bhi bhais hei aur tumhaar paas kaanuun bhi hei, lekin tum kaanuun ke nai maanta hei.

²⁸Iske matlab i nai ki tum Yahuudi ke rakam rahta hei aur tumhaar khatna bhi bhais hei, to tum sachche ke Yahuudi hei.

²⁹Sachcha Yahuudi to wahi hei jon kaanuun ke maane hei. Sachcha khatna to wahi hei jon tumhaar dil ke gahraai se hoy hei, eisan kuchh nai ki u khali tumhaar deñhi se hoy hei. Aur iske chhoṛ ke, tumhaar baṛaai Parmeshwar ke bagal se hoy ke chaahi naa ki admi ke bagal se.”