Read Hindi, Fiji Raom 4 Bible Online

Raom 4 - Hindi, Fiji bible

Raom 4

¹To ab ham aapan baap daada Abraham ke baare meñ kaa bole sakta hei?

²Agar Parmeshwar uske, uske kaam ke khaatir apnaais, tab u ghamanḍ karta, lekin Parmeshwar ke aage nai.

³Vachan bole hei, “Parmeshwar Abraham ke apnaais kaahe ke uske Parmeshwar pe biswaas karis raha.”

⁴Kaam kare waala ke talab mile hei, inaam nai. Ulog to kaam kar ke kamaay hei.

⁵Lekin tum kuchh karega aur Parmeshwar se bolega ki u tumme apnaay to i nai chali. Parmeshwar paapi log ke apnaay hei kaahe ki ulog Parmeshwar pe biswaas kare hei.

⁶Baaibal meñ Ḍeiviḍ u aasheesh ke baat kare hei jon ulog ke mile hei jiske Parmeshwar apnaay hei, chaahe ulog kuchh bhi nai kare ki ulog ke mile ke chaahi.

⁷“Parmeshwar u sab ke aasheesh de hei jiske paap maaf hoy jaay hei aur jiske kharaab kaam bhulaay dewa jaay hei.

⁸Parmeshwar ulog ke aasheesh de hei jiske paap uske buk se miṭ jaay hei.”

⁹To kaa i sab aasheesh ulog ke khaatir hei jiske khatna bhais hei ya ulog ke khaatir hei jiske khatna nai bhais hei? Baaibal bole hei ki Parmeshwar Abraham ke apnaais, kaahe ki Abraham uske biswaas karat raha.

¹⁰Lekin i sab kab bhais? Kaa i Abraham ke khatna se pahile ya baad meñ bhais raha? Jaruur khatna se pahile.

¹¹Abraham apne aap ke i kaaran khatna karaais ki jisse u dekhaay sake ki Parmeshwar uske biswaas ke kaaran khatna se pahile uske apnaay lees raha. Ab to Abraham u sab ke baap ban gais hei jon koi ke Parmeshwar uske biswaas ke kaaran apnaay hei, chaahe uske khatna hoy hei ya nai.

¹²Aur Abraham u sab ke baap hei jon ke khatna bhi bhais hei aur Parmeshwar meñ biswaas bhi kare hei, jeise khatna se pahile karis raha.

¹³Parmeshwar, Abraham aur uske ḍisenḍañṭ se waada karis raha ki puura dunia ulog ke de dei. I waada i kaaran nai bhais raha ki u kaanuun ke paalan karis raha, lekin uske biswaas jisse Parmeshwar uske apnaais raha.

¹⁴Agar Abraham aur uske ḍisenḍañṭ jon i kaanuun ke maanis raha, se i waada kara gais raha, to biswaas meñ kuchh matlab nai, aur i waada bekaar rahi.

¹⁵Parmeshwar gussaay jaay hei jab uske kaanuun ke tuuṛa jaay hei. Lekin jab kaanuun hee nai, to uske keise tuuṛa jaay sake hei?

¹⁶Sab cheej wahi biswaas pe ruka hei, ki jisse Parmeshwar ke waada uske daya se jaruur mili. I waada khali Abraham ke waaris jiske lage kaanuun hei uske khaatir khali nai hei. I to u sab ke khaatir hei jon Abraham ke waaris hei, kaahe ki ulog ke paas wahi rakam biswaas hei aur Abraham ham sab ke baap hei.

¹⁷Jeise vachan meñ likhaan hei ki Abraham bahut jaati ke Pita bani. I promis Abraham se kara gais raha, kaahe ki u biswaas rakkhat raha, u Parmeshwar se, jon nawa cheej banaay hei aur jon mar jaay hei uske jinda kar de hei.

¹⁸Parmeshwar waada karis raha ki Abraham ke bahut se waaris hoi. Jab Abraham bahut niraas raha, fir bhi u Parmeshwar pe biswaas rakkhat raha yahi khaatir u bahut se jaati ke Pita banis.

¹⁹Abraham ke biswaas kabhi kamjor nai bhais, u ṭaaim bhi nai jab u ek sao saal ke hoy waala raha. U jaanat raha ki u mare waala hei, aur uske aurat ke bhi bachcha nai hoi.

²⁰Lekin Abraham kabhi nai Parmeshwar se sawaal karis ya uske biswaas ṭuuṭis. Uske biswaas uske aur majbuut banaais, aur u i biswaas ke mahima Parmeshwar ke dees.

²¹Abraham ke biswaas raha ki Parmeshwar jon waada kare hei, uske puura kare hei.

²²Yahi kaaran Parmeshwar uske apnaais,

²³wahi rakam jeise ham Baaibal meñ paṛhta hei. Lekin i sab khali Abraham ke khaatir nai likhaan raha.

²⁴U sab ham log ke khaatir bhi likha gais raha, kaahe ki agar ham bhi biswaas karega to Parmeshwar hamme bhi apnaai, wahi rakam jeise u Yeeshu Maseeh ke jinda karis raha.

²⁵Parmeshwar hamme Yeeshu Maseeh dees raha ki jisse u hamaar waaste mare sake, aur u uske jeewan dees, ki jisse Parmeshwar ham sab ke apnaay sake.